იდენტობა თავშესაფარში მოხვედრის გამჭვირვალე და სამართლიანი პროცესის უზრუნველყოფისთვის საქართველოს სოციალურ მუშაკთა ასოციაციას მიმართავს. ასევე, მათ დახმარებას სთხოვს:
• საკვების და ტანსაცმლის რეგულარული შეგროვებაში
• ფინანსურ დახმარებაში და თანხების მოძიებაში სხვადასხვა საქველმოქმედო ღონისძიების ორგანიზების გზით
• ფსიქოლოგიური, სამედიცინო, სოციალური, იურიდიული და სხვა მომსახურების უსასყიდლოდ გაწევაში. ასევე, მეთვალყურეობა და უსაფრთხოების უზრუნველყოფა.
• თავშესაფრისთვის გრძელვადიანი განვითარების გეგმის შემუშავებაში (პროგრამებისა და სერვისების განვითარება, თავშესაფრის მოდელის ჩამოყალიბება
აღნიშნულ ინიციატივას დღეს საქართველოს ჯანდაცვის მინისტრი დავით სერგეენკო გამოეხმაურა და აღნიშნა, რომ “იდენტობის” ინიციატივა არ არის კოორდინირებული.
მისივე თქმით, საქართველოს ხელისუფლება მიესალმება ნებისმიერ ინიციატივას, რომელიც უსახლკარო ბავშვების დახმარებისთვის არის მიმართული, თუმცა ეს ყველაფერი უნდა იყოს მოქცეული საერთაშორისო კანონმდებლობისა და გამოცდილების ჩარჩოებში.
“ბავშვებზე ზრუნვა შედგება ორი მთავარი ფუნქციისგან, ეს არის ინფრასტრუქტურული და აღზრდის მეთოდები. ორივე დაფუძნებულია UNISEF-ის გამოცდილებაზე და საერთაშორისო და საქართველოს კანონმდებლობასთან მოდის რეგულაციაში. მათი აღზრდის მეთოდები შეთანხმებული უნდა იყოს საერთაშორისო დეკლარაციებთან და საქართველოს კანონმდებლობასთან. მივესალმებით ნებისმიერ ინიციატივას, რომელიც ამ ბავშვების დახმარებისკენ არის მიმართული, თუმცა ეს ყველაფერი უნდა იყოს მოქცეული საერთაშორისო კანონმდებლობისა და გამოცდილების ჩარჩოებში. ჩვენ მზად ვართ ასეთი თანამშრომლობისთვის, თუ ეს არ იქნება მექანიკურად, რომ სახლებს ავაშენებთ და შევუშვებთ იქ ბავშვებს. ეს ეწინააღმდეგება ორ საერთაშორისო კონვენციას – დეინსტიტუციონალიზაციას და აღზრდის მეთოდებს. თუ ეს პირობები იქნა დაკმაყოფილებული და ამაში სათაო დაწესებულება იქნება ჯანდაცვის სამინისტრო, სიამოვნებით ვითანამშრომლებთ ნებისმიერთან”, _ განაცხადა სერგეენკომ.
მინისტრის თქმით, ასეთი ინიციატივის განხორციელება არ უნდა მოხდეს იზოლირებულად და ის უნდა იყოს კომპლექსური.
“იდენტობა” გვთავაზობს, რომ გააკეთოს ეს იზოლირებულად, რომ სახლს ააშენებენ და შეუშვებენ. ეს უნდა მოხდეს კომპლექსურად და აუცილებლად გათვალისწინებული უნდა იყოს აღზრდის ის მეთოდი, რომელიც საერთაშორისო გამოცდილებითა და დეკლარაციებით რეგულირდება. არის ნათლად გაწერილი საერთაშორისო დეკლარაციები და კანონები, რომლის მიხედვითაც ნებისმიერი აქტივობა უნდა იყოს კოორდინირებული და არა იზოლირებული. მათი ინიციატივა არ არის კოორდინირებული და მოქცეული საერთაშორისო დეკლარაციებთან”, _ განახადა სერგეენკომ.
თუმცა, “ინდეტობის” წარმომადგენელი ირაკლი ვაჭარაძე “გურია ნიუსთან” საუბრისას აღნიშნავს, რომ მათ მიერ ინიცირებული პროექტის ფარგლებში არავის აღზრდა არ იგეგმება და ორგანიზაცია მხოლოდ იმას ცდილობს, რომ უსახლკაროები ზამთრის ცივი დღეების ქუჩაში გატარებისგან იხნან.
“არ ვაპირებთ არავის აღზრდას, უბრალოდ გვსურს მრავალშილიან ოჯახებსა და მათ, ვინც ქუჩებში იყინება თავშესაფარი მივცეთ. ჩვენ ვერ მოვახერხებთ ყველას დაკმაყოფილებას, ამიტომ პრიორიტეტი იქნება ის, ვიზეც სოციალური მუშაკები შედეგებს დადებენ. ბენეფიციარების შერჩევაში არ ჩავერევით
“პროექტს მოქალაქეები ვაკეთებთ, დონერები არ გვყავს. მსურველები ვაგროვებთ შემოწირულობებს – ფულს, საჭმელს, საცხოვრებლისთვის აუცილებელ ნივთებს, ტანსაცმელს. ვიმედოვნებთ შეგროვდება თანხა, ან გამოჩდება ორგანიზაცია, ვინც გაგვარემონტებინებს ფართს, რომელიც კერძო პირმა ახლადაშენებულ კორპუსში რამდენიმე წლით უსასყიდლოდ დაგვითმო. ესაა 80 კვადრატული შავი კარკასის ბინა, ბაგებში“, _ ამბობს “გურია ნიუსთან” საუბრისასა ვაჭარაძე.
მისივე თქმით, თუ სახელმწიფო სტრუქტურები თანამშრომლობაზე სურვილს გამოთქვამენ, ამის საწინააღმდეგო არაფერი აქვთ.
“იდენტობას” აღნიშნულ ინიციატივაში უკვე შეუერთდა “სამართლიანი არჩევნებისა და დემოკრატიის საერთაშორისო საზოგადოება”.
ორგანიზაციის აღმასრულებელი დირექტორი ნინო ლომჯარია აღნიშნავს, რომ ისინი თანამშრომლობის სახით მხარს უჭერენ “იდენტობის” ინიციატივას უსახლკაროებისათვის ზამთრის თავშესაფრის გახსნასთან დაკავშირებით.
“მიგვაჩნია, რომ სახელმწიფო ამ ეტაპზე ვერ ვერ უზრუნველყოფს უსახლკარო პირებისთვის სათანადო სოციალური დახმარების გაწევას, რათა ადამიანები ყინვისგან და შიმშილისგან არ დაიღუპონ, რასაც სამწუხაროდ შარშან ადგილი ჰქონდა.
ვფიქრობთ, რომ ეს არის არასამთავრობო ორგანიზაციების ძალიან დროული ინიციატივა, რომელშიც წვლილის შეტანა თითოეულ მოქალაქეს შეუძლია. მიგვაჩნია, რომ მსგავსი ინიციატივები ხელს შეუწყობს სამოქალაქო სოლიდარობის გრძნობის დანერგვას ქვეყანაში და კარგ პრეცედენტს შექმნის მომავალი საქველმოქმედო საქმიანობებისათვის. იმედს გამოვთქვამთ, რომ აღნიშნულ კეთილშობილურ საქმის მიმართ საზოგადოების დაინტერესება და ჩართულობა მაღალი იქნება.
ზოგადად, საზოგადოებას და ჩვენც, არასამთავრობო სექტორს გვაკლია ქველმოქმედების კულტურა, ეს არაა ჩვენი ცხოვრების ნაწილი და ძალიან მნიშვნელოვანია მსგავსი ინიციატივები.
ამაში ერთვება საზოგადოების ძალიან ფართო ფენები და ეს არ ხდება რაიმე გრანტით, ან სახლემწიფოს ხარჯზე. თითოეული ჩვენგანი რაღაცას ვიღებთ, რომ საბოლოოდ თანხა შეგროვდეს. ვფიქრობ, ეს წლების განმავლობაში უკვე გადავა ჩვევაში, გადავა კულტურაში. ძალიან მნიშვნელოვანია, რომ ბავშვობიდანვე შევეჩვიოთ ამ ტიპის კულტურას, ბავშვები აღვზარდოთ ისე, რომ თავადაც იყვნენ ჩართულები ქველმოქმედებაში”, _ განაცხადა ლომჯარიამ.
უსახლკაროებისათვის თავშესაფრის გაკეთებას მიესალმება საქველმოქმედო ფონდი “იავნანა”. ფონდის პროექტების მენეჯერი თეონა ჯორბენაძე ჩვენთან საუბრისას აღნიშნავს, რომ თუ კი ამ პროცესში სოციალური მუშაკების, ფსიქოლოგების ჩართულობა იქნება და დახმარებისთვის მათ ფონდს მიმართავენ, აუცილებლად მოეწყობა განხილვა.
“ჩვენ არ გვქონია შემთხვევა, რომ აგვეშენებინოს საერთოს საცხოვრებელი უსახლკაროებისთვის, მაგრამ სახლი, სხვა ტიპის საცხოვრებელი არაერთხელ შეგვიძენია და აგვიშენებია. როდესაც სოციალური მუშაკებიდან ჩვენ მოგვდის დასკვნა, რომ რომელიმე ოჯახში განგაშია და ძირითადად ეს მრავალშვილიან ოჯახებს ეხება, პრევენციულ პრეოქტებში ვიღებთ მონაწილეობას და ამ ოჯახისთვის საცხოვრებლის შეძენა ხდება.
ხშირად ვთანამშრომლობთ საერთაშორისო ორგანიზაციებთან, არასამთავრობოებთან, კერძო პირებთან. ფონდის მთელი საქმიანობა სწორედ იმაზეა აწყობილი, რომ ყველანი ერთად დავეხმაროთ საგანგაშო მდგომარეობაში მყოფ ოჯახებს.
თუ დამხარებით მოგვმართავენ და პარალელურად პროექტში ჩართულნი იქნებიან სოციალური მუშაკები და ფსიქოლოგები, რომლებიც ბენეფიციარების შერჩევაზე იმუშავებენ, რა თქმა უნდა, დავინტერესდებით და განვიხილავთ”, _ უთხრა “გურია ნიუსს” ჯორბენაძემ.
ცნობისთვის, მოხალისეებს, რომლებთან სურთ აღნიშნულ პროექტში ჩაერთონ და თავიანთი წვლილი შეიტანონ, შეუძლიათ “იდენტობის” ვებ-გვერდზე გაიარონ რეგისტრაცია და მიუთითონ თუ რა სახის დახმარების გაწევას შეძლებენ.
