(გურია ნიუსი) _ მიუხედავად ფაქტის სიმწვავისა, ოზურგეთის მუნიციპალიტეტის საკრებულოს თავმჯდომარეს ოფიციალური განცხადება გამგებლის დაკავებასთან დაკავშირებით, არც 6 აგვისტოს გაუკეთებია. მასთან შეხვედრა დაბა ნარუჯაში მოვახერხეთ, მაგრამ მიუხედავად ჩვენი მცდელობისა, მან “გურია ნიუსის” კითხვებს თავი აარიდა. საკრებულოს თავმჯდომარემ ჩვენს კორესპონდენტს გიორგი გირკელიძეს კითხვის დასმის საშუალებაც კი არ მისცა და სხვა ჟურნალისტებისთან განაგრძო საუბარი “იმ პროგრამების შესახებ, რომლებიც ნარუჯაში გახორციელდება”.
ჩვენი ინფორმაციით, თბილისის საქალაქო სასამართლომ ოზურგეთის მუნიციპალიტეტის გამგებელს გიორგი ტაკიძეს ორთვიანი წინასწარი პატიმრობა უკვე შეუფარდა.
“გურია ნიუსის” ჟურნალისტის, შორენა ღლონტის მიერ მოპოვებული ინფორმაციით, ტაკიძე ამ დრომდე დუმილის უფლებას იყენებს. ის თავს დამნაშავედ არ ცნობს და გამოძიებასთან თანამშრომლობას აპირებს. ბრალდებულის ინტერესებს ადვოკატები დოდო აბრალავა და ჯუმბერ მახარაძე იცავდნენ, თუმცა, “გურია ნიუსის” ჟურნალისტის, ნატო გოგელიას მიერ მოპოვებული ინფორმაციით, ადვოკატმა საქმეში მონაწილეობის გაგრძელებაზე უარი თქვა. მასთან საუბარში ჯუმბერ მახარაძემ არ დაადასტურა გავრცელებული ინფორმაცია ტაკიძის ჯანმრთელობის გაუარესების შესახებ:
_ ვინ გითხრათ რომ ცუდად გახდა? არ არის ეგ სწორი ინფორმაცია. თუმცა, გეტყვით რომ მე აღარ ვარ უკვე მისი ადვოკატი _ აცილება მივეცი.
_ რატომ მიეცით აცილება?
_ არ ვიცი. მივეცი აცილება, მხოლოდ ამის თქმა შემიძლია.
_ ბატონო ჯუმბერ, თავად თქვით უარი საქმეში ჩართვაზე თუ ოჯახმა თქვა უარი?
_ მე თვითონ.
_ რა იყო მიზეზი?
_ როგორ გითხრათ, მიზეზი იყო პირადი.
_ ბატონმა გიამ ჩვენება უკვე მისცა?
_ იმ პერიოდში, როცა მისი ადვოკატი ვიყავი, მას ჩვენება არ მიუცია, _ ამბობს მახარაძე.
ჟურნალისტი დაკავებულის დედას, ციცო ტაკიძესაც დაუკავშირდა, რომელიც ამბობს, რომ მისი შვილის ბედით არავინ დაინტერესებულა:
_ არც გუბერნატორს, არც საკრებულოს თავმჯდომარეს, არც გიას მოადგილეებს და საერთოდ არავის არ დაურეკავს, ამბავიც კი არ უკითხავთ, _ გვითხრა ქალბატონმა ციცომ.
მისი თქმით, ოჯახისთვის უცნობია, თუ რატომ თქვეს უარი ადვოკატებმა დაკავებულის დაცვაზე: _ მე ვერც ხელშეკრულებებში ვერკვევი და ვერც მსგავს დეტალებში. ერთი სოფლელი ქალი ვარ და ბევრ რამეს ვერ ვხვდები. მხოლოდ ის ვიცი, რომ ჩემს თავს ცუდი რამ ხდება, _ აღნიშნა ციცო ტაკიძემ გაზეთთან საუბარში.
“გურია ნიუსის” მიერ მოპოვებული ინფორმაციით, ოზურგეთის მუნიციპალიტეტის ყოფილი გამგებელი, რომელსაც უკვე შეუფარდეს ორთვიანი წინასწარი პატიმრობა, ამჟამად გლდანის ციხეში ჰყავთ.
