ევროსასამართლოში საქართველოს წინააღმდეგ, შესაძლოა, ლისის ტბის საქმე წავიდეს

gurianews.com

მთავარი თემა

ევროსასამართლოში საქართველოს წინააღმდეგ, შესაძლოა, ლისის ტბის საქმე წავიდეს

2017 აგვ 10 09:31:45

ქონებაჩამორთმეული ბიზნესმენი რამაზ ახვლედიანი საკუთარი უფლებების აღდგენას, გამოძიების პროცესის დროულად დასრულებას და მის დაზარალებულად ცნობას ითხოვს. საქმე თბილისში, 2004 წელს ეკონომიკის სამინისტროსგან გამოსყიდულ, ლისის ტბის მიმდებარე ტერიტორიაზე  არსებულ მიწის ნაკვეთს და მასზე დამაგრებულ შენობა-ნაგებობებს ეხება, რომელიც 2006 წელს, სახელმწიფოს მხრიდან ზეწოლის შედეგად, ბიზნესმენმა ყოველგვარი კომპენსაციის გარეშე, სახელმწიფოს სასარგებლოდ დათმო.

აღნიშნულთან დაკავშირებით საქმეს 2012 წლიდან  საქართველოს მთავარი პროკურატურა იძიებს. თუმცა, ამ დრომდე არც ძიება დასრულებულა და  არც რამაზ ახვლედიანია დაზარალებულად ცნობილი. 2015 წლიდან  კი, გამოძიების პარალელურად, სასამართლო პროცესები მიმდინარეობს.

რას ითხოვს ბიზნესმენი სახელმწიფოსგან, ვის ინტერესებზე საუბრობს საკუთარი ქონების იძულებით დათმობის საქმეში და რა გარიგებაზე შეიძლება წავიდეს ის სახელმწიფოსთან, _ ამ და სხვა საკითხებზე „გურია ნიუსი“ რამაზ ახვლედიანს ესაუბრა:

_ბატონო რამაზ, ბოლო ინფორმაციით რომ დავიწყოთ, ცოტა ხნის წინ  შეხვედრა გქონდათ მთავარი პროკურატურის გამომძიებელთან, რომელიც თქვენს საქმეს იძიებს. რა ინფორმაცია მოგაწოდეს, რა ეტაპზეა გამოძიება?

_პროკურატურასთან ბოლოს შეხვედრა რამდენიმე კვირის წინ გვქონდა მე და ჩემს ადვოკატს, არჩილ კაიკაციშვილს. ვისაუბრეთ ჩემის საქმის შესახებ, მაგრამ არაფერში წინ წასვლა არ ჩანს. ჩემს შეკითხვაზე თუ რატომ არ იბარებენ იმ მხარეს, რომელმაც უშუალო ზეწოლა განახორციელა ჩემზე  მითხრეს, რომ საქმეს ჯერ კიდევ სწავლობენ  და გარემოებებიდან გამომდინარე შემდგომში აპირებენ მათ დაკითხვას. ამასობაში კი წლები გადის. ჯერ კიდევ  2012-ში მივმართე პროკურატურას გამოძიების დაწყების მოთხოვნით. მოგვიანებით საქმე შეწყვიტეს, თუმცა, 2015 წელს ისევ განაახლეს და ახლა სამართალწარმოების პროცესში ჩადენილი დანაშაულების გამოძიების დეპარტამენტი სწავლობს. თუმცა, გამოძიების ასეთი ნელი ტემპი ნამდვილად არ მაკმაყოფილებს. ჩემი ერთადერთი მოთხოვნაა, გაირკვეს, ვარ თუ არა დაზარალებული.

_საქმის მოწმეების ნაწილი ხომ უკვე დაკითხული ჰყავს პროკურატურას?

_დიახ,  ქონების დათმობის მიზნით ჩემზე ზეწოლა, რომ ხორციელდებოდა ჩემი ახლობლებისა და მეგობრების გარდა იცოდა ყველამ,  ვიმეორებ, ჩვენს ოფისში ფინანსურ პოლიციის მხრიდან   ქონების დათმობის მიზნით ჩემზე ზეწოლა რომ  ხორციელდებოდა  იცოდა ყველამ დამლაგებლიდან დაწყებული  მამუკა ხაზარაძით დამთავრებული. ყველა საქმის კურსში იყო, რომ  მე ფინანსურ პოლიციაში მთხოვდნენ ქონების დათმობას. ზეწოლის ფორმები იყო მრავალგვარი, ამასთან ერთად დიდი უყო  შიში იმისა, რომ ფინანსური პოლიციის შენობიდან   გარეთ გამოსულს,  შანტაჟის მიზნით არ მოეწყოთ რაიმე სახის პროვოკაცია, ამიტომ ჩემი მეგობრები მუდამ მეთვალყურეობდნენ ჩემს მანქანას, რომ თუ ვინმე უცხო მიუახლოვდებოდა  დაეფიქსირებინათ ფაქტი. სწორედ  ასეთი მეთვალყურეობის დროს 2006წ 4 ნოემბერს, შაბათ დღეს,  გვიან ღამით, ერთი თავად შეესწრო ფაქტს, როგორ გამომიყვანეს ფინანსური პოლიციის შენობიდან მათივე სამსახურეობრივი მანქანით, წამიყვანეს ვაკეში ციური ბრიძის ბიუროში და საიდანაც დამაბრუნეს ისევ ფინანსურში. ასევე დაკითხულია რამდენიმე თანამშრომელი, მათ შორის  სს“ ლისის ტბა“ -ს დირექტორი რუსუდან ფანცულაია, ასევე დაკითხულია ნოტარიუსი ციური ბერიძე, რომელმაც ნოტარიულად დაამოწმა  ჩემს  მიერ ფინანსურ პოლიციაში დაწერილი განცხადება- ქონების დათმობის შესახებ, მაგრამ ეს არა არის საკმარისი. პირველ რიგში ვითხოვ ფინანსური პოლოციის იმ თანამშრომლების დაკითხვას რომლებიც უშუალო ზეწოლას ახორციელებდნენ ჩემზე. ამასთან, ვითხოვ ჩვენს ოფისში მომუშავე იმ ადამიანების დაკითხვას, რომლებთანაც მნიშვნელოვანი ინფორმაციის მიწოდება შეუძლიათ აღნიშნულ საქმესთან დაკავშირებით, მათ შორის ერთ -ერთი მთავარი ფიგურაა, ჩემი ყოფილი ბიზნესპარტნიორი, ბატონი მამუკა ხაზარაძეა.

_იცით რა შინაარსის ჩვენებები აქვთ მიცემული დაკითხულ პირებს?

_ პროკურატურამ მათი მონათხრობის შინაარსი არ გამიმხილა. არც მე და არც ჩემს ადვოკატებს არ გვეუბნებიან რას ამბობენ დაკითხული მოწმეები. გარდა ამისა, ბერიძის დაკითხვიდან რამდენიმე თვეა გასული და ჯერჯერობით არ გვაქვს პასუხი რატომ არ დაკითხა პროკურატურამ მის გარდა სხვა ვინმე. მე  არც არავის დაჭერას და არც ვინმეს დასჯას  ვითხოვ, უბრალოდ ვითხოვ, რომ  მათ აღიარონ სიმართლე და დაადასტურონ რომ მე,  2006 წლის 4 ნოემბერს, შაბათ დღეს,  არც  ფინანსური პოლიციის შენობა და არც ბერიძის სანოტარო „კანტორა“  შტურმით არ ამიღია სახელმწიფოსთვის ქონების უკან დაბრუნების მიზნით.  აუცილებლად  უნდა დაკითხნონ  ჩემი ყოფილი პარტნიორი ბატონი მამუკა ხაზარაძე,   სს“ ლისის ტბა’ -ს დირექტორი რუსუდან ფანცულაია, GRDC - ის ყოფილი დირექტორი  ირაკლი კილაურიძე, ფინანსური მენეჯერები და სხვა პირები რომ მათ დაადასტურონ ის, რაც იციან. ელემენტარული მაინც უნდა დააფიქსირონ, ვიყავით თუ არა ჩვენ პარტნიორები, რატომ გამოსცა პრეზიდენტმა  განკარგულება, გვქონდა თუ არა თანხები ლისის ტბის განვითარებისთვის, როგორ ვაპირებდით ბიზნესის გაფართოებას და ა.შ. აქედან  გამომდინარე მერე პროკურორმა თვითონ უნდა დაადგინოს, მაშინ რა მაიძულებდა მე, რომ დამენგრია  აწყობილი ბიზნესი, რომლის დამფინანსებლები იქნებოდნენ  I F C , (საერთაშორისო ფინანსური კორპორაცია - მსოფლიო  ბანკის  ჯგუფი)   E B R D (ევროპის რეკონსტრუქციისა და განითარების  ბანკი)  T.B.C.  ბანკი,  G R D C (საქართველოს რეკონსტრუქციისა და განვითარების კომპანია)  და  სხვები.   ასევე ჩვენი სააქციო საზოგადოების წევრები  დაინტერესებულები იყვნენ ლისის ტბის განვითარებით და გარკვეული ინვესტიციების ჩადებასაც  გეგმავდნენ, რატომ მივატოვე ასე მოულოდნელად და დავთმე ქონება სახელმწიფოს სასარგებლოდ?! თუ ჩვენ არაფერს ვაკეთებდით, მაშინ რატომ გვყავდა უცხოელი თანამშრომლები? მაგალითად რუსუდან ფანცულაიას შემდეგ დირექტორი ბატონი ფილიპსონი? ლისის ტბის ეკოლოგიის და პროექტირების კუთხით რატომ ჩამოგვყავდა თანამშრომლები საზღვარგარეთიდან? თითქმის ბოლომდე  მიყვანილი საქმე და  ლისი ტბის განვითარებისთვის დახარჯული რამდენიმე მილიონი    აქედან გამომდინარე რატომ უნდა მომდომებოდა, რომ ყველასგან ფარულად, ისე, რომ ჩემი პარტნიორებისთვისაც არ შემეტყობინებინა, მათთვის არ შემეთავაზებინა ჩემი აქციები და  ქონება სახელმწიფოს სასარგებლოდ დამეთმო?!  ამას ხომ კანონმდებლობაც ითვალიწინებდა?  პროკურატურას ვთხოვე, ამოეღოთ სატელეფონო ანძების ამონაწერები, ამით ადვილად დადასტურდება თუ  სად ვიყავი 2006 წლის 4 ნოემბერს და რა ტერიტორიაზე გადავადგილდებოდი;  შეგვიძლია ვთქვათ, რომ პროკურატურა სამწუხაროდ, ძალიან ნელა მუშაობს.

_ერთია პროკურატურის გამოძიება და მეორე, დავები, რომელიც სასამართლოში მიმდინარეობს. თქვენ იქაც ითხოვდით თქვენი პარტნიორების, მათ შორის მამუკა ხაზარაძის დაკითხვას. თუმცა არცერთი თქვენი მოთხოვნა სასამართლოს ამ შემთხვევაში არ დაუკმაყოფილებია. რა იყო ამის მიზეზი, მამუკა ხაზარაძის ფიგურა, თუ სხვა რამ?

_კანონის წინაშე ყველა თანაბარი უნდა ვიყოთ... როცა ამერიკის პრეზიდენტს და სხვა ქვეყნის მაღალჩინოსნებსა თუ ბიზნესმენს  იბარებენ პროკურატურაში ან სასამართლოში, ის მიდის საგამოძიებო უწყებაში, არა მგონია,  ბატონი ხაზარაძე, ვერ  დაიბარონ და ვერ  დაუსვან შეკითხვები რაც მათ აინტერესებთ. უბრალოდ  ნება არ არსებობს.

_სასამართლო პროცესებს როგორ შეაფასებთ? რამდენად ობიექტურად იმსჯელეს მოსამართლეებმა?

_შეფასებამდე გეტყვით, რომ კიდევ ერთი სასამართლო პროცესისთვის ვემზადებით. სააქციო საზოგადოების კანონი და წესდება განსაზღვრავს, რომ წელიწადში ერთხელ, როგორც მსხვილ აქციონერს წარმომიდგინონ ფინანსურ ბრუნვასთან დაკავშირებული ყველანაირი დოკუმენტი, რაც წლების განმავლობაში, მოთხოვნის მიუხედავად არ მიმიღია. მამუკა ხაზარაძეს, რომელსაც პროკურატურაში ვერ თუ არ იბარებენ, მოვითხოვე, რომ ჩემთვის 2005 წლიდან, სააქციო საზოგადოების დაარსებიდან დღემდე, გამოეგზავნა საბანკო ბრუნვები და ბალანსები, სადაც ნათლად გამოჩნდებოდა ჩვენი ხარჯებიც და შესაძლებლობებიც და რაც სასამართლო პროცესზე გამოაჩენდა რომ იმ პერიოდში ჩვენ ნამდვილად ვაკეთებდით საქმეს; დაადასტურებდა ჩემს სიმართლეს და წაადგებოდა სამართლიანობის აღდგენის საქმეს; რაზეც  ხაზარაძე და სააქციო საზოგადოება ჯერჯერობით დუმან. უკვე ორჯერ მოვთხოვეთ ეს დოკუმენტები. პირველი წერილი რამდენიმე თვის წინ გავუგზავნეთ, პასუხი რომ ვერ მივიღეთ მეორე წერილი გავუგზავნეთ და ისევ არ გამოგვხმაურებია. ახლა უკვე  კანონის  მიხედვით  ვეცდებით ამ დოკუმენტაციის მიიღებას.

რაც შეეხება სხვა სასამართლო პროცესებს, გაოცებული ვარ. მოსამართლეები არც საქმიდან გამომდინარე მსჯელობენ და არც აინტერესებთ ადამიანების ბედი. თითოეული საკითხი და დღე ჩემთვის გადამწყვეტი იყო. რამდენიმეწლიანი სიარულის შემდეგ, სადაც პრეზიდენტის იმ განკარგულების გაუქმებას ვითხოვდი, რითაც მე ქონება ჩამომერთვა, სასამართლოდან უარყოფითი პასუხი მივიღე. მიუხედავად იმისა, რომ მოსამართლემ ძალიან კარგად იცოდა, რომ პრეზიდენტის ადმინისტრაციაში არც მომზადებულა ეს ბრძანებულება და ქალაქის მერიამ გადაუგზავნა. გარდა ამისა, განცხადებაში, რომელიც მე ფინანსურ პოლიციაში დამაწერინეს მეწერა, რომ  ვითხოვდი ქონების უკან დაბრუნებას და შესაბამის კომპენსაციას. არც ქონება გადაუბარებიათ და არც კომპენსაცია მოუციათ. სად არის მიღება - ჩაბარების ნოტარიულად დამოწმებული აქტები? სად არის  კომპენსაცია? ძალიან ბევრი პროცესუალური დარღვევაა ამ საქმეში. მაგალითად ის, რომ მაშინ მაიძულეს, განცხადება მთავრობის და მაშინდელი თბილისის მერის, გიგი უგულავას სახელზე დამეწერა. ვიკითხე კიდეც, მერის სახელზე რატომ მაწერინებთ-მეთქი, მაგრამ რაც მითხრეს, ის დავწერე. იბადება კითხვა: რა ვალდებულება ვერ შევასრულე ან და ვის წინაშე და რატომ ვამბობდი ამხელა ქონებაზე უარს? ძალიან სამწუხაროა, მაგრამ უნდა ვთქვა, დღევანდელი სასამართლო „აპრავევებს“ 2004-2012 წლებში ჩადენილი სისტემური დანაშაულებების შედეგებს. დოკუმენტაციები, საიდანაც მტკიცდებოდა, რომ მე იძულებით მომაწერინეს ხელი დათმობაზე, რომ სახელმწიფოს წინაშე ყველა ვალდებულება შესრულებული მქონდა და ასე შემდეგ, ყველაფერი ჰქონდა მოსამართლე  დიანა ფარქოსაძეს.  სასამართლო სხდომაზე მოპასუხე მხრიდან 2004- 2012წწ სისტემურ დანაშაულობების არსებობის შესახებ იმ ფრაზამაც კი გაიჟღერა, რომ ამ საკითხთან დაკავშირებით ერთი დამნაშავე მაინც გვაჩვენეთ დასჯილი იმ ხალხიდან, ვინც ხალხს ქონებებს ართმევდაო. რადგან დასჯილი არავინაა, მაშინ 2004-დან 2012-მდე სისტემური დანაშაულები არ იყოო, რომ ეს ყველაფერი იყო მითები და არა რეალობა... ამჟამად სააპელაციო სასამართლოს გადაწყვეტილებას ველოდები. სხდომა 10 ოქტომბერსაა ჩანიშნული.

_თქვენ წეღან ისაუბრეთ, რომ დოკუმენტაცია, რომელიც კანონის შესაბამისად  ს.ს „ლისის ტბა“- უნდა გადმოგცეს ვერ იღებთ. საერთოდ მამუკა ხაზარაძესთან კომუნიკაციაზე რას იტყვით? დაინტერესდა ის, რატომ დაწერეთ ეს განცხადება და რატომ ჩააგდეთ საფრთხეში საერთო ბიზნესი?

_არანაირი კომუნიკაცია არ გვქონია. არადა, მან ძალიან კარგად იცის, რომ ლისის ტბა ჩემი გადარჩენილია, რომ ლისის ტბის  მიმდებარე ტერიტორიის გადარჩენისა და განვითარების პროექტი ჩემი შექმნილია. მამუკა ხაზარაძე და სხვა ჩემს ყოფილ პარტნიორები საერთოდ არ არის დაინტერესებული ჩემთან შეხვედრით. არცკი უკითხავთ, რატომ დავწერე ეს განცხადება 2006 წელს. მანამდე, როდესაც ჩემზე ფინანსურ პოლიციაში დაიწყო საქმისწარმოება, შევხვდი მამუკას და ვუთხარი რომ საქმე ძალიან რთულად არის, თუ ერთობლივი ბიზნესი გვაქვს ერთად მოვიფიქროთ რა გავაკეთოთ-თქო. უცხოელი ადვოკატის აყვანაზეც კი ვფიქრობდი. მაშინ მიკიბულ-მოკიბული ლაპარაკი ჰქონდა და მივხვდი, რომ საქმე ისე არ იყო როგორც უნდა ყოფილიყო. ამ შეხვედრაზე  მითხრეს, „კონსტიტუცია დაგიცავსო“. სულ ეს იყო ჩვენი საუბარი, ამის შემდეგ ზეწოლაც გაძლიერდა და განცხადებაც დამაწერინეს იძულებით.

_გარდა იმისა, რომ თქვენ პრეზიდენტის 2006 წელს გამოცემული განკარგულების გაუქმებს ითხოვთ, გაქვთ კიდევ ერთი სასამართლო დავა, რომელიც ლისის ტბაზე წყალსარგებლობის ლიცენზიის საკითხს ეხება. ლისის ტბა, თავისი ფუნქციური დატვირთვიდან გამომდინარე წყალსარგებლობის გარეშე წარმოუდგენელია. უფრო დეტალურად რომ  გვითხრათ რა დავაა და რას ეხება?

_ეს ეხება შ.პ.ს, „ტურისტულ გამაჯანსაღებელ კომპლექს ლისის ტბას“. რომელიც 100% წილით ჩემი დაფუძნებული იყო და  ფლობდა წყალსარგებლობის ლიცენზიას ლისის ტბაზე. სააქციო საზოგადოება „ლისის ტბა“- ს შექმნის პროცესში,  ხაზარაძემ  დააყენა საკითხი,  რომ რადგან  ჩვენ, როგორც პარტნიორები  ლისის ტბის მიმდებარე ტერიტორიის განაშენიანების პროექტზე ვიწყებდით ერთობლივ საქმიანობას, ლისის ტბის  წყალსარგებლობაზე  გაცემული  ლიცენზიის პირობებით  ერთობლივად გვესარგებლა.  რაზეც შევთანხმდით.  თუმცა, წინასწარ განზრახულობათა ოქმში, ერთ-ერთ პუნქტად  მაინც ჩაიწერა რომ თუ რაიმე მიზეზების გამო ჩვენი  პარტნიორობა ვერ შედგებოდა მაშინ  ხაზარაძის დასახელებული კომპანია გადიოდა შ.პ.ს-დან და უკან აბრუნებდა წილს, რომელიც მე მას გადავეცი.  2012წ არჩევნების შემდგომ დავიწყე ბრძოლა სამართლიანობის აღდგენის კუთხითა და შემდგომში კომპენსაციის მოთხოვნის მიზნით,  შევიტანე პროკურატურაში სარჩელი და დავიწყე  დოკუმენტების შეგროვება და შესაბამისი ნაბიჯების გადადგმა. ერთ -ერთი იყო  წილის აღდგენა ჩემს საკუთარ კომპანიაში და რადგან მქონდა იმედი ბატონი ხაზარაძის  თანადგომისა ამ საკითხში, ვთხოვე მამუკა ხაზარაძეს რომ დაებრუნებინათ ჩემთვის შესაბამისი წილი მაგრამ მიუხედავად განზრახულობათა ოქმში  ჩანაწერისა, მომივიდა პასუხი, რომ ხანდაზმულობის ვდის გასვლის გამო, ლისის ტბის წილს არ უნდა დამიბრუნდნენ. თუმცა, განზრახულობათა ოქმში არანაირ ვადებზე საუბარი არ არის. ამ საკითხზე სასამართლოში სარჩელი  2015 წლის 13 თებერვალს შევიტანეთ. იმის შემდეგ თითქმის სამი წელი გავიდა, სამი მოსამართლე შეიცვალა და ერთი მოსამზადებელი სხდომაც არ დანიშნულა.

_ბატონო რამაზ, გასაგებია, რომ სამართლიანობის აღდგენას ითხოვთ. მაგრამ რა შეთანხმებაზე შეიძლება წახვიდეთ სახელმწიფოსთან იმ შემთხვევაში, თუ თქვენ დაზარალებულად გცნობენ?

_რომელიც 2006 წლის  4 ნოემბერს  დამაწერინეს განცხადება ფინანსურ პოლიციაში ქონებაზე უარის თქმის შესახებ, სხვა პირრობებთან ერთად მაქვს ჩაწერილი, „გთხოვთ დაიბრუნოთ ჩემს მიერ ეკონომიკის სამინისტროდან გამოსყიდული შენობა-ნაგებობები და  მომცეთ კომპენსაცია“. როგორც ზემოთ მოგახსენეთ, ამ განცხადების შემდეგ, უნდა შექმნილიყო კომისია, აღწერილიყო  ქონება, მოეცათ ჩემთვის შესაბამის კომპენსაცია  და უკან აეყვანა ბალანსზე ეკონომიკის სამინისტროს. კანონით და წესით ასე უნდა მომხდარიყო, თუმცა არც კომისია შექმნილა და არც მიღება-ჩაბარების აქტი შეუდგენია ვინმეს და არც კომპენსაცია მოუციათ. 2006 წლის 4 ნოემბერს განცხადება დამაწერინეს, 4 დღეში, 8 ნოემბერს კი პრეზიდენტმა განკარგულება გამოსცა და ქონება ჩამომართვა. ამ ოთხ დღეში ყველა პროცედურა გავლილი უნდა ყოფილიყო. მათ შორის რომ ჩემთვის კომპენსაციაც უნდა გადაეხადათ. რადგან ჩემი პირობა იყო მოთხოვნიანი. არად, აუქციონში გამარჯვების შემდგომ ჩემსა და ეკონომიკის სამინისტროს დადებულ ხელშეკრულებაში თეთრით შავზე წერია, რომ თანხის სრულად გადახდისა და შესაბამისი შედარების აქტის გაფორმების შემდგომ  ხელშეკრულებით გათვალისწინებული ქონება გადმოდიოდა ჩემს, ანუ გამარჯვებული პირის საკუთრებაში.

_გამოდის, რომ ეკონომიკის სამინისტროს არცკი გადაუბარებია ქონება ისე გადაუფორმეს თქვენს პარტნიორს?

_დიახ. თქვენ სწორად აღნიშნეთ, დღეს ის ქონება რომელიც სახელმწიფოს ჩემგან არ გადაუბარებია და მე არ მიმიღია შესაბამისი კომპენსაცია, ანუ ჩემს მიერ ეკონომიკის სამინისტროსგან გამოსყიდული  ქონება, რაღაც მექანიზმებით პრეზიდენტ მიხეილ სააკაშვილის განკარგულებით გადაეცა  საკუთრებაში  „ლისი ლეიქ დეველოპმენტი“ს  , რომელიც  წარმოადგენს ჩემი მაშინდელი პარტნიორის  ბატონი მამუკა ხაზარაძის და არა მარტო მისი   საკუთრებას.  მაქვს  ძალიან ბევრი კითხვა, რაზეც პაუხს  ჯერჯერობით  ვერ ვიღებ.

_რამდენი შეიძლება იყოს საკომპენსაციო თანხა?

_ძალიან ძნელია ახლა ამაზე საუბარი, როდესაც დაზარალებულად მცნობენ, საერთაშორისო აუდიტებს ავიყვან. შეისწავლიან საკითხს და რასაც ისინი იტყვიან, იმ თანხას წარვუდგენ ეკონომიკის სამინისტროს და სახელმწიფოს.

_იმ შემთხვევაში თუ ეროვნულ დონეზე, სასამართლოებმა თქვენს წინააღმდეგ მიიღეს გადაწყვეტილებები, რა გეგმა გაქვთ?

_ძალიან არ მინდა  გაიჟღეროს და გავრცელდეს ფრაზა ახვლედიანი საქართველოს წინააღმდეგ.  მაგრამ სხვა გზა თუ არ დამიტოვეს, საქმეს სტრასბურგში გავგზავნი.  ვიმეორებ, ძალიან არ მინდა, მაგრამ სხვა გზა არ მრჩება.

 

ამავე თემაზე:

შუაღამისას „საკუთარი ნებით დათმობილი" ქონება, ანუ როგორ დაკარგა ბიზნესმენმა „ლისის ტბა“ - ნაწილი I

რატომ არ მიიღო მტკიცებულებად სასამართლომ კეზერაშვილის მოადგილის კაბინეტში ქონების დათმობაზე დაწერილი განცხადება

მაღალჩინოსნები და ბიზნესმენები დასაკითხ პირთა სიაში _ რა ეტაპზეა ლისის ტბის საქმის გამოძიება

უპასუხო კითხვები ლისის ტბის საქმეში

ლისის ტბის ყოფილი მეპატრონე ბიზნეს-პარტნიორის დაკითხავს ითხოვს

როგორ აღმოჩნდა ყოფილი მფლობელისთვის წართმეული ლისის ტბა მამუკა ხაზარაძის საკუთრებაში

ლისის ტბის საქმეზე პროკურატურამ მნიშვნელოვანი მოწმე დაკითხა

რა ახალი მტკიცებულებები დაურთო სასამართლომ ლისის ტბის წართმევის საქმეს

რა ახალი მტკიცებულებები დაურთო სასამართლომ ლისის ტბის წართმევის საქმეს

 


ნახვა: 357


 ახალი ამბები
  • ევროპულმა საქართველომ პრეზიდენტობის კანდიდატი დაასახელაევროპულმა საქართველომ პრეზიდენტობის კანდიდატად დავით ბაქრაძე დაასახელა. საპრეზიდენტო კანდიდატი საზოგადოებას პარტიის ერთ-ერთმა ლიდერმა, გიგი უგულავამ, ქუთაისში წარუდგინა. „საზოგადოება არის გახლეჩილი, სამწუხაროდ, საზოგადოება არის დაპირისპირებული. ამიტომ, ყველაზე მეტად ამ ქვეყანას დღეს სჭირდება გამაერთიანებელი პრეზიდენტი, პრეზიდენტი, რომელიც საზოგადოებას დაანახებს პერსპექტივას, პრეზიდენტი, რომელიც საზოგადოებას დაანახებს და დაარწმუნებს, რომ ხვალინდელი დღე არის საიმედო,“ - განაცხადა ... ...
  • ზაზა სარალიძე: პროკურატურა ისევ ცდილობს მკვლელებს ხელი დააფაროს„სამართალდამცავთა რეფორმირების ცენტრის“ ხელმძღვანელმა ზვიად კუპრავამ ზაზა სარალიძესთან ერთად დღეს პრესკონფერენცია გამართა, რომლის ფარლგებშიც ზაზა სარალიძემ მისი შვილის მკვლელობის საქმის მიმდინარეობაზე ისაუბრა. მისი თქმით, ბრძოლაა საჭირო, რათა მომავალმა თაობამ სამართლიან ქვეყანაში იცხოვროს. „მკვლელები ისევ გარეთ დადიან. პირდაპირ შემიძლია ვთქვა, რომ დღევანდელი მონაცემებითაც პროკურატურა ისევ ცდილობს, ჩემი შვილის მკვლელებს ხელი დააფაროს. ჩვენ დიდი ხნის წინ გადავწყვიტეთ, რომ ყველა იმ ადამიანს დავუდგეთ გვერდით, ვინც უსამართლობის შეგრძნებით ცხოვრობს და რომელთა განადგურებასაც სისტემა მაქსიმალურად ეცადა. ყველაფერს გავაკეთებთ იმისთვის, რომ საქართველოში სამართლიანობა აღდგეს. მართალია, ჩემს შვილს ვერ გავაცოცხლებ, ვერც ერთის შვილს ვერ გავაცოცხლებ, მაგრამ მე მეორე შვილიც მყავს, ჩვენ გვყავს მომავალი თაობა, ვის გამოც უნდა ვიბრძოლოთ, რათა სამართლიან ქვეყანაში იცხოვრონ“, - განაცხადა ზაზა სარალიძემ. ხორავას ქუჩაზე მოზარდების მკვლელობის საქმეზე გამოძიებას ხელახლა აწარმოებს შინაგან საქმეთა სამინისტრო.  სასამართლოს პარალელურად, დროებითმა საპარლამენტო საგამოძიებო კომისიამ 17 ივლისს არასრულწლოვანი მოწმე გამოკითხა. მოწმეთა დაკითხვა გრძელდება. 12 ივლისს ცნობილი გახდა, რომ დროებითი საგამოძიებო საპარლამენტო კომისია ხორავას ქუჩის საქმის გამოძიების ფარგლებში გამოკითხვების დასრულებას ივლისის ბოლოს გეგმავს, დასკვნის გამოქვეყნებას კი, აგვისტოს ბოლოს ან სექტემბრის დასაწყისში. ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა. წყარო: ... ...
  • პროკურატურა ეკონომიკის სამინისტროს საქმიანობით ინტერესდება - ახალი დეტალებიცნობილი ხდება ის დოკუმენტაციაც, რომელიც სამინისტროდან საგამოძიებო უწყებამაც გამოითხოვა. ირკვევა, რომ პროკურატურა იმ მასალებით დაინტერესდა, რომელიც ტირპარკების მოწყობას და ტექდათვალიერებას ეხება. ასევე, საგამოძიებო უწყებას აინტერესებს აკრედიტაციის ეროვნული ორგანოს - ერთიანი აკრედიტაციის ცენტრიდან ავტოსატრანსპორტო საშუალებების გზისთვის ვარგისობაზე სავალდებულო პერიოდული ტესტირების სისტემის ამოქმედებასთან, ტესტირების ცენტრების აკრედიტაციის გაცემასთან დაკავშირებული ინტერესთა გამოხატვის გამოცხადებისა და შემაჯამებელი შედეგების ამსახველი სრული დოკუმენტაციაც. ეკონომიკის სამინისტროში განმარტავენ, რომ უწყება მზად არის, ითანამშრომლოს პროკურატურასთან. „საქართველოს მთავარი პროკურატურიდან ეკონომიკისა და მდგრადი განვითარების სამინისტროში წარმოდგენილი მომართვის საფუძველზე სამინისტრო პროკურატურას გადასცემს ე. წ. TIR პარკების მოწყობასთან დაკავშირებულ მის ხელთ არსებულ სრულ დოკუმენტაციას, ასევე ეკონომიკისა და მდგრადი განვითარების სამინისტროს სსიპ აკრედიტაციის ეროვნული ორგანოს - ერთიანი აკრედიტაციის ცენტრიდან  ავტოსატრანსპორტო საშუალებების გზისთვის ვარგისობაზე სავალდებულო პერიოდული ტესტირების სისტემის ამოქმედებასთან, ტესტირების ცენტრების აკრედიტაციის გაცემასთან დაკავშირებული ინტერესთა გამოხატვის გამოცხადებისა და შემაჯამებელი შედეგების ამსახველ სრულ დოკუმენტაციას. ეკონომიკისა და მდგრადი განვითარების სამინისტრო და მისი ყველა ქვემდებარე უწყება მზად არის, ითანამშრომლოს პროკურატურასთან და მიაწოდოს მათ მიერ მოთხოვნილი ყველა საჭირო ინფორმაცია,” - ნათქვამია ეკონომიკის სამინისტროს განცხადებაში. წყარო: ... ...
  • აჭარის უმაღლესმა საბჭომ მთავრობის თავმჯდომარე დაამტკიცა14 მომხრე ერთი წინააღმდეგი - აჭარის მთავრობის თავმჯდომარე დამტკიცებულია. კენჭისყრაში მონაწილეობა არ მიიღო "ნაციონალურმა მოძრაობამ". თორნიკე რიჟვაძეს მხარი "ქართული ოცნების" 14- მა დეპუტატმა დაუჭირა. რიჟვაძის წინააღმდეგ ხმა უმაღლესი საბჭოს მხოლოდ ერთმა დეპუტატმა მისცა, რომელიც "დემოკრატიული მოძრაობის" ... ...
  • მიკროსაფინანსო ორგანიზაციები რეგულაციების გადავადებას ითხოვენმიკროსაფინანსო ორგანიზაციები დაანონსებული რეგულაციების გადავადებას ითხოვენ. კომპანიებში აცხადებენ, რომ სხვა შემთხვევაში მიკროსაფინანსოების ნაწილი ბაზრიდან გავა, დარჩენილები კი გამხსვილდებიან. ინფორმაციას „ბიზნესპრესნიუსი“ ავრცელებს. ეროვნული ბანკის პრეზიდენტის 5 ივლისის ბრძანების თანახმად, მიკროსაფინანსოების საზედამხედველო კაპიტალის მინიმალური ოდენობა 2018 წლის 31 დეკემბრამდე არანაკლებ 500 ათასი ლარი, 2019 წლის 30 ივნისამდე კი არანაკლებ 1 მლნ ლარი უნდა იყოს. მთავრობის მიერ დაანონსებული რეგულაციებით კი სესხის წლიური ეფექტური საპროცენტო განაკვეთის მაქსიმალური ოდენობა, 100%-დან 50%-მდე მცირდება. მიკროსაფინანსო ორგანიზაციების წარმომადგენლების თქმით, ბოლო ორ წელში რეგულატორის მხრიდან საფინანსო სექტორში ძალიან ბევრი რეგულაცია ამოქმედდა. ეს განსაკუთრებით მტკივნეულად არასაბანკო სექტორზე აისახა. ეფექტური საპროცენტო განაკვეთის 100%-იანი ჭერის 50-%-მდე შემცირება და საზედამხედველო კაპიტალის მილიონამდე გაზრდა არასაბანკო საფინანსო სექტორს ძალიან ცუდ ვითარებაში ჩააგდებს. საბოლოოდ კი, ეს ყველაფერი მომხმარებლებზე აისახება. მიკროსაფინანსო ორგანიზაციების ასოციაციის თავმჯდომარის, ბესიკ შენგელია განცხადებით, სექტორში დაგეგმილი რეგულაციები ბევრ საფრთხეს შეიცავს. მისი თქმით, მიკროსაფინანსო ორგანიზაციების მომსახურების თვითღირებულება ბევრად უფრო ძვირია, ვიდრე ბანკების. საბანკო სექტორისგან განსხვავებით იაფი ფულის რესურსთან წვდომა მიკროსაფინანსოებს ნაკლებად აქვთ. მისივე განმარტებით, ასოციაცია დაგეგმილი რეგულაციების გადახედვას და 2019 წლის აპრილამდე გადავადებას ... ...

არქივი

ზაფრანი

ყველაზე მაღალანაზღაურებადი ადამიანი

57 წლის ტიმ კუკი, კორპორაცია...

საინტერესო ცნობები „ქინდერ სიურპრიზის“ შესახებ

„ქინდერ სიურპრიზი“ - ეს საკონდიტრო...

მარსის საიდუმლო

ყველას დაგვბადებია კითხვა ვართ თუ...

გამქრალი ტბა

2007 წლის მაისში, ჩილეში პატაგონიაში,...

ცხოველთა სამყაროც ირჩევს

გასული საუკუნის 30–იან წლებში, როდესაც...
კარმიდამო ჩემი

ქართველი "ზორო" ბიზნესსაქმიანობას, ამქრებთან ერთად, "ზუკიტოს ქოხიდან" იწყებს

ოზურგეთის მუნიციპალიტეტის სოფელ გომში (შემოქმედის...

წიფლის წიწიბო

წიფელი ჩვენს ქვეყანაში ერთ-ერთი მძლავრი...

ჩეხური "კალაჩი"

ჩეხური სამზარეულო ლუდის გემრიელი მენიუსა...

როგორ ვიმკურნალოთ თაფლით

ხალხურ მედიცინაში არ მოიპოვება ისეთი...

პეტუნიას პოპულარობა და თავისებურება

ბოლო წლების განმავლობაში, ჩვენში განსაკუთრებული...

ალოეს სამკურნალო თვისებები

შესაძლოა, ალოეს დადებითი თვისებების შესახებ...

როგორ აღვიდგინოთ მხედველობა ნივრის დახმარებით

დროთა განმავლობაში, ადამიანის ჯანმრთელობის მდგომარეობა...

რატომ არ უნდა აადუღოთ წყალი ხელმეორედ

ფილმის ყურებაში ისე გაერთეთ, რომ...

"უთვალავ საქმეთაგან, სახარების გადაწერაა შვება"

ჩვენი სტატიის გმირი მრავალმხრივი ნიჭით...

როგორ ვებრძოლოთ პირუტყვის კანქვეშა ბორას

ზაფხულის პერიოდში განსაკუთრებით, მსხვილფეხა რქოსანი...

მეფუტკრის კალენდარი _ მაისი და ივნისი

მაისის შუა რიცხვებიდან დგება დიდი...