"გარანტია არა _ მექანიზმები გვაქვს" _ ექსკლუზიური ინტერვიუ ინფრასტრუქტურის მინისტრთან

მთავარი თემა

"გარანტია არა _ მექანიზმები გვაქვს" _ ექსკლუზიური ინტერვიუ ინფრასტრუქტურის მინისტრთან

7 აგვ. 2017, 15:15:11

საქართველოს რეგიონული განვითარებისა და ინფრასტრუქტურის მინისტრი ზურაბ ალავიძე გასულ კვირას "გურია ნიუსის" სტუმარი იყო. მისი თქმით, ბოლო დროს რეგიონებში გახშირებული სტუმრობა წინასაარჩევნო კამპანიას არ უკავშირდება. მინისტრი ამბობს, რომ მთავარი მიზანი მიმდინარე პროექტების მონიტორინგი და ამ პროექტების დროულად დასრულებაა.

_ წინასაარჩევნო კამპანიის გამო არ დავდივარ რეგიონებში. თუმცა, როცა კამპანია დაიწყება, არც ეს იქნება პრობლემა. ახლა, მიმდინარე პროექტებს მონიტორინგს ვუწევთ. წელს 165 მილიონი გვქონდა რეგიონული განვითარების ფონდიდან (რეგფონდი) გამოყოფილი, 35 მილიონი დავამატეთ ცოტა ხნის წინ. შესაბამისად, ბევრი პროექტი გვაქვს. თითქმის ყველა რეგიონში მართლა გახურებული მუშაობა მიმდინარეობს. ჩვენთვის მთავარია, რომ თანხა, რომელიც გამოვყავით წელს, ავითვისოთ და შესაბამისად, პროექტებიც დასრულდეს. ჩვენ, იმის გარდა, რომ გვაქვს სამინისტროს ბიუჯეტი, ვაკონტროლებთ და ყურადღებას ვაქცევთ რეგფონდებიდან გამოყოფილი თანხების სწორად და დროულად დახარჯვას, საქმის გაკეთებას, _ თქვა ზურაბ ალავიძემ.

_ აპრილში და მაისში არ იყო ეს პროექტები საინტერესო?

_ კი, როგორ არ იყო.

_ თუმცა, არა ისე აქტიურად, როგორც ახლა...

_ აპრილში და მაისში რეგფონდებს ვაყალიბებდით, მაშინ გამოვყავით ფული. ახლა ხორციელდება პროექტები და ვაკონტროლებთ, რომ დროულად დამთავრდეს სამუშაოები. აბსოლუტურად ყველა რეგიონში ჩავდივართ და ვერც ერთ ჩემ კომენტარში ვერ ნახავთ წინასაარჩევნო განცხადებებს.

_ როგორც წესი, ასეთ დროს წინაასაარჩევნო განცხადებები საჯაროდ არ კეთდება... ეს წლების მანძილზე დამკვიდრებული პრაქტიკაა და არჩევნებამდე რამდენიმე თვით ადრე გამართული შეხვედრების დროს მოსახლეობას გაკეთებულ საქმეებზე უყვებით, რაც კამპანიის დასაწყისია...

_ გეთანხმებით, კამპანია იწყება, ჩვენ კი პროექტებს მონიტორინგს ვუწევთ მუდმივად. ჩემი თანამშრომლები _ სამსახურის უფროსები, მოადგილეები, მთელი საქართველოს მასშტაბით ახორციელებენ ამ სამუშაოს იმისთვის, რომ თუკი სადმე პრობლემაა, დროულად აღმოიფხვრა.

_ მონიტორინგი ახსენეთ _ თემა, რომელიც ყველა მუნიციპალიტეტის მოსახლეობას აწუხებს და რომელიც რეალურად არ ხორციელდება. ფიქრობთ, რომ მონიტორინგი ნიშნავს იმას, როცა მინისტრი ან მისი მოადგილე რეგიონში კონკრეტულ ობიექტს ნახულობს და კარგად ან ცუდად აფასებს?

_ დასამალი არ არის, რომ პრობლემები გვაქვს და ეს პრობლემები ორ ნაწილად იყოფა _ პირველი არის პროექტი, როგორც მუნიციპალიტეტის მხრიდან მომზადებული, ისე _ ზოგადად. ეს თავის ტკივილი არსებობს ქვეყანაში და ვცდილობთ, გამოვასწოროთ. სწორი პროექტი გვჭირდება იმისთვის, რომ შემდეგ მშენებლობა სწორად გახორციელდეს. ამიტომაც ვმუშაობთ, რომ მოვუაროთ პროექტებს _ როგორ ხდება, რა დონეზე ხდება, რა ხარისხით კეთდება. შემდეგი ეტაპია ამ პროექტის შესაბამისად გახორციელებული მუშაობა _ როგორ ხდება შესყიდვა, მშენებლობა, ზედამხედველობა.

_ ბატონო ზურაბ, მუნიციპალიტეტებში პროექტებს არავინ აკონტროლებს... რას ნიშნავს, პროექტის მოვლა?

_ ვერ დაგეთანხმებით, რომ არავინ აკონტროლებს. აკონტროლებს, მაგრამ გააჩნია, რა დონეზე კონტროლდება. ჩვენ გვაქვს კარგი გამოცდილება და საუკეთესო პრაქტიკა, რასაც ამდენი ხანია ვიყენებთ _ ეს არის საერთაშორისო პროექტები. იქ როგორ ხდება ზედამხედველობა, მონიტორინგი და ა. შ. ზუსტად იგივე წესების და მეთოდების გადმოტანას ვაპირებთ მუნიციპალიტეტებში. მათ მივეცით რეკომენდაციები თუ, როგორ უნდა გაკეთდეს _ გვინდა, შიდა ზედამხედველობა გავიტანოთ გარეთ. რამდენადაც მაქვს ინფორმაცია, მუნიციპალიტეტებში მიმდინარეობს ტენდერები, რომ აიყვანონ დამოუკიდებელი საზედამხედველო კომპანიები.

_ ეს კომპანიები მუნიციპალიტეტმა უნდა აიყვანონ?

_ კი. კომპანიები აჰყავთ მუნიციპალიტეტებს და ეს კომპანიები შემდეგი სამი წელიწადი მათ მიერ გახორციელებულ ნებისმიერ პროექტს ზედამხედველობას გაუწევენ.

_ დღეს არსებული მდგომარეობით შემსრულებელს აქვს ვალდებულება, გადაიხადოს ექსპერტიზის საფასური, თავად შეარჩიოს კომპანია, რაც თავისთავად ქმნის რისკებს.

_ აქ სხვა რამეზეა საუბარი. ექსპერტიზა ბოლოს ტარდება.

_ პროექტს ხომ სჭირდება ექსპერტიზა?

_ გეთანხმებით, პროექტს სჭირდება ექსპერტიზა. პროექტი ვიღაცამ უნდა ჩაიბაროს. აქ არის საუბარი, რომ ყველა მუნიციპალიტეტი აკეთებს შესყიდვებს იმისთვის, რომ შემდეგი რამდენიმე წელი დამოუკიდებელმა კომპანიამ განახორციელოს ზედამხედველობა. სერიოზულ ანაზღაურებაზე და გარანტიებზეა საუბარი.

_ რა არის ეს გარანტია და რა გვაძლევს იმის საფუძველს, ვიფიქროთ რომ ისევ არ "დაიკერებიან" კომპანიის ექსპერტები, როგორც ეს ამდენ ხანს ხდებოდა და რისი პრაქტიკაც საკმაოდ დიდი გვაქვს?

_ ჩვენ ბევრი ვიმუშავეთ იმისთვის, თუ როგორი უნდა ყოფილიყვნენ ეს საზედამხედველო ორგანიზაციები. ვიმუშავეთ ეკონომიკის სამინისტროსთან ერთად. იქ არის აკრედიტაციის ეროვნული ცენტრი, რომელიც აკრედიტაციას უწევს ამ საზედამხედველო კომპანიებს და მათ სერიოზული მოთხოვნები აქვთ გასავლელი. შესაბამისად, შესყიდვებში მონაწილეობენ მხოლოდ ის კომპანიები, რომლებსაც აკრედიტაციები აქვთ გავლილი. ეს ის კომპანიები არიან, რომლებიც წლების განმავლობაში უცხოელებთან ერთად მუშაობენ. ბევრ საერთაშორისო კონტრაქტს უწევენ ზედამხედველობას და საკმაოდ დიდი გამოცდილება აქვთ მიღებული. შემიძლია გითხრათ, რომ დღეს, საქართველოში, ყველა საზედამხედველო კომპანია ასი პროცენტით არის დატვირთული და ასევე ასი პროცენტით დატვირთულია ყველა საპროექტო კომპანია.

_ დარწმუნებული ხართ, რომ ეს ტენდერები მორგებული არ იქნება?

_ მორგებული აღარაფერია და პროცესიც ღიაა. ჩვენი ინტერესი არ არის მორგება, ჩვენი ინტერესია იმ ბიუჯეტით, რაც დაგეგმილი გვაქვს, საქმის დროულად კეთება.

_ როდესაც ამბობთ, რომ მორგებული არ არის, ტენდერების თითქმის 80 პროცენტი კონკრეტული კომპანიებისთვის ცხადდება და ჩვენ შეგვიძლია კონკრეტული მაგალითები გითხრათ...

_ ვერ უარვყოფ, რომ არ იყო. ალბათ, იყო, მაგრამ ესეც სუბიექტურია. მეორე მხარე იტყვის, რომ არ იყო, თუმცა, ისევ ვიმეორებ, რომ, ალბათ, იყო.

_ "გურია ნიუსმა" კონკრეტული შემთხვევების მტკიცებულება ბევრჯერ გამოაქვეყნა...

_ კი, ბატონო, გეთანხმებით. სავარაუდოდ, შესაძლოა, რომ ტენდენციურობის ელემენტები იყო, მაგრამ ამ მიმართულებითაც უნიფიცირებით წავედით. შესყიდვების სააგენტოსთან ერთად, ფაქტობრივად, რეფორმა გავახორციელეთ. მშენებლობის მიმართულებითაც ბევრი წესი შეიცვალა და ბევრი ინსტრუმენტი გაჩნდა. დამერწმუნეთ, ამის შედეგები შემდგომ წლებში თვალსაჩინო იქნება. ჩვენ, ასევე, დარწმუნებულები ვართ, რომ ამ საქმიანობიდან გამომდინარე ხარისხობრივად გაცილებით უკეთეს ინფრასტრუქტურულ პროექტებს მივიღებთ და შემსრულებლებსაც. აქ მთავარი ისაა, რომ მერია რომელ სამუშაოზეც ტენდერს გამოაცხადებს,  იმ სამუშაოს თვითონ ვერ ჩაიბარებს. ჩაიბარებს დამოუკიდებელი ადამიანი, რომელსაც რაღაც ექნება დასაკარგი კონტრაქტით. ეს საერთაშორისო პრაქტიკაა.

_ ექსპერტებს დღესაც ხომ აქვთ დასაკარგი, მაგრამ...

_ არა, რა აქვთ დასაკარგი?!

_ ბევრი აქვთ _ სამსახური, თავისუფლება.. სულ ცოტა ხნის წინ ექსპერტი ენდელაძე, სახელმწიფო უსაფრთხოების სამსახურმა არასწორად ჩატარებული ექპერტიზის გამო მცხეთაში დააკავა. ამავე ადამიანს ექსპერტიზის დასკვნა გაკეთებულია აქვს ჩოხატაურში, სოფელ ბუკისციხის რეაბილიტირებულ გზის მონაკვეთზე, რომელზეც 200 000 ლარზე მეტი დაიხარჯა და რომელიც 2 თვეში ჩაინგრა. თუმცა, ამის გამო მისთვის პასუხი არავის მოუთხოვია, არავის შეუმოწმებია, რა ჰქონდა სხვაგან გაკეთებული... რა გარანტია გვაქვს, რომ ასეთი ფაქტები ისევ არ იქნება?

_ გარანტია არ გვაქვს, მექანიზმები გვაქვს, უფრო როგორ დავაზღვიოთ. ტენდერებში მონაწილეობენ ლიცენზირებული კომპანიები და ამ ხალხს აწყობილი აქვთ საქმე _ სერიოზული ბიზნესია ეს. ისინი აწერენ ხელს ხელშეკრულებებს, სადაც არის გარანტიები და დასაკარგი ბევრი აქვთ. კონკრეტულ ექსპერტებზე კი საუბარი ახლა არ შემიძლია.

_ სერიოზული ორგანიზაციაა სამხარაულის ეროვნული ექსპერტიზის ბიურო, თუმცა, მათ ექსპერტებთანაც ბევრი კითხვებია...

_ ჰო, ნუ, სადღაც არსებობს კითხვები, სადღაც არ არსებობს. თუმცა, მე პირადად არ მაქვს მათთან კითხვები.

_ თქვენამდე არ მოდის ინფორმაცია, რომ სამხარაულის ექსპერტებმა არასწორი დასკვნები დადეს?

_ ჩვენ კარგი თანამშრომლობა გვაქვს მათთან.

_ თანამშრომლობა ბევრს აქვს ...

_ იცით, როგორ არის? დიდ ორგანიზაციაში არიან კარგი და სამწუხაროდ, არიან ცუდი თანამშრომლებიც.

_ მაგას გეუბნებით... არიან ექსპერტები, რომლებიც შემსრულებლებისთვის სასურველ დასკვნებს 200 ლარად აკეთებენ და არიან ისეთებიც, რომლებიც ამაზე არ თანხმდებიან...

_ ჰო, მე არ ვიცი მასეთი დეტალები, _ აღნიშნა ზურაბ ალავიძემ.

რეგიონული განვითარებისა და ინფრასტრუქტურის მინისტრმა შესყიდვების პროცედურებზეც ისაუბრა და აღნიშნა, რომ "ცუდად და უსინდისოდ გაკეთებული საქმე არავის შერჩება".

_ ბატონო ზურაბ, დიდი ხანია საუბრობენ შესყიდვების კანონის შეცვლაზე. უფრო კონკრეტულად კი, იმ მუხლზე, რომლის თანახმადაც, გამარჯვებული არის ის კომპანია, რომელიც დაბალ ფასს შესთავაზებს შემსყიდველს, რაც პრაქტიკაში უხარისხოდ შესრულებელ სამუშაოს ნიშნავს...

_ 200 000-ლარიან ტენდერს რომ ვიღაც გამოაცხადებს, ვიღაც რომ დიდ თანხას დააკლებს, მერე სამხარაულის ბიურო დაუმტკიცებს, მერე პრემიერი ვიღაცას ხელს გადაუსვამს თავზე, მინისტრი რაღაცას დაუჩოქებს და ა. შ. უფრო კონსპირაციის თეორიები მგონია. შეიძლება, გამონაკლისი შემთხვევები იყოს, მაგრამ ეს ტოტალურად არ ხდება.

_ ამ "გამონაკლისებით" ინტერესდებით? მაგალითად, ჩოხატაურის ხელოვნების სასახლის ისტორიით თუ დაინტერესდით _ პროექტის, რომლის მშენებელი ერთ პირთან მოლაპარაკების წესით, პრემიერის განკარგულებით შეირჩა და სადაც გახსნიდან ორ თვეში წყალი ჩამოვიდა, ამის გამო კი, პასუხი არავის უგია...

_ დავინტერესდები აუცილებლად, არ ვიცოდი. ძალიან სამწუხაროა, თუ ასეთი ფაქტი მოხდა და სასაყვედუროცაა. დარწმუნებული ვარ, გარკვეული რეაგირებები თუ აქამდე არ არის, სადღაც მოხდება.

_ სადღაც და როდესღაც?

_ ამ ქვეყანაში არავის, არაფერი ცუდად და უსინდისოდ გაკეთებული არ შერჩება და არც შერჩენია.

_ ბატონო ზურაბ, ავტობანების მშენებლობაზე უნდა გკითხოთ... მეგზევეები ჩვენთან საუბრისას ამბობენ, რომ მშენებლობისთვის მდინარეებზე გახსნილი კარიერების გამო, გურიას მალე სერიოზული პრობლემები შეექმნება. გვითხრეს ისიც, რომ მდინარის კარიერს ავტობანების მშენებლობისთვის არსად იყენებენ ჩვენს გარდა. რამდენადაც ჩვენთვის ცნობილია და ეს თქვენც უნდა იცოდეთ, როდესაც ავტობანები დაპროექტდა, იქ გათვალისწინებული იყო მთების კარიერის გამოყენება, რომელიც ჩვენთან დახურულია და მისი გახსნის ნაცვლად პროექტების შეცვლა მოხდა...

_ სამწუხაროდ, ეს გზები სულ კარგადაც არ იყო დაპროექტებული. ბევრი პრობლემები გვაქვს და მარტო გზებში არა. 22 ქალაქში წყალმომარაგების სამუშაოები მიმდინარეობს და იქაც, პროექტირების, გამო სერიოზული პრობლემები შეგვექმნა.

_ და ეს ვისი ბრალია _ თქვენი წინამორბედების?

_ მათ ვერ დავაბრალებ _ მინისტრები სამუშაოებს არ აპროექტებენ.

_ თქვენ თქვით, რომ ეს კონტროლის შედეგად აღმოაჩინეთ და რა გამოდის _ ნარმანია, შავლიაშვილი და ჯავახიშვილი არ აკონტროლებდნენ?

_ იქ მხოლოდ ჯავახიშვილი, ნარმანია, ალავიძე და შავლიაშვილი არ არიან. იქ არიან ბანკები, რომლებიც ამ პროექტებს აფინანსებენ, მათი ტექნიკური პერსონალი. ამიტომაც ვამბობ, რომ პროექტირებას სჭირდება მეტი კონტროლი, თორემ სულ პრობლემები გვექნება. რაც შეეხება კარიერებს _ კი, ბატონო, გეთანხმებით, რომ პრობლემაა, გურიაში განსაკუთრებით. მაგალითად, ურეკიდან რომ ოზურგეთში ავდივართ, ის გზა ინერტული მასალით დატვირთულმა მანქანებმა გააფუჭეს და ახლა თავიდან ვაკეთებთ. შრომაში მოდის ეს გამოცდილებაც. შეცდომებზე ჩვენც ვსწავლობთ _ ჩვენსაზეც, სხვისაზეც, წარსულზეც და აწმყოზეც, რომ მომავალშიც არ განმეორდეს მსგავსი სიტუაცია.

_ ამ კარიერების გამო, ნაპირსამაგრების გაკეთებაც თავიდან მოგიწევთ...

_ ამ მხრივ ქვეყანაში სერიოზული პრობლემა გვაქვს. ბევრი ნაპირსამაგრი სამუშაოა გასაკეთებელი. მდინარეების კალაპოტები ბევრგან დასაფორმირებელია, რაც საკმაოდ დიდ თანხებთან არის დაკავშირებული და თანმიმდევრულად, სადაც შეგვიძლია, იქ ვაკეთებთ. გვაქვს კონკრეტული სტრატეგია. ამ წელიწადში ვცდილობთ და აუცილებლად გავაკეთებთ ქვეყნის ძირითად ინფრასტრუქტურას. შემდგომ 4 წელიწადში იმის ნახევარი რომ დავხარჯოთ, რასაც ახლა ვხარჯავთ, თითქმის ყველა სოფელში, ძალიან "კენწერო" სოფელს თუ არ ჩავთვლით, წყალი და გზა იქნება უპრობლემოდ _ ამ დონეზე ვართ მისულები.

_ ქალაქებში, ქუჩების დიდი ნაწილი ავარიულია... მაგალითად, ოზურგეთელები ცოტა ხნის წინ ითხოვდნენ, რომ სასაფლაოსთან მისასვლელი გზები დაეგოთ, თუმცა, საჭირო თანხის გამონახვა ვერ მოხერხდა.

_ ქალაქ ოზურგეთში ძალიან ბევრი ქუჩა დაიგო, ბევრი მნიშვნელოვანი სამუშაო ჩატარდა. ასევე, ბევრი პროექტი გაკეთდა მუნიციპალიტეტის სოფლებშიც.

_ გეთანხმებით, ამას არავინ უარყოფს, მაგრამ როცა თქვენ ამბობთ, რომ სრულად გაკეთდა, ჩვენ გაწვდით ინფორმაციას, რაა გასაკეთებელი და რას ითხოვს ხალხი...

_ ერთ დღეში ყველაფერს ვერ გავაკეთებთ. დამერწმუნეთ, რომ დღევანდელი ტემპი, რაც იყო, იმაზე ბევრჯერ მეტია.

_ თუმცა, კონტროლი არ ხდება...

_ ვერ დაგეთანხმებით ამ მიმართულებითაც. თუმცა, გვინდა უკეთესი კონტროლი და რადგან ეს გჭირდება, აქედან გამომდინარე, შესაბამის გადაწყვეტილებასაც ვიღებთ.

_ ბატონო ზურაბ, გაქვთ თუ არა ინფორმაცია, რომ კომპანიები, რომლებსაც ჰქონდათ პრობლემები და მათი დირექტორები დააკავეს უხარისხოდ შესრულებული სამუშაოების, გაყალბებული დოკუმენტაციების ატვირთვის გამო, მათ შორის "გურია ნიუსის" ჟურნალისტური გამოძიების საფუძველზე, ტენდერებში ისევ მონაწილეობენ?

_ ამისთვის არსებობს ე. წ. შავი სია და თუ რომელიმე მუნიციპალიტეტს ასეთი კომპანია არ შეჰყავს მასში, გამოდის, რომ ტენდენციურები არიან.

_ არ ფიქრობთ, რომ აუცილებელია კომპანიების მიერ ატვირთული დოკუმენტაციების გადამოწმება, რაც ახლა არ ხდება?

_ ეს არ არის მარტივი. რისკი ახლავს ყველაფერს და გეთანხმებით, რომ პრობლემაა, მაგრამ ეს რეგულაციები რომ გააკეთო და ბოლომდე აღმოფხვრა რისკი, ვერაფერს გააკეთებ. ამიტომ, სადღაც რისკის გაწევა გვიწევს. აქ ადამიანების პატიოსნებამდე და თვითშეგნებამდე დავდივართ. აქედან გამომდინარე, მუნიციპალიტეტის და რეგიონის ხელმძღვანელობამ ეს არ უნდა იკადროს.

_ და როცა კადრულობენ?

_ ძალიან ცუდი, თუ ასეა.

_ თქვენ რატომ "იკადრეთ" და გააუქმეთ თვითმმართველი ქალაქები, რასაც მოსახლეობის უმრავლესობა ეწინააღმდეგება?

_ თქვენ რატომ "კადრულობთ" და ამბობთ, რომ მოსახლეობის უმრავლესობა ამას ეწინააღმდეგება?

_ ჩვენ ამაზე ბევრი ღია გამოკითხვა გვაქვს ჩატარებული.

_ ეს არ ასახავს რეალობას.

_ ჩვენ ეს შეგვიძლია დაგიმტკიცოთ კონკრეტული ვიდეო მასალებით, სტატიებით _ ბევრი გამოკითხვა ჩავატარეთ და გამოკითხულთა 98% ეწინააღმდეგება თქვენს გადაწყვეტილებას.

_ არ მეზარება _ ხვალ ჩამოვალ და ერთად გავიდეთ ქუჩაში, ვნახოთ ის ხალხი, რომლებიც თქვენ გამოკითხეთ. საერთოდ, როგორ წარმოგიდგენიათ, რატომ უნდა გადადგას მმართველმა პარტიამ არჩევნების წინ, შეიძლება ითქვას, ყველაზე არაპოპულარული ნაბიჯი?

_ მაგას გეკითხებით _ რატომ გადადგით ეს ნაბიჯი?

_ იმიტომ, რომ სწორია. ჩვენ ვაკეთებ იმას, რაც სწორია და სკამებს გამოკიდებული ადამიანები არ ვართ არც ერთი.

_ ანუ, თავის დროზე ბიძინა ივანიშვილმა არასწორი გადაწყვეტილება მიიღო?

_ ბიძინა ივანიშვილმა არა. იქ იყო კოალიციური მთავრობა, იყვნენ "რესპუბლიკელები", რომელთა ინიცირებითაც მოხდა ეს ყველაფერი.

_ ბიძინა ივანიშვილმა ჩვენთან საუბრისას თქვა, რომ ეს მისი რეფორმა იყო, რითაც ძალიან ამაყობდა...

_ თვითმმართველობის რეფორმა იყო სწორი. ჩვენ მივიღეთ არჩევითი საკრებულოები, არჩევითი მერები და გამგებლები.

_ საკრებულოს მანამდეც ვირჩევდით...

_ გასაგებია, მაგრამ ამ რეფორმით არჩევითი გახდა საკრებულოც, მერებიც და გამგებლებიც. ამას შემდეგ მოჰყვა ის, რომ 357 მუნიციპალიტეტის შექმნა უნდოდათ "რესპუბლიკელებს". ეს იმდენად უტოპიური იყო, რომ შეთანხმება ვერ მოხდებოდა, ფიზიკურად ვერ გაკეთდებოდა, რადგან ქვეყანას ამის რესურსი არ გააჩნდა. შემდეგ ეს ყველაფერი დავიდა რაღაც დონემდე და ბოლოს კონსესუსი შედგა 7 რეგიონულ ცენტრზე. რატომ უნდა გაყოფილიყო ამბროლაურის ან ოზურგეთის მუნიციპალიტეტი და არა ლანჩხუთის და ზესტაფონის? ჩვენ ამას ასე ვერ დავტოვებდით, რადგან ქვეყანაში უნდა იყოს ერთი ტერიტორიული მოწყობის პრინციპი. თუ დემოკრატიაზე ვსაუბრობთ, ეს ამას არ ეხება _ ყველაფერი რჩება არჩევითი. ახლა გავაერთიანეთ და გამგებლებსაც მერები დავარქვით, რადგან ვერ გადავთარგმნეთ, რატომ ჰქვია სხვადასხვა სახელი ერთი ფუნქციის მატარებელ პირებს. ჩვენ ევროპასთან ახლოს მივდივართ, ძალიან გვინდა, რომ შევუერთდეთ რაღაც დროში და ძალიან წინ ვართ ამ მიმართულებით. ბევრ ხელშეკრულებაზე გვაქვს ხელი მოწერილი და დიდი თანამშრომლობის პერსპექტივებია. აქედან გამომდინარე, ვცდილობთ, მექანიზმები გავამარტივოთ, რომ თანამშრომლობა შედგეს ერთნაირად.

_ ეს ფინანსებს გიზოგავთ?

_ გარკვეულ წილად, კი. რა თქმა უნდა.

_ უმუშევრად დარჩენილ ადამიანებს რას უპირებთ?

_ უმუშევარი ადამიანებისთვის, დაახლოებით, 11 მილიონ ლარს ვხარჯავთ მხოლოდ რეგიონების ინფრასტრუქტურაში. აქედან, 9 მილიონს ხარჯავს ჩვენი სამინისტრო. ეს ყველაფერი კი იმას ნიშნავს, რომ ვქმნით სამუშაო ადგილებს.

_ გასაგებია, იქნება პროექტები, მშენებლობები... ქალების დასაქმებასაც მშენებლობებზე აპირებთ თუ როგორ გავიგოთ თქვენი განცხადება?

_ ამ პროექტებზე დიდი ორგანიზაციები მუშაობენ და არის მიყოლილი სამუშაოები.

_ ფიქრობთ, რომ ამ რეფორმის შედეგად უმუშევრად დარჩენილ ადამიანებს კომპანიები დაასაქმებენ?

_ მინიმუმ, 40 000 პირდაპირი სამუშაო ადგილები შეიქმნება ამ პროექტებით.

_ დათვლილი გაქვთ, რამდენ ადამიანს ტოვებთ უმუშევრად?

_ არ მაქვს დათვლილი. ჯერ არ ვიცი, გათავისუფლებულები იქნებიან თუ სხვაგან გადანაწილდებიან.

_ ისედაც "გაბერილ" შტატებზე კიდევ აპირებთ შტატების დამატებას?

_ ვერ გაგცემთ ახლა ამაზე პასუხს. ოპტიმიზაცია მოხდება აუცილებლად, მაგრამ შეიძლება 10-დან 7 გადანაწილდეს და 3 უმუშევარი დარჩეს. არ არის ისეთ დიდ რაოდენობაზე და პრობლემაზე საუბარი, რა პათოსითაც თქვენ ამ კითხვებს მისვამთ...

_ თუ იმას ამბობთ, რომ ხარჯების შემცირება გსურთ და რეალურად საქმის კეთება, ეს ე. წ. გადანაწილება ამ ყველაფერთან თანხვედრაში ვერ მოდის...

_ ჩვენ გვინდა, რომ ბიუროკრატია შევამციროთ მაქსიმალურად და მოვახერხოთ სამუშაო ადგილების შექმნა კერძო სექტორში, სადაც სერიოზული ზრდაა ამ მიმართულებით. არ გვაქვს იმის ფუფუნება, რომ დიდი ბიუროკრატია შევინახოთ _ სამუშაო ადგილები სახელმწიფო სექტორიდან კერძო სექტორში უნდა გადავიდეს და მთავრობის 4-პუნქტიანი სამუშაო გეგმაც ზუსტად ამას ემსახურება. ჩვენ ამდენ თანხას ვხარჯავთ ინფრასტრუქტურაში იმისთვის, რომ შემდეგი 30-40 წლის ინფრასტრუქტურა შევქმნათ, იმისთვის, რომ სამუშაო ადგილები იყოს. ორ რეგიონულ ცენტრს ვაკეთებთ _ თბილისი თავისთავად ცენტრია და ქუთაისს ვაკეთებთ კიდევ _ იქ აეროპორტს ვადიდებთ; ბათუმში 139 რეისი დაფრინავს კვირაში. 40%-მდე გვაქვს შესადარის პერიოდში ვიზიტორების ზრდა. 6 მილიონ ვიზიტორს გადავაბიჯეთ უკვე, 6-7 წელიწადში 11 მილიონამდე ავალთ. ეს გვაქვს მიზნად და ამას სჭირდება ინფრასტრუქტურა, კადრების გაზრდა. რეგიონები, ასევე, მიბმულია სოფლის მეურნეობასთან და აქაც სერიოზული პროგრამები მუშავდება.

_ ტურიზმი ახსენეთ და რა ხდება ბახმაროს დაპირებულ განვითარებასთან დაკავშირებით? როგორც ვიცით, რამდენიმე დღის წინ სტუმრობდით ამ კურორტს და თქვენი იქ ყოფნის დროს ელექტროენერგია გამოირთო. არადა, დაპირებისამებრ, ეს პრობლემა პირველ რიგში უნდა მოგვარებულიყო...

_ ამ მიმართულებით ახლა მიმდინარეობს პროექტირება.

_ ამბობთ, ვაკეთებთო, თუმცა, წელს, ბახმაროში გარე განათებაც კი არ მუშაობს, არადა, შარშან იყო...

_ სავარაუდოდ, ძალიან ბევრი ტურისტია და არ ყოფნის ის ინფრასტრუქტურა, რაც არის. დამერწმუნეთ, რომ ეს პრობლემები მალე მოგვარდება.

_ ბატონო ზურაბ, როგორც ვიცით, საარჩევნო პროცესებში ერთ-ერთი წამყვანი როლი გაკისრიათ... გურიის მუნიციპალიტეტებში უკვე შეარჩიეთ კანდიდატურები?

_ ცოტა ინტრიგა უნდა დავტოვო და დაახლოებით, ორი კვირა უნდა დაველოდოთ.

_ ამ ორ კვირაში გუბერნატორის წასვლა-დარჩენის საკითხიც უნდა გადაწყდეს?

_ სულ ცოტაც გვადროვეთ და ყველაფერს გაიგებთ.

_ ახალ სახეებს ველოდოთ?

_ ისეთი პირი უჩანს, რომ ქვეყნის მასშტაბით ბევრი ახალი სახე იქნება, რაც მისასალმებელია. ცვლილებები სჭირდება ყველაფერს და ამას ითხოვენ ადამიანები. შესაბამისად, სადღაც დარჩება ძველი და სადღაც იქნება ახალი ადმინისტრაცია.




 ახალი ამბები
  • პატრიარქის სამადლობელი წერილი და პრეზიდენტის სტუმრობა ზემო აკეთშიქვეყნის  პრეზიდენტი სალომე ზურაბიშვილი და კულტურის გამოჩენილი წარმომადგენლები დღეს ლანჩხუთში, ზემო აკეთს სტუმრობდნენ. საქმე ისაა, რომ ივნისს–ივლისის თვეში, ლანჩხუთში, საექსპედიციო ჯგუფმა, რომელსაც სათავეში ანსამბლ ,,შავნაბადას“ ხელმძღვანელი დავით ცინცაძე და ლანჩხუთის ხუხუნაიშვილების სახელობის სკოლის ხელმძღვანელი ავთანდილ თურქია ედგა, აკეთის წმინდა გიორგის სახელობის ტაძრის ეზოს ტერიტორიაზე, ცნობილი მომღერლების საფლავების აღმოჩენა-რესტავრაცია განახორციელეს. დღეს უკვე აღმოჩენილია ცნობილი გვარის - ხუხუნაიშვილების ანსამბლის წევრების 6 საფლავი, ხოლო ცარიზმის დროს ხელყუმბარით დაზიანებული ტაძარი, მზად არის რესტავრაციის დასაწყებად. სწორედ ეს  რესტავრირებულ საფლავები და რესტავრაციაში მყოფი ტაძარი მოინახულეს სტუმრებმა. მიღების მეორე ნაწილს კი სოფელმა აცანამ საკონცერტო ფორმატითა და კულტურული ნიმუშების წარდგენით უმასპინძლა. პრეზიდენტმა ცანაში სტუმრობისას გამოჩენილი მომღერალი, ლოტბარი, კომპოზიტორი, ანსამბლების – „რუსთავისა“ და „მართვეს“ დამაარსებელი, ანზორ ერქომაიშვილი, რომელსაც 80 წელი 10 აგვისტოს უსრულდება,  გაწეული ღვაწლისთვის დააჯილდოვა. დღევანდელ ღონისძიებებთან დაკავშირებით, ლანჩხუთში სამადლობელი წერილი გამოგზავნა საქართველოს კათალიკოს-პატრიარქმა ილია მეორემაც. „ჩვენი ქვეყნის დიდი სიმდიდრე ჩვენი კულტურაა და მასში მარგალიტადაა ჩასმული ჩვენი მრავალხმიანობა. იგი ჯვარია ჩვენი ხალხისა. გალობა ჯვრის ვერტიკალური სვეტია ღვთისკენ მიმართული, ხოლო ჯვრის ჰორიზონტალური ნაწილი სიმღერაა - ხალხში გაბნეული, როგორც სიყვარული მოყვასისა. მადლობა ღმერთს, რომ ჩვენ ისტორიას ახსოვს გამორჩეული და დიდი ღვაწლის მქონე გვარები: დუმბაძეები, კარბელაშვილები, ერქომაიშვილები, კავსაძეები, ბერძენიშვილები, ჩავლეიშვილები და სხვანი. მათ მუსიკალურ რანგს მიეკუთვნება ხუხუნაიშვილებიც, რომელთა ნიჭი მსოფლიომ აღიარა და მათ საქართველო წარმოაჩინეს, როგორც მუსიკალურად მაღალი აზროვნების მქონე ქვეყანა. ზემო აკეთის მომღერალთა შესაძლებლობები ყველა დონის მუსიკოსს ქედს ახრევინებს მათი გენიის წინაშე. ხოლო ალმასხან ხუხუნაიშვილის იმპროვიზაცია დღემდე აოცებს თანამედროვე მუსიკოსებს თავისუფლების შეგრძნებით.“ _ წერს პატრიარქი და მადლობას უხდის ამ საქმის ინიციატორებს: „მადლობა მინდა ვუთხრა ექსპედიტორთა ჯგუფს: მამა მიქაელის (მახარაძის), დავით ცინცაძის, ავთანდილ და მერაბ თურქიების თაოსნობით, რომელთაც დიდად იშრომეს წინაპართა პატივსაგებად”. ჩვენ არ უნდა დაგვავიწყდეს, რომ კაცი საქმით იცნობა და რომ გარდაცვლილი წინაპრები გვეხმარებიან ცოცხლებს.“ საქართველოს პატრიარქი თავის წერილში იუბილეს ულოცავს ანზორ ერქომაიშვილს. „დღეს, საბედნიეროდ ჩვენი ქვეყნის საუკუნოვან კულტურას ჰყავს გამორჩეული პატრონი, რომლის გვარმაც განსაკუთრებულად იღვაწა ერისა და ბერის წინაშე. მადლობა ღმერთს, რომ მეტად რთულ დროს ჩვენ ქვეყანას მოუვლინა ანზორ ერქომაიშვილი - ტრადიციული მუსიკის პატრიარქი და დიდი საგვარეულო კულტურის გზის გამგრძელებელი. ვულოცავ მას 80 წლის იუბილეს და მინდა გითხრათ, რომ მე მადლიერი ვარ მისი ფასდაუდებელი ღვაწლისა, რომელიც მან გასწია ჩვენი ქვეყნის წინაშე. ვუსურვებ ჯანმრთელობას და დიდხანს სიცოცხლეს. ღმერთმა დაგლოცოთ და გაგაძლიეროთ!“ -წერს ილია ... ...
  • ჭიათურაში ბენზინგასამართი სადგური გაძარცვესჭიათურაში ბენზინგასამართი სადგური გაძარცვეს. არსებული ინფორმაციით, შეიარაღებული პირები ბენზინგასამართ სადგურზე შეიჭრნენ და ადგილზე მყოფ ოპერატორს მუქარის ძალით თანხა მოსთხოვეს. წაღებულია რამდენიმე ასეული ლარი. გამოძიება სისხლის სამართლის კოდექსის 178-ე მუხლით მიმდინარეობს, რაც ძარცვას ... ...
  • იმერეთში ახალგაზრდა მამაკაცი მოკლესტყიბულში ახალგაზრდა მამაკაცი მოკლეს. არსებული ინფორმაციით, გვიან ღამით ქალაქის ცენტრში ორი მამაკაცი ერთმანეთს დაუპირისპირდა, კონფლიქტის დროს კი ერთმა მეორეს სასიკვდილო ჭრილობა მიაყენა. გარდაცვლილი მამაკაცი თერჯოლის მკვიდრია. მომხდარზე გამოძიება 108-ე მუხლით დაიწყო, რაც განზრახ მკვლელობას ... ...
  • რუსთავში, საცხოვრებელი კორპუსის მესამე სართულიდან კაცი გადმოვარდარუსთავში, საცხოვრებელი კორპუსის მესამე სართულიდან კაცი გადმოვარდა. ის უგონო მდგომარეობაში რუსთავის ცენტრალურ საავადმყოფოში გადაიყვანეს. დაშავებული მამაკაცის მდგომარეობა მძიმეა. მომხდარზე გამოძიება 115-ე მუხლით მიმდინარეობს, რაც თვითმკვლელობამდე მიყვანას ... ...
  • Air France-მა საქართველოს მიმართულებით რეგულარული ფრენები განაახლაფრანგულმა ავიაკომპანია Air France-მა საქართველოს მიმართულებით რეგულარული ფრენები განაახლა. ამის შესახებ ინფორმციას ,,ტავ ჯორჯია“ ავრცელებს. როგორც „ტავ ჯორჯია“-ში აცხადებენ, პარიზიდან თბილისში უკვე 178 მგზავრი ჩამოფრინდა. ავიაკომპოანია Air France  ფრენებს ,,ეარბას“ A320 და A321  ტიპის ხომალდებით კვირაში ორი სიხშირით იფრენს, რომელიც  შემდეგი განრiგით შეასრულებს ავიამიმოსვლას:  პარიზი(შარლ დე გოლის აეროპორტი)  - თბილისის მიმართულებით, ყოველ ოთხშაბათსა და შაბათს; თბილისი-პარიზის (შარლ დე გოლის აეროპორტი) მიმართულებით ყოველ ხუთშაბათსა და კვირას.   ... ...

არქივი

ტესტები

ტესტი _ რამდენად ერკვევი სხვადასხვა სფეროში

რომელია ყველაზე პატარა სახელმწიფო მსოფლიოში?

ტესტი _ გაქვს თუ არა კარგი ზოგადი განათლება?

რომელ ცნობილ მეცნიერს მიენიჭა 1921...

ტესტი _ იცნობ თუ არა ქართულ მხატვრობას?

გამოიცანი, ვისია ეს ნახატი

ტესტი _ იცი თუ არა ფეხბურთის ისტორია

ვის გაუტანა 1986 წელს მარადონამ...

ტესტი _ რა იცი მსოფლიოს ღირშესანიშნაობების შესახებ?

რომელმა ქვეყანამ აჩუქა აშშ-ს თავისუფლების...

ტესტი _ ყველაზე, ყველაზე...

იცი თუ არა გეოგრაფია

ტესტი _ შენ და საქართველოს ისტორია

საქართველოს რომელი მეფე დასაჯეს სიკვდილით...

კარმიდამო ჩემი

დროა, მივეჩვიოთ ბუნებრივი რესურსების ეკონომიურად ხარჯვას

პლანეტის გლობალური კლიმატური ცვლილებები ბევრ...

როგორ მოვრწყოთ ვარდები _ ნუ გამოვიყენებთ სუფთა წყალს

ყვავილები, განსაკუთრებით, ვარდები, ყველას უყვარს....

ჩითილების მომზადება კოშტების და ნახერხის დახმარებით

ჩვენი გამოცდილი მეურნეები, სხვადასხვა ხალხურ...

რომელი მცენარეა ფშატი?

ჩვენი არა ერთი მკითხველის გვთხოვს,...

ხალხური მედიცინა დეზინფექციისთვის

სისუფთავის ხარისხი იქ, სადაც ადამიანი...

"საშობაო ლიქიორის" მომზადების ყველაზე შედეგიანი მეთოდი

ძალზე პოპულარული, "საშობაო ლიქიორის" მომზადების...

ყაბაყის ტორტი

საჭირო მასალა: ორი ცალი ყაბაყი,...

სტაფილოს სალათი ცერეცოთი

საჭირო მასალა: სამი ცალი სტაფილო,...

სოკოს სალათი შებოლილი ქათმის ხორცით

ეს უგემრიელესი სალათი უნდა მოვამზადოთ...