ხამანწკებიდან _ ვაშინგტონის სახელით აფიორამდე

მთავარი თემა

ხამანწკებიდან _ ვაშინგტონის სახელით აფიორამდე

2018 ივნ 15 15:33:51

ბიზნესიდეების დაფინანსება 10 ლარად _  ეს ინფორმაცია გასული წლის ბოლოს გურიაში კარდაკარ გავრცელდა. მოსახლეობას ამის შესახებ მერის წარმომადგენლებმა და დეპუტატებმა უამბეს, რომლებმაც იდეების დამფინანსებელი ფონდის კონტაქტები, ერთ ფურცელზე დატეული განაცხადის ფორმაც დაარიგეს. 10-ლარიანი განაცხადის ეს ფორმები "ფინანსების გამცემი" ფონდის გურიის წარმომადგენლებმა ადმინისტრაციულ შენობებში გამართული შეხვედრების დროს გადასცეს.

ამ ამბავმა იმდენად დიდი ინტერესი გამოიწვია _ განაცხადის უმარტივესი ფორმა ათეულობით ადამიანმა შეავსო და ფონდის ანგარიშზე 10-10 ლარიც შეიტანეს:

_ ეს რა კარგი ფონდი გამოჩნდა! 10 ლარს შეიტან, შენს იდეას ჩაწერ და დაგაფინანსებენ _ ეზოს შეგიღობავენ, ბოძებს დაგიდგამენ, ფუტკრის სკებს შეგიძენენ, _ ამბობდნენ გურიაში.

იმ ადამიანებისთვის, რომლებსაც ერთხელ მაინც ჰქონიათ დონორ ფონდებთან შეხება, ეს ამბავი თავიდანვე საეჭვო იყო, რადგან არც ერთი სოლიდური და ავტორიტეტული ფონდი განაცხადის შევსებაში გადასახადს არ ითხოვს.

"გურია ნიუსი" დეტალების გარკვევას ე. წ. პროექტში ჩართვით ეცადა.

როგორც გავარკვიეთ, ამ ფონდის გურიის წარმომადგენლობის ხელმძღვანელი, ლანჩხუთის ყოფილი გამგებელი გია გოგუაძე იყო, რომელიც თანამშრომლებთან ერთად, შეხვედრებს, როგორც მუნიციპალიტეტის პირველ პირებთან, ასევე, რწმუნებულებთან და დეპუტატებთან მართავდა.

ჩოხატაურის მუნიციპალიტეტის გამგებლის ირაკლი კუჭავას თქმით, გია გოგუაძე სოფლის წარმომადგენლებთან შეხვედრის თხოვნით დაუკავშირდა:

დაგვიკავშირდა ბატონი გია გოგუაძე არასამთვრობო ორგანიზაციის _ მრავალმხრივი დიპლომატიის ინსტიტუტის“ სახელით და გვითხრა, რომ იწყებოდა პროექტის გახორციელება სათაურით _ ამერიკელების ფული ქართველი ხალხისთვის. თხოვნა იყო სოფლის წარმომადგენლებთან შეხვედრა ინფორმაციის გადაცმის მიზნით, რაც გახორციელდა კიდეც.

ბატონ გიას თან ახლა აკაკი სიხარულიძე, რომელიც გოგუაძის განმარტებით, მას შემდეგ რაც ორგანიზაციის გურიის ფილიალი დაფუძნდებოდა იქნებოდა გაცემული გრანტების უსაფრთხოებისა და მონიტორინგის ნაწილში. სხვა ამ ორგანიზაციის საქმიანობის შესახებ, ინფორმაცია არ გაგვაჩნია, _ გვითხრა კუჭავამ.

სიტუაციაში რომ უკეთ გავრკვეულიყავით, პირადად გია გოგუაძეს დავურეკეთ, ფონდის შესახებ ვკითხეთ და ვთხოვეთ, აეხსნა, როგორ შეგვევსო განაცხადი.

გოგუაძე დაგვპირდა, რომ ჩოხატაურში ჩამოსვლისთანავე შეგვხვდებოდა, მაგრამ არ გამოჩენილა, თუმცა, გამოჩნდა ჩოხატაურის მუნიციპალიტეტის მერიაში, სადაც ჯერ ხელმძღვანელ პირებს, შემდეგ კი მერის წარმომადგენლებს შეხვდა.

გოგუაძესთან ერთად, შეხვედრაზე უშიშროების ყოფილი თანამშრომელი აკაკი სიხარულიძე და ფონდის სხვა თანამშრომლებიც იყვნენ.

ასე იყო სხვა მუნიციპალიტეტებშიც _ მოქალაქეებს შეხვდნენ, დააჯერეს, განაცხადებიც შეავსებინეს და თანხაც გადაახდევინეს.

გავიდა თვეები, თუმცა, დაფინანსება ვერავინ მიიღო. პარალელურად, ფონდის დამფუძნებლებს და პარტნიორებს შორის განხეთქილება მოხდა და ითქვა, რომ ადგილი ჰქონდა თაღლითობას.

გაირკვა ისიც, რომ "იდეების განვითარების ფონდს" გამოეყვნენ ამერიკაში მცხოვრები, ბიზნესმენად ცნობილი დავით კარტოზიას ნდობით აღჭურვილი პირები, რომლებმაც "იდეების განვითარების ფონდის" სახელით, ცალკე ოფისები დააარსეს.

რეესტრში ეს ფონდები რეგისტრირებულია, როგორც _ "ზეიტერ სამეგრელო", "ზეიტერ გურია", "იდეების განვითარების ფონდი _ კახეთი" და ა. შ.

"იდეების განვითარების ფონდის" დირექტორმა დიანა სახურიამ "ბიზნესპრესნიუსთან საუბრისას" აღნიშნა, რომ რადგან ეს სახელი დაპატენტებული არ ჰქონდა, ვერაფერი მოიმოქმედა, რომ იმავე სახელით სხვა ფონდი არ დარეგისტრირებულიყო.

აღსანიშნავია, რომ "ზეიტერ სამეგელოსა" და "ზეიტერ გურიას" გარდა, არსებობს "ზეიტერ თელავი", "ზეიტერ ქვემო ქართლი", "ზეიტერ ჯორჯია" და თქვენ წარმოიდგინეთ, "ზეიტერ საბერძნეთიც" კი.

სახურიამ გამოცემასთან იმ სქემაზეც ისაუბრა, თუ ვინ და რაში იღებდა ფულს ფერმერებისგან და ვისი გრანტით უნდა მომხდარიყო მათი დახმარება. როგორც მან აღნიშნა, უშუალოდ მის ფონდში 10-ლარიანი მოსაკრებელი 6 ათასამდე ფერმერს აქვს შეტანილი. რაც შეეხება იმ საკითხს, თუ რა ბედი ეწია ამ 6 ათასამდე ფერმერს და მათ მიერ გადახდილ თანხას, სახურიამ თქვა, რომ მათთვის თანხის დაბრუნება ასე მარტივად ვერ მოხერხდებოდა, რადგან თანხის ნაწილი ამერიკაში იყო გადაგზავნილი. თუმცა, მისი თქმით, ყველასთან ჰქონდათ საუბარი და აუხსნა, რომ ფონდი ცდილობს, სხვადასხვა ქვეყნის საელჩოებს თუ ორგანიზაციებს მოელაპარაკოს და მათ გრანტის მიღებაში მაინც დაეხმაროს: 

"ფერმერების მიერ შემოტანილი თანხა საქართველოში ფონდის ანგარიშზე ირიცხებოდა, საიდანაც 30% -ს ამერიკაში დავით კარტოზიას ვურიცხავდით. ორჯერ კი თანხა ვინმე ივი სარმიენტოსთან გადავგზავნეთ. რაც შეეხება სქემას, თუ როგორ ხდებოდა ფერმერებთან მუშაობა: ფერმერს შემოქონდა იდეა, შემდეგ ამ იდეებს დარგების მიხედვით ვანაწილებდით და ამერიკაში კარტოზიას ვუგზავნიდით, რადგან პროექტები იქ უნდა შექმნილიყო. ამისთვის ირიცხებოდა ფერმერების მიერ შემოტანილი თანხის 30%-იც.

რაც შეეხება გრანტებს, თანხების მობილიზებაზე ამერიკაში არსებულ ორგანიზაციას _ IMTD-ს უნდა ეზრუნა, რომლის დირექტორიც კერინ დიკმარი იყო. მისი გამოგზავნილი დოკუმენტიც მაქვს, რომელზეც მხოლოდ ხელმოწერაა და არანაირი ბეჭედი. სწორედ ამ ორგანიზაციას უნდა უზრუნველეყო დონორებზე გასვლა და დაფინანსების მოპოვება. აღსანიშნავია, რომ კარტოზიასთან თანამშრომლობის გაწყვეტამდე, კერინს ორჯერ ველაპარაკე და დამპირდა, "ყველაფერი იქნებაო". ამის შემდეგ არანაირი ურთიერთობა აღარ გვქონია. მცდელობის მიუხედავად, მასთან ურთიერთობა ვერ მოვახერხეთ, რადგან მის "ფეისბუქს" და "სკაიპს" უკვე კარტოზია პასუხობს", _ ამბობს სახურია. 

სახურიას საუბრიდან კარგად ჩანს, რომ ფონდს არავითარი საგრანტო დაფინანსება არ ჰქონდა და უკეთეს შემთხვევაში, სხვადასხვა დონორთან მოლაპარაკებას შემდგომ გეგმავდა.

ჩვენ დავინტერესდით, თუ რას ნიშნავდა სახელწოდება _ "ზეიტერი" და ხომ არ ჰქონდათ მსოფლიოს რომელიმე ქვეყანაში საქართველოში დარეგისტრირებულ "ზეიტერებს" სათაო ოფისი, თუმცა, მსგავსი დასახელების მხოლოდ ერთ ორგანიზაცია მივაგენით _ აშშ-ში, კალიფორნიაში "ზეიტერი" სამედიცინო დაწესებულებას ჰქვია. ამის შემდეგ "ზეიტერ გურიას" დამფუძნებელს გია გოგუაძეს დავუკავშირდით, რომელმაც გვითხრა, რომ "ზეიტერი" აბრევიატურაა და "დროს, სისწრაფეს და ხარისხს" ნიშნავს, თუმცა, რომელ ენაზე, ეს ვერ გავარკვიეთ.

კარტოზიასთან დაკავშირება "გურია ნიუსმა" არა ერთხელ სცადა. მიუხედავად იმისა, რომ ის ჩვენს გზავნილებს ნახულობდა, პასუხი არც ერთ კითხვაზე არ მოგვწერა. კარტოზიამ, ასევე, უპასუხოდ დატოვა კითხვა, როგორ და ვისი მეშვეობით შეარჩია გურიის წარმომადგენლობა.

კარტოზიასთან განსხვავებით, კითხვებზე გვიპასუხა გია გოგუაძემ, რომელიც კარტოზიას გუნდის წევრია. ყოფილი გამგებელი, "ნაციონალური მოძრაობის" ლიდერი და ახლა უკვე ფონდის გურიის ოფისის ხელმძღვანელი ამბობს, რომ არანაირი თაღლითობა არ ხდება:

_ 2 ივნისს მოგვივიდა მოწვევა რეგიონის ოფისების ხელმძღვანელებს და ამერიკაში მივდივართ, ფონდის სათაო ოფისში. ეს რომ თაღლითობა იყოს, როგორ წავიდოდი?! _ გვითხრა გია გოგუაძემ.

მისივე თქმით, გურიაში სულ 500 განაცხადი აქვს მიღებული:

_ ყველა განაცხადი გადაგზავნილია ამერიკის ოფისში. მონიტორინგიც დაწყებული გვაქვს. ჩვენთვის არა რაოდენობა, არამედ ხარისხია მთავარი. დაახლოებით 50 ადამიანს ფული არ გადავახდევინე მე პირადად _ ავიღე საკუთარ თავზე, რადგან სოციალურად დაუცველები იყვნენ, _ ამბობს გოგუაძე.

კიდევ ერთი დეტალი, რის გარკვევაც ჩვენ გვაინტერესებდა, ის იყო, თუ რატომ ჩაერთნენ ამ ამბავში უშიშროების სამსახურის ყოფილი თანამშრომლები, რომლებიც შეხვედრებზე ამბობდნენ, რომ ეს ამერიკის მთავრობის (USAID-ის) მოთხოვნა იყო.

_ ბატონი აკაკი სიხარულიძე წარმოადგენს უსაფრთხოების სამსახურს. მის შესახებ ოფისიდან დამირეკეს და მითხრეს, რომ ჩვენთან იქნებოდა. უშუალოდ ჩემთან არ მუშაობს _ ამ განვითარების ფონდის ცენტრალური ოფისის უსაფრთხოების სამსახურია. მათ უფრო მეტი საქმე გრანტების გაცემის შემდეგ ექნებათ. მარტივად რომ ვთქვათ, კონტროლი ევალება, რომ, ვთქვათ, მე და გრანტის მიმღები გარიგებაში არ შევიდეთ, _ გვითხრა გოგუაძემ.

ფონდის გურიის ოფისის ხელმძღვანელისგან განსხვავებულ ინფორმაციას გვაწვდის აკაკი სიხარულიძე: კითხვაზე, რა სტატუსით ესწრებოდა შეხვედრებს, ამბობს, რომ არც სტატუსი და არც შეხება ამ ფონდთან არ აქვს:

_ შეხვედრებზე ვიყავი. კი, მაინტერესებდა... არაფორმალური პოზიციით(?!). მერიაში გიას ვახლდი. მაშინ, იქ მაშინ მისულთაგან არავის ჰქონდა სტატუსი. არსებობდა მონახაზი, _ გვითხრა აკაკი სიხარულიძემ.

კითხვაზე, აქვს თუ არა ინფორმაცია ფონდის თაღლითური სქემის შესახებ, რომელზეც თვეებია, ბევრი იწერება, გვიპასუხა, რომ ინფორმაციის გადამოწმება Google-ში შეგვიძლია:

"ნახეთ ზეიტერი გუგლში და მოისმენთ, ნახავ, იმდენი რამ დევს", _ ამბობს სიხარულიძე.

_ ბატონო აკაკი, ეს რომ ვნახეთ, იმიტომაც გვაქვს შეკითხვები.

_ არ ვიცი. ჰკითხეთ გია გოგუაძეს. მან ჩემზე ასჯერ მეტი იცის, _ გვითხრა სიხარულიძემ და დაგვპირდა, რომ "თუ რამე იქნა სიახლე ან თუ სტატუსს მოიპოვებს", გაგვაგებინებს.

ის, რის თქმაც სიხარულიძემ არ ისურვა, გვითხრა გოგუაძემ _ მისი ინფორმაციით, აკაკი სიხარულიძესთან ფონდის საქმეებზე ბოლო საუბარი მაისის შუა რიცხვებშიც ჰქონდა:

_ რა თქმა უნდა, ფონდის საქმეებზე ვისაუბრეთ. ის უშუალოდ ჩემი თანამშრომელი არ არის და ვიცი, რომ სამომავლოდ უსაფრთხოების სამსახურს წარმოადგენს. ესენი საზოგადოებრივ საწყისებზე არიან. ჩვენც საზოგადოებრივ საწყისებზე ვართ.

_ ბატონი აკაკი ამბობს, რომ ფონდთან შეხება არ აქვს...

_ შეიძლება, უშუალოდ ჩვენს ფონდთან შეხება არ აქვს და არ ერევა რაღაცეებში, მაგრამ ცენტრალური ოფისიდან დამირეკეს და შეხვედრებზე დადის, _ დაგვიზუსტა გია გოგუაძემ.

ამ საუბრის შემდეგ, ჩვენ კიდევ ერთხელ ვცადეთ დავით კარტოზიასთან დაკავშირება და იმის გარკვევა, რატომ ჩართეს ფონდის საქმიანობაში უშიშროების ყოფილი თანამშრომლები და რის საფუძველზე პირდებიან ადამიანებს დაფინანსებას. კომუნიკაცია არც ამჯერად შედგა _ კარტოზია არ გვესაუბრება, მის ფეისბუქზე გამოქვეყნებული ერთ-ერთ ინტერვიუში კი ამბობს, რომ მის ორგანიზაციას ფილიალები მხოლოდ საქართველოში არ აქვს. კარტოზია განაცხადის შეტანის საფასურს _ 10 ლარს "საწევროს" უწოდებს და აღნიშნავს, რომ ეს თანხა ნაწილდება:

"რაც შეეხება საწევრო გადასახადის თემას, ჩვენ რომ ამერიკიდან ფულით შემოვსულიყავით და ამ ორგანიზაციის გახსნა დაგვეწყო, ეს მონათლული იქნებოდა, როგორც პოლიტიკური ნაბიჯი, რის მცდელობებიც იყო. ამიტომ, ამის თავიდან ასარიდებლად და იმის დასამტკიცებლად, რომ სერიოზული ორგანიზაცია ვართ და ხალხის ნება-სურვილს ვეყრდნობით, შევქმენით თვითდაფინანსება. აქ იგულისხმება ის 10-ლარიანი საწევრო განაცხადი/გადასახადი, რომელიც შემოდის ორგანიზაციაში და ნაწილდება. კერძოდ, 5 ლარი მოდის ამერიკაში, 5 რჩება საქართველოში. ეს ყველაფერი კი სისტემის შექმნას ხმარდება", _ ამბობს დავით კარტოზია.

ამ ინტერვიუში კარტოზია იმასაც ამტკიცებს, რომ ამერიკის მთავრობა და USAID გამოდის წინადადებებით და ეკონომიკის აღორძინებისთვის გამოყოფს 20 მილიონ დოლარს:

"თუ ჩვენ მიერ გაჟღერებულ და USAID-ის მიერ დასახელებულ თემებს დააკვირდებით, ნახავთ, რომ ერთი-ერთში ემთხვევა ერთმანეთს. ეს 20 მილიონი არავისზე არაა მიმართული და საბუთს თუ წაიკითხავთ, დაინახავთ, რომ უნდა იყოს ახალი მიდგომები, ახალი სისტემები შექმნილი და სწორედ ამ სისტემას ვქმნით ჩვენ", _აღნიშნავს კარტოზია. 

კარტოზიას მტკიცებით, "მას შემდეგ, რას USAID-მა შეწყვიტა საქართველოსთვის გრანტების მიცემა, ჩატარდა კოლოსალური სამუშაო და ბოლო-ბოლო მივიღეთ შედეგი _ ოფიციალურად გამოცხადდა, რომ ამერიკის მთავრობა საქართველოს დახმარების სახით, პირველ ტრანშს გამოუყოფს 20 მილიონ დოლარს. ეს 20 მილიონი საწყისია იმ დიდი პროექტისა, რომლის გახორციელებაც აშშ-მ საქართველოში დაიწყო", _ ამბობს კარტოზია.

მისივე თქმით, "იმაში, რომ ეს აშშ-მ ეს პროექტი დაიწყო, დიდი დამსახურება მიუძღვის საქართველოს მთავრობას და მის (ანუ კარტოზიას) ჯგუფს" (??!!).

კარტოზიას მიერ გაკეთებული განცხადებების გადამოწმება ჩვენ ამერიკის შეერთებული შტატების საელჩოში ვცადეთ, სადაც გვითხრეს, რომ არც საელჩოს და არც USAID-ს ამ ადამიანთან არანაირი კავშირი არ აქვთ და კარტოზიას შესახებ მხოლოდ მედიით სმენიათ.

მკითხველს შევახსენებთ, რომ დავით კარტოზია, წლების წინ, ყოფილ პრეზიდენტს, მიხეილ სააკაშვილს "ლაზიკას" პროექტის იდეის მოპარვას ედავებოდა.

დავით კარტოზია მაშინ აცხადებდა, რომ პროექტი, რომლის თანახმადაც, 30-32 ათას მოსახლეზე გათვლილი "ლაზიკა" 22-ე საუკუნის, "მწვანე ქალაქი" უნდა ყოფილიყო და რომლის მცხოვრებლებიც, ძირითადად, ხამანწკების წარმოებაზე დასაქმდებოდნენ, საქართველოს მთავრობას 2010 წლის 16 დეკემბერს შესთავაზა, თუმცა, 2012 წლის 14 დეკემბერს შეიტყო, რომ "იდეა მოპარეს და პროექტს მიღმა დატოვეს". ამის შემდეგ, კარტოზიას, მისი თქმით, ივანიშვილთან თანამშრომლობა სურდა და მის გუნდშიც კი გეგმავდა გაერთიანებას.

ჩვენ ინტერნეტში გადავამოწმეთ და მოვიძიეთ "ზეიტერის" ვებგვერდი: zeiter.ge, თუმცა, ამ ვებგვერდზე ვერსად ვიპოვეთ, თუ რა სახის გრანტებს და რა პირობებით გასცემს აღნიშნული ორგანიზაცია; ვერც ის გავიგეთ, თუ რა მისია აქვს "ზეიტერს" და ვინ არიან მისი თანამშრომლები _ ღილაკი "ჩვენ შესახებ" არანაირ ინფორმაციას არ გვაძლევს. ვებგვერდზე განთავსებულია ვინმე ნინო ქობალიას ტელეფონის ნომერი და რაც მთავარია, ისევ განთავსებულია განაცხადის გაგზავნის ღილაკი, რომელზე დაწკაპუნებითაც გადადიხართ განაცხადის შევსების ფორმაზე, სადაც მუქი შრიფტითაა მითითებული ანგარიშის ნომერი, რომელზედაც უნდა გადარიცხოთ ათი ლარი! ამ მწირი ინფორმაციების ფონზე, აშკარად თვალშისაცემია ფოტო გალერეა, სადაც გამოქვეყნებულია სხვადასხვა რეგიონებში ფონდის შეხვედრების ფოტოები ადგილობრივ მოსახლეობასთან, მოქალაქეების პორტრეტები და სხვადასხვა თვალსაჩინო მასალა ყოველგვარი განმარტებების გარეშე.

ამ ყველაფრის პარალელურად, ქვეყანაში, დაახლოებით 30 000-მდე ადამიანი დაფინანსებას ელოდება. ეს ის ადამიანები არიან, რომლებმაც განაცხადი შეავსეს და 10-ლარიანი გადასახადიც გადაიხადეს.

მათ ამ თემაზე ღიად საუბარი არ სურთ, თუმცა, პირად საუბრებში არ მალავენ, რომ თაღლითობის მსხვერპლნი გახდნენ. უფრო მეტიც, როგორც გვითხრეს, გურიაში მცხოვრები რამდენიმე ადამიანი პროკურატურაში განცხადების შეტანასაც კი გეგმავს.

ჩვენი ინფორმაციით, ამ თემაზე მოკვლევა უკვე დაწყებული აქვს სახელმწიფო უსაფრთხოების სამსახურსაც _ როგორც ჩვენმა წყარომ გვითხრა, ეს და მსგავსი თაღლითობა საქართველოში დასავლური კურსის დისკრედიტაციისკენ არის მიმართული, რაც რუსეთის ინტერესებს ემსახურება: "არ არის გამორიცხული, ამ აფიორის უკან რუსეთის სპეცსამსახურები იდგნენ. საინტერესოა, სად არიან სამართალდამცავი ორგანოები, პროკურატურა, სახელმწიფო, როცა ქვეყანაში ასეთი მასშტაბური თაღლითობა ხდება, თანაც პარტნიორი ქვეყნის სახელით!" _ ამბობს ჩვენი წყარო.

საქართველოს პოლიტიკის ინსტიტუტის მკვლევარი, პოლიტოლოგი ლევან კახიშვილი "გურია ნიუსთან" საუბრისას ამბობს, რომ "თუ ეს ყველაფერი სიმართლეა და არავის არაფერზე აქვს კონკრეტული პასუხები, ნამდვილად მნიშვნელოვან ეჭვებს აჩენს მთელი აპლიკაციის პროცესი":

"საწევროს _ 10 ლარის გადახდა ერთი პირისთვის შეიძლება ბევრი არ იყოს, მაგრამ თუ მართლა 30 000 ადამიანს აქვს გადახდილი, ეს უკვე 300 000 ლარია, რაც უკვე აღარ არის მცირე თანხა. თუმცა, ისიც უნდა აღინიშნოს, რომ ეს 300 000 ლარი არც იმდენია, რომ დიდი მასშტაბების ფონდის თუნდაც ადმინისტრაციული ხარჯები შეინახოს მთელი ქვეყნის მასშტაბით, თან მაშინ, როგორც ამბობენ, როდესაც თანხის ნახევარი აშშ-ში მიდის. აქედან გამომდინარე, ნამდვილად შეიძლება საფუძვლიანი ეჭვი გაჩნდეს მთელი ამ სქემის რეალურობასთან დაკავშირებით.

გარდა ამისა, ის, რომ ინფორმაცია ხელმისაწვდომია მხოლოდ კონკრეტულ პირებთან საუბრებით და არ დასტურდება სხვა წყაროებით, დამატებით აჩენს ეჭვებს და ქმნის იმის შთაბეჭდილებას, რომ საზოგადოებისთვის ცნობილი ქვეყნებისა (აშშ) თუ ფონდების (USAID) სახელების გამოყენებით, მოცემული სქემის ავტორები ლეგიტიმურობის მოპოვებას ცდილობენ.

თუ სქემა თაღლითურია, რის გამოცდილებაც გვაქვს საქართველოში (მაგალითად, პირამიდას ტიპის ქსელები) და დავუშვებთ, რომ გამიზნულად და გაცნობიერებულად ხდება აშშ და USAID-ის სახელების გამოყენება, კონკრეტულად რა მიზანს შეიძლება ეს ემსახურებოდეს, რთულია თქმა. თუმცა, შეიძლება ორ ვერსიაზე საუბარი. ერთზე თქვენთან, როგორც აღნიშნეთ, წყაროც საუბრობს, რომ. შესაძლოა. საქართველოს პროდასავლური კურსის დისკრედიტაციაზე იყოს მომართული ეს ყველაფერი, რადგან 30 000 ადამიანის იმედგაცრუება და გაბრაზება მიმართული იქნება არა მხოლოდ ამ სქემის ავტორებისკენ, არამედ აშშ-ს მისამართითაც. ამის უკან რამდენად დგას რუსეთის სპეცსამსახურები, ეს კიდევ ცალკე საგანია და შესაბამისმა უწყებებმა უნდა გამოიძიონ. მეორე ვერსია არის უბრალოდ თაღლითური სქემისთვის სანდო სახელებისა და აქტიორების გამოყენება იმისთვის, რომ მათ მიმართ საზოგადოებაში არსებული ნდობა გახდეს საფუძველი სქემის მიმართ ნდობისა. ამ შემთხვევაში, სავსებით შესაძლებელია, რომ უფრო მაღალი პოლიტიკური დღის წესრიგი, შეიძლება, უბრალოდ არ არსებობდეს", _ ამბობს კახიშვილი.

მისივე თქმით, რუსეთის სპეცსამსახურების ვერსია იმ მოსაზრებით შეიძლება გამყარდეს, რომ თანხა რეალურად არ არის დიდი, თუ იმას გავითვალისწინებთ, რამდენი ადამიანია ფონდის ადმინისტრაციულ საქმიანობაში ჩართული და რამდენი შეხვედრის ჩატარება უწევთ მათ:

"შესაბამისად, ფინანსური დაინტერესება შეიძლება მინიმალურიც კი იყოს. ამიტომ, შეიძლება იმის ვარაუდი, რომ რეალობა უფრო მნიშვნელოვანია, ვიდრე ეს ერთი შეხედვით ჩანს. თუმცა, იმაზე უფრო მნიშვნელოვანი, ვიდრე იმის გარკვევა, დგას თუ არა რუსეთი ამ სქემის უკან, არის ის, თუ როგორ და რატომ ხდება, რომ საზოგადოების საკმაოდ დიდი ნაწილი მსგავს ხაფანგში (თუ დავუშვებთ, რომ ეს ყველაფერი ფულის გასაკეთებელი მანქანაა) ებმება; რა არის გასაკეთებელი იმისთვის, რომ საზოგადოების ცნობიერება გაიზარდოს იმასთან დაკავშირებით, რომ ფინანსური განათლება ჰქონდეთ, რომ ასე მარტივად არ დაიჯეროს მსგავსი იდეები. ეს უფრო მნიშვნელოვან პრობლემად მიმაჩნია, რადგან საზოგადოების დიდი ნაწილი ასეთი საეჭვო სქემების მიმართ არის მოწყვლადი. საჭიროა საზოგადოების მედეგობის გაზრდა და მათ განათლებასა და სოციალურ-ეკონომიკურ მდგომარეობაზე უფრო აქტიური მუშაობა, ვიდრე ეს ახლა ხდება", _ აღნიშნავს ჩვენთან საუბრისას ლევან კახიშვილი.




 ახალი ამბები
  • დეკანოზ მამალაძის ჯანმრთელობის მდგომარობის შესახებ პენიტენციური დაწესებულება განცხადებას ავრცელებსდეკანოზ მამალაძის ჯანმრთელობის მდგომარობის შესახებ პენიტენციური დაწესებულება განცხადებას ავრცელებს. "მსჯავრდებული გიორგი მამალაძე, წინასწარი დიაგნოზით ჰიპერტონული კრიზი, თავის ტვინის ტრანზიტორული ტიპის იშემიური შეტევა, N9 პენიტენციური დაწესებულებიდან სამოქალაქო სექტორის სამედიცინო დაწესებულებაშია გადაყვანილი. მიმდინარე წლის 15 თებერვალს, 18.38 საათზე გიორგი მამალაძემ შეუძლოდ იგრძნო თავი. დაწესებულების სამედიცინო პერსონალის მიერ მას 18.41 საათიდან გაეწია პირველადი სამედიცინო დახმარება და გამოძახებულ იქნა სასწრაფო სამედიცინო დახმარების ბრიგადა, ასევე ექიმი ნევროლოგი. 19.18 საათზე დაწესებულებაში სასწრაფო დახმარების ბრიგადა გამოცხადდა. მსჯავრდებულისთვის გადაღებულმა კარდიოგრამამ არსებითი ცვლილებები არ უჩვენა, რის გამოც გიორგი მამალაძის სტაციონარში გადაყვანა სასწრაფო დახმარების მედპერსონალმა საჭიროდ არ მიიჩნია. 21.35 საათზე დაწესებულების მედპერსონალმა კვლავ გამოიძახა სასწრაფო სამედიცინო დახმარების ბრიგადა, რის შედეგადაც მსჯავრდებული შემდგომი კვლევებისათვის სამოქალაქო სექტორის კლინიკაში მოთავსდა", _ ნათქვამია ... ...
  • ბესელია: ჩემი გვარი კომიტეტზე მომხსენებლთა სიიდან ამოიღეს„დეკემბერში განვსაზღვრეთ... ამის შემდეგ 15 თებერვალს მე მივიღე დღის წესრიგი, სადაც შეცვლილი იყო ის, რაზეც შევთანხმდით დეკემბერში. მე პასუხი ელექტრონული ფორმითვე დავაბრუნე და მოვითხოვე შეთანხმებულ საკითხებზე ვყოფილიყავი ისევ მომხსენებელი, ამის შემდეგ თავიდან გადმომეგზავნა ისევ დღის წესრიგი, სადაც ჩემი მოთხოვნა გათვალისწინებული არ იყო და იგივე ვერსია იყო, რაც დღეს აქ არის დარიგებული. ვინ გადაწყვიტა ეს?! - ამ კითხვაზე მაინტერესებს პასუხი. ამ ახალი დღის წესრიგით ვარ ოთხი საკითხის მომხსენებელი, მათ შორის დაგიმატებიათ იარაღის შესახებ პროექტი. მე მაშინაც ვთქვი და ვიმეორებ, მე არ მიყვარს იარაღი, არ მომწონს ეს თემა და არც ვიცი ეს საკითხი კარგად, სხვა ტიპის იარაღს ვცნობ - უფრო პოლიტიკურს და სამართლებრივს. არ ვიცი ამ კანონპროექტს რატომ მიმაწერეს საერთოდ“, - განაცხადა ეკა ბესელიამ და სხდომიდან წამოსულ რეპლიკაზე, რომ კარგი იქნება, თუ ისწავლის ამ თემას, ბესელიამ უპასუხა: “სხვა რაღაცების სწავლა სჯობს, ეგ ვისაც სჭირდება იმან ისწავლოს“, - თქვა ბესელიამ. ასევე იურიდიულ საკითხთა კომიტეტის სხდომაზე ლევან გოგიჩაიშვილსა და ანრი ოხანაშვილს შორის შელაპარაკება მოხდა. როგორც ლევან გოგიჩაიშვილმა განაცხადა, მისი გვარი ამოღებულია ორი კანონპროექტიდან, სადაც ის გეგმის თავდაპირველი ვარიანტით პასუხისმგებელ პირთა შორის იყო. „ჩამწერეთ ისე, როგორც აქამდე ეწერა და მოიქეცით ისე, როგორც უნდა იქცეოდეს პარლამენტის წევრი“, - მიმართა გოგიჩაიშვილმა ანრი ოხანაშვილს. ოხანაშვილი კი განმარტავს, რომ კომიტეტის სამოქმედო გეგმის ფარგლებში გათვალისწინებულ კანონპროექტებზე ყველა დეპუტატი, როგორც კომიტეტის პასუხისმგებელი პირი, მათი სურვილის მიხედვით შეირჩა. შეკამათების შემდეგ ლევან გოგიჩაიშვილმა იურიდიული საკითხთა კომიტეტის სხდომა დატოვა, თუმცა მოგვიანებით უკან დაბრუნდა. საპარლამენტო უმრავლესობის წევრის ეკა ბესელიას განცხადებით,  მოსამართლეთა უვადოდ დანიშვნასთან დაკავშირებული, ცხრა დეპუტატის მიერ ინიცირებული კანონპროექტის განხილვის პროცესი ჭიანურდება.  9 დეპუტატმა „საერთო სასამართლოების შესახებ“ კანონში ცვლილებები მოამზადა, რომლის გათვალისწინებით, რაიონულ და სააპელაციო სასამართლოებში მოსამართლეთა უვადოდ გამწესება 2024 წლის 31 დეკემბრამდე უნდა შეჩერდეს. კანონპროექტს ხელს აწერენ დაპუტეტები: ეკა ბესელია, ზვიად კვაჭანტირაძე, ალექსანდრე ერქვანია, გედევან ფოფხაძე, კობა ნარჩემაშვილი, ლევან გოგიჩაიშვილი, ლევან კობერიძე, დავით ჭიჭინაძე და ოთარ ჩრდილელი. წყარო: ... ...
  • „ბიძინა ივანიშვილისკენ თითის გაშვერა ტრადიციად იქცა, ბრალდებებს მტკიცებულებები სჭირდება“_ ზაქარეიშვილი„ქართული ოცნების“ წევრებს, მხოლოდ და მხოლოდ, ხელისუფლებაში ყოფნისა და ბიძინა ივანიშვილთან კარგი ურთიერთობის დამყარების სურვილი აერთიანებთ, მათ არც საქართველოს ინტერესები, არც ქართული ეკონომიკა, არც საერთაშორისო ურთიერთობები და კონფლიქტების დაძლევაზე ზრუნვა არ ადარდეთ“, _ აღნიშნა „გურია ნიუსთან“ შერიგებისა და სამოქალაქო თანასწორობის საკითხებში ყოფილმა სახელმწიფო მინისტრმა პაატა ზაქარეიშვილმა.  ზაქარეიშვილი „თიბისი ბანკის“ ირგვლივ განვითარებულ მოვლენებსაც გამოეხმაურა. მისი თქმით „ძალიან იოლია ბიძინა ივანიშვილის მისამართით გაიშვირო თითი და ყველაფერი მას დააბრალო, რაც ტრადიციად იქცა, მაგრამ ბრალდებებს მტკიცებულებებით დადასტურება სჭირდება“. _ ბატონო პაატა, საქართველოს ეროვნულმა ბანკმა "თიბისი ბანკის“ სამეთვალყურეო საბჭოდან ბანკის დამფუძნებლის მამუკა ხაზარაძისა და მისი მოადგილის, ბადრი ჯაფარიძის გასაწვევა მოითხოვა. პარალელურად, უკანონო შემოსავლის ლეგალიზაციის ფაქტზე გამოძიება მიმდინარეობს პროკურატურაში, საქმე ბანკის მიერ 2007-2008 წლებში გახორციელებულ ტრანზაქციებს ეხება. პოლიტიკოსთა ნაწილი ფიქრობს, რომ ბრძოლა ბანკის ხელმძღვანელების მიმართ პოლიტიკურად არის მოტივირებული. თქვენ რას უკავშირებთ „თიბისი ბანკის“ ირგვლივ განვითარებულ მოვლენებს? _ მამუკა ხაზარაძის განცხადება, რომელშიც „თიბისი ბანკის“ დამფუძნებელი აღნიშნავს, რომ საქართველოში პროგრესს შიდა ძალები ებრძვიან, ნამდვილად შემაშფოთებელია. საბანკო სისტემებში ნაკლებად ვერკვევი, თუმცა ნათლად ჩანს, რომ „თიბისი ბანკთან“ დაკავშირებით მიმდინარე პროცესები, პირველ ყოვლისა, საქართველოს რეპუტაციას დიდ ზიანს აყენებს. ფაქტია, საქართველოს ეკონომიკის განვითარება დიდი საფრთხის წინაშე დგება. დღეს ძალიან იოლია ბიძინა ივანიშვილის მისამართით გაიშვირო თითი და ყველაფერი მას დააბრალო, რაც ტრადიციად იქცა, მაგრამ ბრალდებებს მტკიცებულებებით დადასტურება სჭირდება. ყოველივე ამის გათვალისწინებით, აღნიშნულ საქმეში მეტი სიცხადის შეტანაა საჭირო. _ ოპოზიციურმა სპექტრმა საარჩევნო სისტემის შეცვლის მიზნით მილიონი ხელმოწერის შეგროვება დაიწყო. როგორ ფიქრობთ, მმართველი პარტია მაჟორიტარული სისტემის გაუქმებასა და მთლიანად პროპორციულ საარჩევნო სისტემაზე გადასვლას დასთანხმდება ? _ მმართველ პარტიაში, ჯერჯერობით, სურვილი არ აქვთ, რომ მთლიანად პროპორციულ საარჩევნო სისტემაზე გადავიდნენ, თუმცა გააჩნია, გაერთიანებული ოპოზიცია როგორ მოიქცევა. თუ ოპოზიცია მოახერხებს, რომ 50 ათასი ადამიანი ქუჩაში გამოიყვანოს, მაშინ ხელისუფლებას დათმობაზე წასვლა მოუწევს, მაგრამ ჩანს, რომ საზოგადოებისთვის მაჟორიტარული სისტემის გაუქმება არ არის პრინციპული საკითხი და ნათელია, რომ აღნიშნული მოთხოვნით ხალხი ქუჩაში არ გამოვა. დიდი ალბათობით, „ქართული ოცნება“ 2020 წლის საპარლამენტო არჩევნებში შერეულ საარჩევნო სისტემას შეინარჩუნებს, რაც მათივე პარტიისთვის იქნება დამამძიმებელი გარემოება. _ “ქართული ოცნების“ ლიდერები ოდიოზური მოსამართლეების მხარდაჭერას კვლავ აგრძელებენ. მართლმსაჯულებათან დაკავშირებული პრობლემები არის საკითხი, რომელსაც საზოგადოება “ქართულ ოცნებას“  2020 წლის საპარლამენტო არჩევნებში არ აპატიებს? _ თუ „ქართული ოცნების“ მხრიდან ოდიოზური მოსამართლეების მისამართით არაჯანსაღი დამოკიდებულება გაგრძელდება, მმართველი პარტია 2020 წლის საპარლამენტო არჩევნებში კარგ შედეგს ნამდვილად ვერ მიიღებს. მმართველ პარტიას, ბუნებრივია, სურს თანამდებობებზე მოსამართლეები უვადოდ დროულად განამწესოს, რადგან 2020 წლის საპარლამენტო არჩევნებში ამ მოსამართლეების მხარდაჭერა დასჭირდებათ. „ქართულ ოცნებას“ სასამართლო სისტემაში ისეთი მოსამართლეების ყოფნა სჭირდებათ, რომლებიც ნებისმიერ გადაცდომას სამართალდარღვევად არ  გაუფორმებენ. „ქართული ოცნება“ ასეთი არაგონივრული დამოკიდებულებით, პირველ ყოვლისა, საკუთარ გუნდსა და საქართველოს მომავალს აზარალებს. _“ნაციონალური მოძრაობის“ მმართველობის პერიოდში სასამართლო სისტემა მთლიანად ხელისუფლებას ემორჩილებოდა და ფაქტი იმის შესახებ, რომ „ქართულმა ოცნებამ“  სასამართლო სისტემაში არსებულ კლანს წინა რეჟიმის მსხვერპლი მოსამართლეების მანტიები მოარგო, რაზე მეტყველებს? _“ქართულმა ოცნებამ“ „ნაციონალური მოძრაობის“ გზა აირჩია. ხელისუფლებაში დარჩენის სურვილის გამო მათ სახელმწიფოს ინტერესები აღარ ადარდებთ. მმართველ გუნდს ჰგონია, რომ ხელისუფლებაში ყოფნა ჯილდოა, არა, ბატონებო, ეს დიდი პასუხისმგებლობაა. საზოგადოება, რომელმაც კარგად იცის, რა უნდა, ყოველ მანკიერ პროცესს შესაბამის პასუხს გასცემს. _ მმართველი პარტიის წევრებს შორის ურთიერთობა უფრო და უფრო იძაბება. 2020 წლის საპარლამენტო არჩევნებში გუნდი ისეთივე “ერთიანი“ იქნება, როგორც დღეს არის? _ ამჟამად „ქართული ოცნებიდან“ გამოსავალს არავინ ფიქრობს. ახლა ყველა საკუთარი პოზიციების გამყარებას ცდილობს. დღესდღეობით, ბიძინა ივანიშვილი ცდილობს გუნდი გაამაგროს. როგორც კი დადგება სიების შედგენის საკითხი, ბუნებრივია, გარკვეული ჯგუფები პარტიიდან კარების გამოჯახუნებით წავლენ. „ქართული ოცნების“ წევრებს, მხოლოდ და მხოლოდ, ხელისუფლებაში ყოფნის სურვილი და ბიძინა ივანიშვილთან კარგი ურთიერთობის დამყარება აერთიანებთ. მათ არც საქართველოს ინტერესები, არც საქართველოს ეკონომიკა, არც სიღარიბის დაძლევა, არც საერთაშორისო ურთიერთობები  და არც კონფლიქტების დაძლევის გზებზე ზრუნვა და მუშაობა ... ...
  • ურთიერთობის პროგრამა PLUS-ის უნიკალური PLUS გამოცდილება. ის, რასაც ფულით ვერ იყიდი (R)საქართველოს ბანკის, ქვეყნის წამყვანი ბანკის, ურთიერთობის პროგრამა PLUS-მა უნიკალური პროექტი - PLUS გამოცდილება დაიწყო. საქართველოს ბანკის ლოიალურ მომხმარებელს უკვე აქვს შესაძლებლობა, გახდეს PLUS გამოცდილების მთავარი გმირი და სულ სხვადასხვა ჟანრის თავგადასავლებში აღმოჩნდეს. უნიკალური პროექტის მიზანია, მომხმარებელს აღმოაჩენინოს ახალი, ჯერარგანცდილი ემოციები და მრავალფეროვანი გამოცდილება. PLUS გამოცდილების მიღება მხოლოდ PLUS ქულებით არის შესაძლებელი. საქართველოს ბანკის ერთგული მომხმარებელი დაგროვილ PLUS-ებს მარტივად გადაცვლის PLUS გამოცდილებაში. ამისთვის მომხმარებელი მხოლოდ უნდა ეწვიოს ვებგვერდს www.plus.ge თავგადასავლების ჩამონათვალი მრავალფეროვანია - მომხმარებელს შეუძლია, ეწვიოს თბილისში ყველაზე მაღალ წერტილს - ანძას და მოიწყოს პაემანი ღრუბლებთან. ასევე, გახდეს ნამდვილი დეტექტივი, აღმოაჩინოს მიწისქვეშა საიდუმლოებები. შესაძლებელია, ეწვიოს ახალ ზოოპარკს, ერთი დღით შეითავსოს ცხოველების მომთვინიერებლის პროფესია. ასევე, მიიღოს მონაწილეობა offroud-ში, ქუჩის არაჩვეულებრივ გამოფენაში, გახდეს პროფესიონალი მრბოლელი. საქართველოს ბანკი უნიკალურ გამოცდილებებს ექსკლუზიურად თვეში ერთხელ შესთავაზებს მომხმარებელს. ურთიერთობის პროგრამა PLUS-ი სპეციალურად საქართველოს ბანკის ერთგული მომხმარებლებისთვის შეიქმნა და ბევრ საბანკო თუ არასაბანკო ბენეფიტსა და პლუსს მოიცავს. საქართველოს ბანკის სადებეტო თუ საკრედიტო ბარათის გამოყენებით მომხმარებელი აგროვებს PLUS-ებს ნებისმიერ გადახდაზე, რომელთა გადაცვლაც შესაძლებელია: PLUS კატალოგის განსაკუთრებულ საჩუქრებზე - სხვადასხვა პროდუქტსა და მომსახურებაზე; უფასო მგზავრობაზე, კომუნალური მომსახურების, მობილურის ბალანსზე, ბენზინგასამართ სადგურში საწვავზე, სუპერმარკეტსა თუ აფთიაქში, სწრაფი კვების ობიექტებში სხვადასხვა პროდუქტზე. ამ ყველაფერთან ერთად ახლა უკვე შესაძლებელია PLUS ქულების გადაცვლა უნიკალურ PLUS გამოცდილებაზე. PLUS-ში ჩასართავად მომხმარებელი უნდა ეწვიოს საქართველოს ბანკის ნებისმიერ სერვისცენტრს და სრულიად უფასოდ ჩაერთოს PLUS-ის პროგრამაში. დაგროვილი PLUS-ების შესამოწმებლად საკმარისია, მომხმარებელმა აკრიფოს SMS ტექსტი – PLUS და გაგზავნოს ნომერზე – 4444. დამატებითი ინფორმაცია ურთიერთობის პროგრამა PLUS-ისა და PLUS გამოცდილების შესახებ იხილეთ: www. plus.ge ... ...
  • გარყვნილი ქმედებ 8 წლის გოგოს მიმართ _ დაკავებულს წინასწარი პატიმრობა შეუფარდეს8 წლის გოგოს მიმართ გარყვნილი ქმედების ფაქტზე დაკავებულს ბათუმის საქალაქო სასამართლომ წინასწარი პატიმრობა შეუფარდა. ადვოკატი გასაჩივრებას აპირებს.30 წლამდე კაცი მოსამართლის განჩინების საფუძველზე დააკავეს, მას გამოძიება არასრულწლოვნის მიმართ გარყვნილ ქმედებას ედავება. საქმეში ჩართულია სოციალური სააგენტო, ფსიქოლოგი და სახალხო დამცველის აპარატი.ბრალდებული უკრაინის მოქალაქეა. იგი სამუშაოდ აჭარაში რამდენიმე წლის წინ ჩავიდა. გარყვნილი ქმედების შესახებ 8 წლის გოგოს დედამ ... ...

არქივი

ზაფრანი

ჰეგემონი ციფრები

ბედის ციფრის გამოთვლის ტექნიკა ჩვენი...

რატომ ეჩვენებათ მთვრალ მამაკაცებს ყველა ქალი ლამაზი

არსებობს ცნობილი რუსული გამოთქმა: ულამაზო...

დედამიწაზე ყველა ცოცხალი არსება გონიერი რომ გახდეს

ერთ მშვენიერ დღეს დედამიწაზე ყველა...

"ტატუ" იმუნურ სისტემას აუმჯობესებს

აქამდე ტატუს (სვირინგი) დანიშნულება, მხოლოდ...

როგორ გამოვიცნოთ პატიოსანი ადამიანი

ყველასთვის ცნობილია, რომ ბილწსიტყვაობა და...

როგორი მამაკაცი გჭირდებათ?

ქალების უმეტესობას მიაჩნია, რომ მამაკაცი,...
კარმიდამო ჩემი

როგორ უნდა იცხოვროთ ისე, რომ სიმსივნით არ დაავადდეთ

ადამიანები, რომლებიც სიმსივნით იტანჯებიან და...

ოხრახუშს უნარი აქვს განკურნოს დეპრესია, შიზოფრენია და ალცჰეიმერის დაავადება

ბიოაქტიური ნივთიერება, რომელსაც შეიცავს ოხრახუში,...

"ბარი უნდა იცნობდეს მთასა და საქმეზე შეყვარებული და-ძმას"

ოზურგეთის მუნიციპალიტეტის სოფელ მთისპირის მკვიდრი...

რა გავაკეთოთ შემოდგომის მიწურულს საკარმიდამო ნაკვეთებში

ნოემბერ-დეკემბერში აქტიური სამეურნეო სამუშაოები ძირითადად...

პესტიციდების გამოყენებისას უდიდესი სიფრხილეა საჭირო

არსებობს უნივერსალური პესტიციდები, რომლებსაც ერთდროულად...

სიმინდის მოვლა თავიდან უნდა ვისწავლოთ

სიმინდის მოვლა-მოყვანის წესებს დასავლეთ საქართველოს...

რატომ უნდა მოვაშენოთ ბატი

როგორც უხნესი ადამიანები ამბობენ, საქართველოში...

დედოფლის ყვავილს დედოფალივით მოვლა სულ არ სჭირდება

წარსულში ძალზე პოპულარული და მერე...

მოვამზადოთ ნესვის სასმელი

ნესვი გოგრისებრთა ოჯახის ერთ-ერთი ყველაზე...

თაფლის ღვინო _ "თაფლუჭა"

თაფლის ღვინო და არაყი უნიკალური...

"ზამთარშიც გაზაფხულს ვეძებ და "გატყავებულ" გარემოს ვმოსავ"

"კარმიდამო ჩემის" უამრავ რესპონდენტს შორის,...