"მე ვარ აჭარის მთავრობის ერთადერთი თავმჯდომარე, რომელიც არსად არ გაიქცა"

მთავარი თემა

"მე ვარ აჭარის მთავრობის ერთადერთი თავმჯდომარე, რომელიც არსად არ გაიქცა"

2013 მარ 27 18:30:33

რა ინფორმაცია ჰქონდა ლევან ვარშალომიძეს "ტელეარხი 25"-ის გასხვისებასთან დაკავშირებით და რა კონკრეტულ რჩევებს აძლევს იგი სამართალმემკვიდრეებს? "გურია ნიუსი" აჭარის მთავრობის ყოფილ თავმჯდომარესთან ლევან ვარშალომიძესთან ექსკლუზიურ ინტერვიუს გთავაზობთ.

_ ბატონო ლევან, როგორ შეაფასებთ აჭარის მთავრობის ახალ თავმჯდომარეს? როგორი სამართალმემკვიდრეა?

_ შეფასება ჯერ ადრეა _ მხოლოდ 3-4 თვეა გასული, მაგრამ, ფაქტობრივად, ბატონ არჩილს დავუტოვეთ ისეთი მემკვიდრეობა, რომელზეც, 9 წლის წინ ჩვენ რომ დავიწყეთ, ოცნებაც კი შეუძლებელი იყო. გაპარტახებული ქვეყნიდან რეალურად დავუტოვეთ ქვეყანა თავისი სისტემით, თავისი სტრუქტურით, თავისი ხაზინით, პროექტებით და, რაც მთავარია, ხალხით. მართლაც კვალიფიციური კადრებია; მართლაც მიხარია და ვამაყობ იმით, რომ ამ ცხრა წლის განმავლობაში ბათუმში მოვიდა ახალი თაობა, ახალი ბიუროკრატია შეიქმნა, რომელსაც თავის მხრივ დამოუკიდებლად შეუძლია მართოს. რა თქმა უნდა, შედეგები დროს მოყვება ხოლმე. მაგალითად ახალ ამბებს ვუყურებდი და მართლაც მიკვირს, როცა მანდარინზეა საუბარი და წარმატებაზე ვლაპარაკობთ _მხოლოდ გუშინ დაიწყეს ჩაბარებული მანდარინის თანხების გასტუმრების პროცესი. როდისაა მანდარინის სეზონი და როდის ისტუმრებენ თანხებს? საზოგადოებისთვის ყველაფერი მარტივი და ნათელი უნდა იყოს _ მე მგონი, არ უნდა ხდებოდეს ქვეყანაში მანდარინის თანხების მარტში გასტუმრება. ვფიქრობ, ამის რესურსიც იყო, ამის საშუალებაც და რატომ არ გააკეთეს, არ ვიცი.

_ რას ფიქრობთ, როგორი მენეჯერია არჩილ ხაბაძე?

_ ჯერ მაგის განსაზღვრაც რთულია. საბანკო სექტორში ნამუშევარია, იმედია წაიყვანს სექტორს. მთავარი არის, რომ ამ სტრუქტურებთან ერთად ჩვენ მთავრობას დავუტოვეთ ჩვენი სტრატეგიული გეგმა. ეს, ეგრეთ წოდებული, "შპარგალკა" რომელიც შეიძლება გადაშალოთ და ყოველდღიურად გაწერილია სამოქმედო გეგმა მომდევნო 5 წლის განმავლობაში _ რომელ წელს, რომელ სექტორში რა უნდა გააკეთო, გაწერილია. მთავარია, ეს მიმართულებები და სტრატეგიული პრიორიტეტები არ უნდა შეცვალო. აჭარა იყო ტურისტული რეგიონი, იყო სოფლის მეურნეობა და ახალი მიმართულებით, რომელიც გვქონდა აღებული, ამ სფეროების განვითარება გვინდოდა. გვინდოდა რეგიონის ინდუსტრიალუზაციაც, რომელიც მართლაც არის ერთ-ერთი მნიშვნელოვანი დარგი. ეს ყველაფერი საჭიროა იმისთვის, რომ ხალხი დასაქმდეს, თუმცა, სამწუხაროდ, რასაც ვუყურებ დღეს, დასაქმება კი არა, ბევრი ობიექტი იხურება. ამას მართლაც სჭირდება დიდი ყურადღება.

_ თქვენი ხელისუფლებისგან განსხვავებით, ახალი მთავრობისათვის ტურიზმი აღარ არის პრიორიტეტი.

_ ტურიზმი პრიორიტეტად არ რჩება _ ეს იქედანაც ჩანს, რომ ჯერ ტურისტული პაკეტი არ არის, პროდუქტი არ არის. ტურიზმი მხოლოდ მაისში არ უნდა დაიწყოს ახლანდელმა მთავრობამ. იგი ხელისუფლებაში ოქტომბერში მოვიდა და ეს თვეები არ უნდა გაეშვათ. ტურიზმი არ ნიშნავს, რომ მხოლოდ გამოფენებში მივიღოთ მონაწილეობა. ეს არის მთელი სექტორი, სადაც მთელი საზოგადოების ჩართულობა უნდა იყოს. ნაკლები ტურისტი, ნაკლები დახარჯული ფული, ნაკლები შემოსავალი მართლაც მტკივნეულია.

_ ბოლო წლების განმავლობაში, ქალაქში ინფრასტურუქტურული სამუშაოების გამო, ტურისტებს ეშლებოდათ ხელი. ახლა როცა სამუშაოები დასრულდა და ტურისტებისთვის უფრო კომფორტული გარემო შეიქმნა, ტურიზმი უფრო მეტად პრიორიტეტული არ უნდა იყოს?

_ პირდაპირ ვთქვათ _ გარკვეული არაა, თუ რა არის პრიორიტეტი. ტურიზმი ხან არის, ხან _ არ არის პრიორიტეტი, მაგრამ რომ უარია, ეს ფაქტია. რეალურად, ტურიზმის დეპარტამენტის 10 თუ 20 თანამშრომელი ვერ შეძლებს ტურიზმის განვითარებას. აქ მთელი სახელმწიფო სტრუქტურა უნდა იყოს ჩართული. ტურიზმის სექტორში ჩვენ სხვადასხვა მიმართულებით გვქონდა _ იყო ზღვის, იყო სოფლის, იყო მთის. და რა ხდება მთაში? გომარდული - არ ვიცით, რა ხდება აქ, თანხა არ არის გამოყოფილი გოდერძის უღელტეხილზე, გზის გაკეთების გეგმა საერთოდ არ არის. უფრო მეტსაც გეტყვით _ არსებულ კურორტ "ბეშუმს" ლიკვიდაცია გაუკეთეს. მთა რომ გაურკვეველ მდგომარეობაშია, ეს ყველამ კარგად ვიცით, მაგრამ იგივე მდგომარეობაა საზღვაო ტურიზმშიც. ბევრი გვსაყვედურობს, რომ კონცერტები და ტაშ-ფანდური გქონდათო, მაგრამ კონცერტს მოჰყავს ტურისტი, სანახაობას მოჰყავს დამატებით ხალხი. მთავრობამ თუ თანხა არ დახარჯა და გვერდით არ დაუდგა ტურისტულ ინფრასტურქტურას, ისე, თავისით, რთული იქნება. მე კარგად მახსოვს, ჯერ კიდევ 2004-ში 80 ათასი ტურისტი იყო და გვიხაროდა ამ რაოდენობის ტურისტი. მაგრამ უკვე გადავლახეთ ის ზღვარი, რომელიც საბჭოთა კავშირის დროს რომ იყო _ 800 ათასი ტურისტი, შარშან კი მილიონნახევარზე ავედით. დღევანდელ ტურიზმის დეპარტამენტს ან მთავრობას შეიძლება ეს ციფრები არ მოსწონს, მაგრამ, თუ უნდათ, თავიდან გადათვალონ.

_ თქვენი ხელისუფლებიდან ბევრი ადამიანი გადავიდა ახალ მთავრობაში და პოლიტიკური შეხედულება 2 ოქტომბერსვე შეიცვალა. ეს ადამიანები თქვენი დასაყრდენი ძალა იყო. როგორ შეაფასებთ ამ ფაქტს?

_ მართლაც სამწუხაროა, როცა ასეთი ფაქტები არსებობს. მაგრამ ყველაფერს დავარქვათ თავისი სახელი. ალბათ, საჭიროც იყო და ლუსტრაციაც მოხდა, ვინ ვინ არის და ვინ რას წარმოადგენს. ჩვენი მთავარი მიზანია, ეს ყველაფერი გავაგრძელოთ და ქვეყანა შევიდეს პოლიტიკური ცხოვრების ახალ რიტმში. გასაკეთებელი მართლაც ბევრია. ჩვენი მიზანი არ არის, რომ ჩავუდგეთ კრიჭაში და რაღაც ვაფუჭოთ. ჩვენი უნდა ვიზრუნოთ დანაპირების შესრულებაზე და უფრო მეტი გავაკეთოთ ჩვენი მოსახლეობისთვის. ზუსტად ოქტომბერში, როდესაც მოხდა ხელისუფლების გადაბარება, ძალიან ბევრი პროექტი დავტოვეთ. ამას სჭირდება მიხედვა, ამას სჭირდება გაძღოლა და ამას სჭირდება ბოლომდე მიყვანა. სამწუხაროდ, თუ დავკავდებით მხოლოდ ძველი ხელისუფლების კრიტიკით, ახალს ვერასდროს ვერ შევქმნით.

_ რა პროექტები დაუტოვეთ სამართალმემკვიდრეებს?

_ როგორც სახელმწიფო, ასევე კერძო ინფრასტურქტურიდან დაწყებული, დამთავრებული სამრეწველო პროექტებით და არა მარტო პროექტები. ოთხი თვის მანძილზე არც კი მოუკითხავთ და არც რამე კითხვა გასჩენიათ. მუდამ მზად ვიყავით დავხმარებოდით, რომ ყველა პროექტი გახორციელებულიყო. თუნდაც ეს მაგალითი ავიღოთ _ ქალაქმა ბათუმმა 140 მილიონი ლარით ნაკლები დაფინანსება მიიღო, მთლიანად რეგიონმა კი პლუს 200 მილიონით ნაკლები. ეს 400 მილიონამდე თანხა, რომელიც არ დაიხარჯა რეგიონში, ცუდად იმოქმედებს იგივე სამუშაო ადგილების შექმნაზე. ბათუმის ბიუჯეტი შარშან 220 მილიონი იყო, წელს _ 80 მილიონია. მე მთავრობას ვურჩევდი, უფრო მეტი ყურადღება მიაქციოს უმუშევრობის პრობლემას, რომელიც მოსახლეობას ჩვენს დროსაც ჰქონდა და დღესაც აქვს.

_ თუმცა, თქვენი ხელისუფლების მიერ დაწყებული პროექტების ნაწილი შეჩერდა, ნაწილი კი გრძელდება.

_ ფაქტობრივად, ყველა ჩვენ მიერ დაწყებული პროექტი გრძელდება. სასტუმრო "მარინასთან" დაიწყო ახალი მშენებლობა - კოლიზეუმის მაგვარი, შენდება "სემირამიდას ბაღები", შენდება "ჰოლიდეი ინნი", შენდება "ზღვის ჰოტელი", შენდება "ჰილტონი", "კემპინსკის" მშენებლობა გრძელდება. ეს ნიშნავს, რომ ქალაქს ამ ორი წლის მანძილზე ექვსი ახალი სასტუმრო შეემატება. ანურიის მთაზე საბაგირო გაიხსნება. მიხარია, რომ ქალაქს ემატება ისეთი სიმბოლოები.

_ თქვენ საკმაოდ დიდ თანხას ხარჯავდით კონცერტებში. იყო ეს "გადაყრილი ფული"?

_ ბათუმი ძალიან პატარაა და ყველა ყველაფერს ხედავს. გაიარეთ ქალაქში და ნახეთ. ტურიზმის პატარა და ნათელი მაგალითია რესტორანი. 7-8 რესტორანი დახურულია. და რატომ არის დახურული? ლოგიკას რომ მივყვეთ, პასუხი მარტივია _ მომხმარებელი არ არის. მომხმარებელი ვინ იყო? ტურისტი იყო. ეს იანვარი-თებერვლის სტატისტიკაა და არ ტყუის. თითოეულ რესტორანში 10-15 ადამიანი მუშაობს. ეს ადამიანები უმუშევრები დარჩნენ.

_ დაუშვა თუ არა ახალმა მთავრობამ შეცდომები?

_ ჩვენც დავუშვით შეცდომები და ამ შეცდომებზეც უნდა ისწავლონ. 9 წლის განმავლობაში ჩვენც დავუშვით შეცდომები, მაგრამ როდესაც მუშაობ და საქმეს აკეთებ, შეცდომებსაც დაუშვებ, მაგრამ მუდმივად არ უნდა დაუშვა და მით უმეტეს, შეცდომა არ უნდა გაიმეორო. მთავარი მაინც არის ტურიზმი, სოფლის მეურნეობა და ის, რომ ინდუსტრიალიზაციასზე გადავიყვანოთ რეგიონი.

_ რას ნანობთ? რა ვერ გააკეთეთ თქვენი ხელისუფლებაში ყოფნის დროს?

_ პირველ რიგში დიდ მადლობას ვეტყვი, ჩემთან ერთად ვინც მუშაობდა. მართლაც ბევრი ვიმუშავეთ. ქალაქზე და რეგიონზე უზომოდ შეყვარებული გუნდი იყო. რეალურად, 24 საათის განმავლობაში, კვირაში 7 დღე ვმუშაობდით. დასანანი ისაა, რომ უფრო მეტი პროექტი უნდა გაგვეკეთებინა. დრო იყო ჩვენი ყველაზე დიდი პრობლემა. შეცდომებს კონკრეტულად ვერ ჩამოგითვლით. 9 წლის განმავლობაში პოლიტიკური თანამდებობა გვეკავა, მაგრამ მხოლოდ პოლიტიკით არ ვიყავით დაკავებულები _ დაკავებულები ვიყავით კონკრეტული გეგმით. ეს იყო ბათუმის და მთლიანად აჭარის მშენებლობის პროცესი.

_ იყო მომენტი, როდესაც გინდოდათ მთავრობის თავმჯდომარის პოსტის დატოვება?

_ კი, ერთი-ორჯერ იყო.

_ რამდენიმე წლის წინ, თქვენ გააკეთეთ განცხადება დეცენტრალიზაციასთან დაკავშირებით. მაშინ პრეზიდენტს მოსთხოვეთ ,აჭარის ავტონომიის უფლებების გაზრდა. რატომ აღარ გააგრძელეთ ეს თემა?

_ რაღაც დონეზე ეს პროცესი დაიძრა. 2 წლის წინ დაიწყო კონსტიტუციის ცვლილებებზე საუბარი და ერთ-ერთი ცვლილება იყო ის, რომ საქართველოს კონსტიტუციაზე მომუშავე რეფორმის ჯგუფს მომავალში უნდა გაეგრძელებინა აჭარის კონსტიტუციის რეფორმაზე მუშაობა. რეგიონსა და აჭარას მართლაც სჭირდებოდა ცვლილება. 2004 წლის და დღევანდელი რეალობა მართლაც სხვადასხვაა. სადაც იყო ცენტრი, იქ რეგიონიც უნდა ჩართულიყო.

ჩემი იმ განცხადებიდან გამომდინარე, ძალიან ბევრი პროცესი წავიდა, ბევრი უფლებამოსილება გადმოვიდა. სხვათა შორის, ახლა უმაღლესმა საბჭომ გააგზავნა იგივე კანონპროექტი, რაც ჩვენ ძველ მოთხოვნებში იყო, ანუ პროცესი დღესაც გრძელდება. ვნახოთ _ პარლამენტის უფლებამოსილებაა, გადაწყვეტილება მიიღოს. ახალმა მთავრობამ განაცხადა, რომ რეგიონების დეცენტრალიზაცია უნდა მოხდეს. ახლა არის მართლაც შანსი, რომ აჭარას უფრო მეტი უფლებები მიეცეს, რაც ახლა საქართველოს და აჭარის კონსტიტუციებით ეკუთვნის.

_ "ტელეარხი 25"-ის მფლობელების ახლობლებისთვის ქონების გადაცემას დიდი აჟიოტაჟი მოჰყვა. რატომ გადასცა აჭარის მთავრობამ კერძო ტელევიზიის მფლობელების ახლობლებს ქონება?

_ აჭარის მთავრობას არაფერი არ გადაუცია. ჩვენ ვაკეთებდით ერთ პირთან მოლაპარაკებას. დოკუმენტები საჯაროა და ყველას შეგიძლიათ ნახოთ. არც ერთი ქონება აჭარის მთავრობას არ გადაუცია.

_ თუმცა ამის შესახებ პრესაში დოკუმენტები გამოქვეყნდა.

_ ვიმეორებ _აჭარის მთავრობას არ გადაუცია. ერთ პირთან მოლაპარაკებით რა ქონებაც გაიცა, ყველას სია არსებობს. ქონება ყველას გადაეცა რაღაც ვალდებულებებით. ბევრი მითქმა-მოთქმა იყო ერთ პირთან მოლაპარაკებებით გადაცემულ ქონებებზე. ამბობდნენ, ჩვენ მოვალთ და განვიხილავთო და ა. შ. მარტივია _ მოვალთ და განვიხილავთ, მაგრამ ყველა არის ვალდებულებით გადაცემული. თუკი ვერ შეასრულა ვალდებულება, ძალიან მარტივია _ სახელმწიფო არაფერს კარგავს და უკან იბრუნებს ქონებას. შეუძლია ახალ მთავრობას განკარგოს ეს ქონება, როგორც მას სურს.

_ "ტელეარხი 25"-ის წილის გაყიდვასთან დაკავშირებით გქონდათ ინფორმაცია?

_ არა.

_ ერთ ლარად გაყიდული ქონება ახსენეთ. ამაზე დღესაც ბევრს საუბრობენ. ამბობდნენ, რომ ვარშალომიძემ აჭარა გაყიდაო. რა მიზნით ასხვისებდით ქონებას ერთ ლარად?

_ თითოეული ამ ბრალდების უკან ანუ ერთ ლარად გაყიდულ ქონებებში, არის ვალდებულებები. ერთ ლარად გაყიდული ქონების დიდი სიაა, მაგრამ ამ სიაში არის ბევრი ის მოქალაქე, რომელსაც მისივე ქონება დავუკანონეთ. ის დიდი ობიექტები, რომლების გასხვისებაც მოხდა, გასხვისდა იმ კუთხით, რომ ქვეყანაში აშენებულიყო, გახსნილიყო და შექნილიყო საწარმო თუ თუ სხვა ობიექტი, სადაც დასაქმდებოდა ადგილობრივი მოსახლეობა. მე, ნებისმიერ ერთ ლარად გასხვისებული ქონების შესახებ შემიძლია პასუხი გაგცეთ, რატომ და რისთვის მოხდა გასხვისება.

_ სწორედ გასხვისებული ქონების გარშემო ჰქონდათ სამართალდამცავებს კითხვები, როცა დაკითხვაზე დაგიბარეს. როგორ ფიქრობთ, კიდევ მოხდება თქვენი დაკითხვა?

_ თუ ერთი ობიექტის გასხვისებაზე გაუჩნდათ კითხვები, არ გამოვრიცხავ, რომ სხვა ობიექტის გასხვისებაზეც გაუჩნდეთ. ჩვენ თუ გვიბარებენ ძალოვან სტრუქტურებში იმის გამო, რომ ქალაქი და რეგიონი ავაშენეთ, მე მზად ვარ მივიდე ნებისმიერ დროს და ნებისმიერ კითხვას პასუხი გავცე.

_ ბევრს საუბრობდნენ თქვენი ოჯახის ქონების შესახებაც. ამბობენ, რომ თქვენ ძალიან დიდი ქონება ძმასა და მამაზე გაქვთ გაფორმებული და ამ ქონების უკანონობაზე საუბრობენ.

_ ძალიან ბევრი არაა ის შენობა, რომელშიც ვცხოვრობ. თუ კონკრეტულად გაინტერესებთ ამის ფინანსური ანალიზი, შემიძლია წარმოგიდგინოთ ის სახსრები, საიდანაა ეს შეძენილი. აქ დასამალი არაფერია. თუ ამის დადასტურება მოგინდებათ ან მოუნდება ნებისმიერ ორგანოს, ყველას წარვუდგენ.

_ პრეზიდენტმა განაცხადა, რომ ნანობს იმას, რომ ჟურნალისტებთან უფრო ხშირი ურთიერთობა არ მქონდაო. არც თქვენ იყავით ადვილად მისაწვდომი ჟურნალისტებისათვის. რატომ?

_ მე გითხარით უკვე, რომ 9 წლის განმავლობაში პოლიტიკური თანამდებობის პირი ვიყავი, მაგრამ პოლიტიკოსი არ ვიყავი. ყველას უფრო მეტად პოლიტიკური კითხვები ჰქონდა, მაგრამ ჩვენ უფრო მეტად გადართული ვიყავით ინფრასტრუქტურაზე და სამეურნეო საქმიანობაზე.

_ ანუ, თქვენი სურვილი არ იყო აქტიურად გეთანამშრომლათ მედიასთან?

_ შეიძლება, ასეც ითქვას.

_ როგორ წარმოგიდგენიათ ახალ მთავრობასთან თანამშრომლობა, როცა მათ აქვთ თქვენს მიმართ პრეტენზიები?

_ მე ახალ მთავრობას ვურჩევ გადაბრალებას და დაბრალებას დაანებოს თავი. ადგილობრივ მთავრობამ უფრო მეტად იმ დანაპირების შესრულებაზე იზრუნოს, რომელიც მისცა მოსახლეობას. მანდარინის თემა ვახსენე. კარგია, რომ გადაწყდა, თუმცა, დაგვიანებით. დღეს სოფლებში რომ გახვიდეთ, სოფლის ვაუჩერებზე უამრავი კითხვაა; კითხვებია სამუშაო ადგილების შექმნაზეც, დაზღვევის თემაზეც უამრავი კითხვა არსებობს. მე მართლაც ვურჩევდი ხელისუფლებას, რომ ძველების რისხვას ჯობია, საქმე დაიწყონ, ახალი ინვესტორები მოიზიდონ, გარკვეულწილად, არსებული შეინახონ და ახალიც დაამატონ.

_ მას შემდეგ, რაც თავმჯდომარის პოსტი დატოვეთ, რამდენჯერმე პრეზიდენტთან ერთად იყავით სხვადასხვა ობიექტებზე. ამბობენ, რომ თქვენ მთავრობის თავმჯდომარის ამპლუიდან ვერ გამოხვედით. ასეა?

_ გამორიცხულია. პრეზიდენტს ხომ აქვს უფლება, დაათვალიეროს ობიექტები? მასთან ერთად, როგორც უბრალო მოქალაქეს, მეც ხომ მაქვს უფლება ვიარო? მე არც მაქვს პრეტენზია და არც სურვილი, რომ მთავრობის თავმჯდომარის კომპეტენცია გავაგრძელო დღეს. მადლობელი ვარ, რომ მომეცა საშუალება, ვყოფილიყავი აჭარაში მთავრობის თავმჯდომარე და გვეკეთებინა ის დიდი საქმე, რაც ჩვენი ხელისუფლების კეთდებოდა. ჩვენი დანატოვარი არის ის, რაც შესამჩნევია. სანაპირო ზოლზე რომ გახვიდე, ისიც კი საკმარისი იქნება თვალსაჩინოებისთვის. მიხარია, რომ ჩვენს დროს ბათუმი სამჯერ გაიზარდა; დაიწყო ბათუმის და ქობულეთის წყლისა და კანალიზაციის სისტემის რეაბილიტაცია. ვერავინ წარმოიდგენდა, თუ გოდერძის უღელტეხილზე ასეთი კურორტი გაკეთდებოდა _ აჭარას ამის ფუფუნება არ ჰქონდა. მე კარგად მახსოვს, კომუნისტების დროს აჭარა ბოლო ადგილზე იყო და ბოლო 5-6 წლის განმავლობაში ისეთი ნაბიჯი გადადგა, რომ ყველა გაკვირვებულია. ბათუმმა ყველაზე მზარდი, ყველაზე განვითარებადი ქალაქის სტატუსი მიიღო და ამას გაჩერება არ შეიძლება. ნებისმიერი ინვესტორი უყურებს ამ დინამიკას. იმას, რომ 140 მილიონი, რომელიც ბათუმში აღარ დაიხარჯება, პირველ რიგში, ბათუმის მოსახლეობა იგრძნობს _ ამას მე ძალიან განვიცდი. ახლა რაც კეთდება, ძველი, ჩვენი პროექტებია. მაისში, როცა ამ პროექტების ნაწილი დასრულდება, ინვესტორი უკვე დაფიქრდება.

_ სამომავლოდ სად წარმოგიდგენიათ თქვენი თავი _ რომელ პოლიტიკურ თანამდებობაზე?

_ ეს მომავლის საქმეა, მაგრამ, მოდით შევეგუოთ იმას, რომ ქვეყნისთვის კარგი მოხდა _ ქვეყნის ისტორიაში, პირველად გადაეცა ხელისუფლება არჩევნების გზით. რაც მოხდა აჭარაში, სიმბოლურია. მე ვარ აჭარის მთავრობის ერთადერთი თავმჯდომარე, რომელიც არსად არ გაიქცა და საკუთარ ქალაქში ცხოვრობს. მართლაც მიხარია, რომ აქ ვარ ჩემ ხალხთან ერთად. არჩევნები, შეიძლება, წააგო. სამწუხაროა, რომ ბათუმში წავაგეთ. პრეზიდენტმაც აღნიშნა, რომ ამ ქალაქში უდიდესი რაღაცა გაკეთდა, ძირეული გარდაქმნა მოხდა, მაგრამ, სამწუხაროდ, მაინც წავაგეთ. აქედან გამომდინარე, უნდა მივეჩვიოთ, ამ წაგებას. წავაგეთ და უნდა შევეცადოთ, ვიყოთ ოპოზიციაში.

_ ეთანხმებით იმ მოსაზრებას, რომ არჩევანი ბიძინა ივანიშვილსა და მიხეილ სააკაშვილს შორის იყო?

_ ალბათ კი. ძალიან პოლარიზებული იყო ქვეყანა. სახელებიც არ იყო _ იყო "41" და "5".

_ საპრეზიდენტო არჩევნებისთვის ემზადებით? ვინ იქნება თქვენი პარტიის საპრეზიდენტო კანდიდატი?

_ ჯერ არაა ცნობილი, ჯერ მზადებაც არ დაგვიწყია.

_ მანამდე რას აპირებთ?

_ ვაგრძელებთ მუშაობას.

_ პირად ცხოვრებაში რა ხდება? თქვენ არაერთხელ დაგასახელეს სასურველი სასიძოდ.

_ აჰა კიდევ ერთი კაცი (იცინის).

_ პრეზიდენტმაც არაერთხელ მოგცათ რჩევა, დაოჯახებულიყავით.

_ ბევრი რეკომენდაცია მოდის. დამანებე თავი (იცინის)! როგორც კი რამე იქნება, აუცილებლად გეტყვით.

ლევან ვარშალომიძე აჭარის მთავრობის თავმჯდომარედ 2004 წელს პრეზიდენტის წარდგინებით უმაღლეს საბჭომ აირჩია. იგი აჭარის რეგიონს 2012 წლის ოქტომბრის ბოლომდე მართავდა.




 ახალი ამბები
  • გარემოს დანაგვიანებისთვის ჯარიმები იზრდებანარჩენების მართვის სფეროში ჩადენილ გადაცდომებზე ჯარიმები იზრდება.  შესაბამისი ცვლილებების განხორციელება  „ნარჩენების მართვის კოდექსში“ იგეგმება. როგორც კანონპროექტის ინიციატორები განმარტავენ,  არსებული რეგულაციების ფონზე, დამრღვევი პირები არ ერიდებიან დადგენილ ჯარიმებს და ამ პრობლემის აღმოფხვრის ეფექტური გზა დაწესებული ჯარიმების გონივრულ რაოდენობამდე გაზრდაა. რაც შეეხება ჯარიმებს, ცვლილებების მიხედვით, იურიდიული პირი, რომლის საქმიანობის შედეგად, წლის განმავლობაში 400 ტონაზე მეტი ინერტული ნარჩენი ან ნებისმიერი რაოდენობის სახიფათო ნარჩენი წარმოიქმნება, ვალდებული იქნება, შეიმუშაოს კომპანიის ნარჩენების მართვის გეგმა. აღნიშნული ცვლილება მიზნად ისახავს კომპანიის მართვის გეგმის შემუშავების დავალდებულებას პირთა უფრო ფართო წრისთვის.  არსებული რედაქციით, მხოლოდ იმ იურიდიულ პირებს ჰქონდათ კომპანიის ნარჩენების გეგმის წარმოდგენის ვალდებულება, რომლებიც წლის განმავლობაში 1000 ტონაზე მეტ ინერტულ ნარჩენს წარმოქმნიდნენ, წარმოდგენილი რედაქციით კი ეს რაოდენობა  შემცირებულია 400 ტონამდე. კანონპროექტით ორ კგ-მდე მუნიციპალური ნარჩენით გარემოს დანაგვიანებისთვის საცხოვრებელი სახლიდან და სხვა შენობა-ნაგებობიდან გათვალისწინებული ჯარიმის რაოდენობა 100 ლარის ნაცვლად 200 ლარით განისაზღვრება. ორ კგ-მდე მუნიციპალური ნარჩენით გარემოს დანაგვიანება ჩადენილი ავტოსატრანსპორტო საშუალებიდან, ნაცვლად 120 ლარისა, გამოიწვევს მძღოლის, ხოლო საზოგადოებრივი ტრანსპორტის შემთხვევაში – შესაბამისი დამრღვევის დაჯარიმებას 250 ლარის ოდენობით. ხუთ ერთეულამდე საბურავით (გარდა ველოსიპედის საბურავისა) გარემოს დანაგვიანება გამოიწვევს პირის დაჯარიმებას – 150 ლარის ნაცვლად, 500 ლარის ოდენობით. ხუთი ერთეული ან ხუთ ერთეულზე მეტი საბურავით (გარდა ველოსიპედის საბურავისა) გარემოს დანაგვიანება გამოიწვევს პირის დაჯარიმებას – 500 ლარის ნაცვლად, გაოთხმაგებული – 2000 ლარის ოდენობით. ორ კგ-მდე ბატარეის, აკუმულატორის, ელექტრონათურის, ელექტროსაქონლის, გრაფიტის ელექტროდის, ბასრი ან მჩხვლეტავი საგნის (მათ შორის, შუშის ნამსხვრევის, ლურსმნის ან სხვა მსგავსი საგნის) ნარჩენით გარემოს დანაგვიანებისთვის სამართალდამრღვევი პირი, ნაცვლად 100 ლარისა, 500 ლარით დაჯარიმდება. ორ კგ ან ორ კგ-ზე მეტი მუნიციპალური ნარჩენით გარემოს დანაგვიანებისთვის ფიზიკურ პირთათვის განსაზღვრული 150-ლარიანი ჯარიმა 500 ლარამდე იზრდება, ხოლო იურიდიული პირისთვის იგივე ქმედების ჩადენისთვის განისაზღვრება 1500 ლარის ოდენობის ჯარიმა, ნაცვლად 1000 ლარისა. აღნიშნული საკანონმდებლო ინიციატივით,  ერთ მეტრ კუბზე მეტი მოცულობის მუნიციპალური ნარჩენით გარემოს დანაგვიანებისთვის ფიზიკური პირები  300 ლარის ნაცვლად, 1000 ლარით დაჯარიმდებიან, ხოლო იურიდიული პირები 1000 ლარის ნაცვლად, გასამმაგებული ოდენობით – 3000 ლარით. ამავე პროექტით, დიდი მოცულობის ნარჩენით (მათ შორის, სატრანსპორტო საშუალების, ელექტრო- ან ელექტროტექნიკური დანადგარის, სამშენებლო დანადგარის ან სხვა მსგავსი მოწყობილობის) გარემოს დანაგვიანების შემთხვევაში, ფიზიკურ და იურიდიულ პირებს დაეკისრებათ გათვალისწინებულზე ოთხჯერ მეტი ჯარიმა: ფიზიკურ პირს – 2000 ლარის ოდენობით, ხოლო იურიდიულ პირს – 6000 ლარის ოდენობით. ასევე სანქცია წესდება მუნიციპალიტეტის წარმომადგენლობითი ორგანოს აქტით განსაზღვრული ნარჩენების შეგროვების კონტეინერში ნარჩენების არადანიშნულებისამებრ (მათ შორის, მუნიციპალური არასახიფათო ნარჩენების კონტეინერში) მოთავსებისთვის. აღნიშნული ცვლილებით ნარჩენების წარმომქმნელებს ეკრძალებათ კონკრეტულად რომელიმე სახეობის ნარჩენებისთვის გამოყოფილ სათავსში სხვა სახის ნარჩენების განთავსება. ამ შემთხვევაში ჯარიმის ოდენობა ფიზიკური პირისათვის შეადგენს 200 ლარს, ხოლო იურიდიული პირისათვის 1000 ... ...
  • "ქართული ოცნების“ უსუსური მცდელობა ისტორიის გადაწერის"_ აქცია სასამართლოსთანთბილისის საქალაქო სასამართლოსთან „სირცხვილიას“ წევრებმა აქცია გამართეს. საპროტესტო აქცია პოლიტიკური პატიმრებისა და მათი ოჯახის წევრების მხარდასაჭერად გაიმართა. ცნობისთვის, დღეს საქალაქო სასამართლოში იმართება “გავრილოვის პატიმრების” მორიგი პროცესი იმართება. „20 ივნისს დაკავებული მოქალაქეები არიან პოლიტიკური ნიშნით დევნილები. რეალურად ყველასთვის ცნობილია, რომ ეს ადამიანები არანაირ სახელმწიფო გადატრიალებას არ აპირებდნენ, ეს არის „ქართული იცნების“ უსუსური მცდელობა ისტორიის გადაწერის“,_ ამბობენ აქციის ორგანიზატორები. 20 ივნისის საქმეზე დაკავებულები უკვე 8 თვეა წინასწარ პატიმრობაში იმყოფებიან. ევროპარლამენტარებმა 20 ივნისის საქმეზე დაკავებულები პოლიტიკურ პატიმრებად აღიარეს და ხელისუფლებას მათი გათავისუფლებისკენ ... ...
  • მაია მერკვილაძე აჭარის მაუწყებელში რჩებააჭარის საზოგადოებრივი მაუწყებლის საინფორმაციო სამსახურის უფროსის ყოფილმა მოადგილემ და რვასაათიანი გამოშვების რედაქტორმა მაია მერკვილაძემ გადაწყვეტილება მიიღო, ის მზადაა დირექტორის, გიორგი კოხრეიძის შეთავაზებას დათანხმდეს და იყო თოქ-შოუს პროდიუსერი და ასევე რადიოს საინფორმაციო გამოშვების რედაქტორიც. ამის შესახებ განცხადება მაია მერკვილაძემ ტელევიზიის კანცელარიაში უკვე დატოვა. გუშინ ცნობილი გახდა, რომ მაია მერკვილაძეს ამ ეტაპზე არარსებული თოქ-შოუს რედაქტორობას სთავაზობდნენ. ამის შესახებ გიორგი კოხრეიძემ მმართველთა საბჭოს წევრებს განუცხადა. ხელშეკრულებას, რომლითაც მაია მერკვილაძე აჭარის ტელევიზიის საინფორმაციო სამსახურის უფროსის მოადგილე ოთხი წლის განმავლობაში იყო, 24 თებერვალს გაუქმდა. გადაწყვეტილებას მხარი მრჩეველთა საბჭოს სამმა წევრმა დაუჭირა. 19 თებერვალს ტელევიზიის ჟურნალისტების ხმაურიანი პროტესტის ფონზე ტელევიზიაში 4 საშტატო ერთეული გააუქმეს, მათ შორის, ტელევიზიის საინფორმაციო სამსახურის უფროსის მოადგილის. აჭარის ტელევიზიის ჟურნალისტების ნაწილი აცხადებდა, რომ ამ ცვლილებებით რეგიონულ მაუწყებელში სიტყვის თავისუფლებას საფრთხე ემუქრებოდა, რადგან მაია მერკვილაძეს საინფორმაციო პოლიტიკის განსაზღვრის საშუალებას აღარ მისცემდნენ. ეს ეჭვები ნაწილობრივ დადასტურდა, რადგან 24 თებერვალს 18:00 საათზე მაია მერკვილაძემ დირექტორისგან ელექტრონული ფოსტით მიიღო ახალი სახელშეკრულებო შეთავაზება: წინასაარჩევნო დებატების რედაქტორის პოზიციაზე, ან აჭარის რადიოს საინფორმაციო სამსახურის რედაქტორის პოსტზე. აჭარის საზოგადოებრივი მაუწყებლის ალტერნატიული პროფკავშირი საგაფიცვო რეჟიმზე გადასვლას გეგმავს. ამის შესახებ განცხადება,  მაუწყებლის პროფკავშირის წარმომადგენლებმა განაცხადეს. წყარო: ... ...
  • საბჭოთა ოკუპაციის დღესთან დაკავშირებით, პარლამენტის შენობაზე სახელმწიფო დროშა დაეშვასაბჭოთა ოკუპაციის დღესთან დაკავშირებით, პარლამენტის შენობაზე სახელმწიფო დროშა დაეშვა. საქართველოს პარლამენტის 2010 წლის 21 ივლისის დადგენილების თანახმად, 25 თებერვალი საბჭოთა ოკუპაციის დღედ არის გამოცხადებული. ოკუპაციის ასეულათასობით მსხვერპლთა პატივსაცემად, ამ დღეს საქართველოს მთელ ტერიტორიაზე სახელმწიფო დროშები ეშვება. 1921 წლის 25 თებერვალს, რუსეთის წითელმა არმიამ თბილისი აიღო და საქართველოს საყოველთაო და თავისუფალი არჩევნების გზით არჩეული ხელისუფლება დაამხო, რის შედეგადაც განახორციელა საერთაშორისო სამართლის სუბიექტის – საქართველოს დემოკრატიული რესპუბლიკის ანექსია. ... ...
  • გურიაში ადმინისტრაციულ შენობებზე სახელმწიფო დროშა დაეშვასაბჭოთა ოკუპაციის დღესთან დაკავშირებით, გურიის რეგიონში შემავალი მუნიციპალიტეტების ადმინისტრაციულ შენობებზე, სახელმწიფო დროშა დაეშვა. 1921 წლის 25 თებერვალს, რუსეთის წითელი არმია საქართველოს ტერიტორიაზე შემოიჭრა და ქვეყნის ოკუპაცია განახორციელა. საქართველოს პარლამენტის 2010 წლის 21 ივლისის დადგენილების თანახმად, 25 თებერვალი საბჭოთა ოკუპაციის დღედ არის გამოცხადებული. ამ დღეს ქვეყნის მთელ ტერიტორიაზე სახელმწიფო დროშები ეშვება. ... ...

არქივი

ზაფრანი

„დავიწყებული“ ჰოლივუდელები

ჯესიკა ალბა ჯესიკა ალბას გარღვევად...

როდის გრძნობთ თავს ყველაზე კარგად

ზამთარი – მშვილდოსნის, კუროსა და...

ქალი, ბიზნესი … ასტროლოგია

ქალწული - ზოდიაქოს კიდევე რთი...

15 შეცდომა რეცხვის დროს, რომელიც სარეცხს და მანქანას აზიანებს

ხშირად ვამბობთ, რომ ტანსაცმელს აფუჭებს...

რატომ უნდა მიირთვათ ბევრი შოკოლადი

შოკოლადის მირთმევის შედეგად ადამიანის ბედნიერების...

ჰოლივუდელი მარტოხელა მამები

ალ პაჩინო - მსახიობი სამი...
კარმიდამო ჩემი

საკურა_ იაპონიაში გაზაფხულის სიმბოლო, მალე სამტრედიაშიც აყვავდება

საკურა-იაპონიაში გაზაფხულის სიმბოლო, ულამაზესი ალუბლის...

ფუტკრის რძე _ ოცდამეერთე საუკუნის ჯადოსნური წამალი

საქართველოს ბუნება ყოველგვარ პირობას ქმნის...

როგორ დავიბრუნოთ ფუტკრის მართვე

გაზაფხულის მოახლოებისთანავე ნებისმიერმა მეფუტკრემ თუ...

მსხვილნაყოფა ციტრუსი _ "ოიუ" (Citrus Oiu)

საქართველოს მოსახლეობისთვის ციტრუსოვანი კულტურებიდან ყველაზე...

"გვაქვს უთვალავი ფერითა!"

ოზურგეთელი, პროფესიით ფარმაცევტი და ხელოვანი...

"დეკემბერა" საოცარი საშობაო ყვავილია

ალბათ, არც ერთი ყვავილის შესახებ...

როგორია ტყის მარწყვი და რა სასარგებლო თვისებები გააჩნია

გაზაფხულის დადგომისთანავე, ადამიანებს უდიდესი სურვილი...

პროდუქტები, რომელიც საუზმეზე არ უნდა მიირთვათ

დიეტოლოგებმა შეადგინეს პროდუქტების სია, რომელიც...

როგორ გაისუფთავონ ფილტვები მწეველებმა

ცოტა ხნის წინ ბრიტანულ მასმედიაში...

შქმერული

დღეს ერთ-ერთი საუკეთესო ქართული კერძის...

"მოხრაკულა" დილით განსაკუთრებით საამოა

„მოხრაკულა“ _ ერთერთი ძველი ქართული...