“გურია ნიუსი”, წერილობით კითხვებზე პასუხს, საქართველოს მთავარი პროკურატურის პრესსამსახურის უფროსის ხათუნა იოსავასგან, ორ კვირაზე მეტია, ელოდება _ მასთან გაგზავნილია ის კითხვები, რომელიც ოზურგეთის რაიონულ პროკურორთან, კახა კოჩივართან გვაქვს.
სანამ პრესსამასახურის უფროსს დავუკავშირდებოდით, მანამ, 18 ივლისს, ამავე უწყების პრესსამსახურის თანამშრომელს, ეკა ჩიჩუას მივწერეთ. მან ორი დღის შემდეგ გვპასუხა, რომ კითხვები ხელახლა მისი კოლეგისთვის, ნინო კორკელიასთვის გადაგვეგზავნა. რამდენიმე დღის შემდეგ კი კორკელიამ, ხათუნა იოსავასთან გადაგვამისამართა.
ვინაიდან აღნიშნული უწყების პრესსამსახურის უფროსისგან, არაერთი დაპირების მიუხედავად, პასუხები დღემდე ვერ მივიღეთ. მკითხველს კოჩივარისგან უპასუხოდ დატოვებულ შეკითხვებს გავაცნობთ.
_ ბატონო კახა, აუხსენით მკითხველს, რა არის ზოგადად პროკურატურის ფუნქცია და რა საქმიანობას უნდა ეწეოდეს ეს სტრუქტურა საქართველოს კანონმდებლობიდან გამომდინარე?
_ გავრცელებული ვერსიით, სასამართლო პროკურატურის დავალებებს ასრულებს, რითაც დარღვეულია მოსამართლისთვის კონსტიტუციით მინიჭებული უფლება, ხელშეუხებლობა და დამოუკიდებლობა. ეთანხმებით თუ არა ვერსიას, რომ პროკურატურა, რიგ შემთხვევაში, ზემოქმედებს სასამართლოზე?
_ თქვენი აზრით, რატომ გაათავისუფლეს ილია ჯალაღანია? საზოგადოების ნაწილი მიიჩნევს, რომ იგი ე.წ. “ბახმაროს სკანდალს” შეეწირა.
_ როგორ ახსნით ფაქტს, რომ ბახმაროს მიწების გამო, თანამდებობები დაატოვებინეს პოლიციის მაღალჩინოსნებს, ხოლო საჯარო მოხელეების ნაწილმა თანამდებობები შეინარჩუნა. რატომ არ გავრცელდა “სასჯელი” ყველა მაღალჩინოსანზე? რა ხდება ჩოხატაურის მუნიციპალიტეტის საკრებულოს ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების კომისიის ყოფილ თავმჯდომარის საქმესთან დაკავშირებით? როგორც ვიცით, ის ოფიციალურად ძებნილია.
_ როცა რეგიონში ასეთი მასშტაბური კრიმინალური ფაქტები ხდება და მხოლოდ ორ მუნიციპალიტეტში ათავისუფლებენ თანამდებობის პირებს, ეს არ არის რეგიონის ხელმძღვანელების სისუსტე? მათ ხომ ზედამხედველობის ფუნქცია აკისრიათ?
_”თავისუფალი დემოკრატების” ოზურგეთის რაიონული ორგანიზაციის ხელმძღვანელმა თემურ სალუქვაძემ მოგმართათ ოზურგეთის რაიონის გამგეობის #181 დადგენილების შედეგების ბათილად ცნობის გამო. საქმე ეხება 2005 წლის 20 მაისს გამართული აუქციონის შედეგებს. ოპოზიციის მტკიცებით, ხელმოწერები გაყალბებული იყო. აღძრულია თუ არა სისხლის სამართლის საქმე კონკრეტულად ამ ფაქტზე და რა სტადიაშია ახლა ეს პროცესი? დადგა, ან დადგება თუ არა იმ პირების პასუხისმგებლობის საკითხი, რომლებმაც აღნიშნული აუქციონი ჩაატარეს?
_ რა ბრალდება წაუყენეს “ოზურგეთის დასუფთავების სამსახურის” უფროსს მერაბ კურდღელაშვილს? ჩვენი წყაროს ინფორმაციით, პროკურატურაში დაკითხვის დროს მასზე გახორციელდა ძალადობა, რაც ფიზიკურ შეურაცხყოფაში გამოიხატებოდა. ასევე, როგორც ერთ-ერთი ამ სამსახურში დასაქმებული ამბობს, ის სცემეს, ფიზიკური შეურაცხყოფა მიაყენეს მძღოლებსაც და ავტოფარეხის უფროსსაც.
_ როგორ ფიქრობთ, კურდღელაშვილი და ტაკიძე მარტო ითვისებდნენ დიდი რაოდენობით სახელმწიფო ქონებას, არავის უნაწილებდნენ და ამას ვერ ამჩნევდა ადგილობრივი ან რეგიონის ხელისუფლება?
_ გურიის სამხარეო მთავარი სამმართველოს უფროსმა გიგა ჯაფარიძემ ფოტორეპორტიორების გახმაურებულ საქმესთან დაკავშირებით გამართული საპროტესტო აქციისას, ჟურნალისტებს ვიდეო-ფოტო გადაღების შეწყვეტისკენ მოუწოდა: “რას მიღებთ? საქართველოს აგენტების გარდა, სხვა მხარდასაჭერი ვერ ნახეთ? ” _ მიმართა ჯაფარიძემ “გურია ნიუსის” რეპორტიორს, რომელიც პოლიციის სამმართველოსთან მდუმარე აქციის მსვლელობას აფიქსირებდა. თქვენი აზრით, დაარღვია თუ არა მან უდანაშაულობის პრეზუმპცია დაკავებულ ფოტორეპორტიორებთან მიმართებაში და ხელი შეუშალა თუ არა ჟურნალისტს პროფესიული მოვალეობის შესრულებაში, რაც საქართველოს კანონმდებლობით დასჯადი ქმედებაა?
_ “გურია ნიუსის” ჩოხატაურის ოფისის დარბევის ფაქტი საქართველოს სახალხო დამცველის ანგარიშშიც მოხვდა, თუმცა, გამოძიება შეჩერებულია და აღნიშნულ ფაქტზე, ჩვენი ინფორმაციით, დაზარალებული მხარის გარდა არავინ დაკითხულა. რას იტყვით ახალს ამ ფაქტთან დაკავშირებით?
_ რას გვეტყვით გურიაში ბოლო დროს გახშირებული ქურდობის ფაქტებზე და გაუხსნელ, თაროზე შემოდებულ საქმეებზე? როგორი სიტუაციაა დღეს გურიაში კრიმინალური თვალსაზრისით?
_ მიგაჩნიათ თუ არა, რომ პროკურატურას სჭირდება მჭიდრო კონტაქტი საზოგადოებასთან და ანგარიშვალდებულია თუ არა იგი საზოგადოების წინაშე? თუ სჭირდება, როგორ, რა მეთოდებით გეგმავთ საზოგადოებასთან ურთიერთობას?
_ აღიძრა თუ არა თუნდაც ერთი საქმე კანონდარღვევის ფაქტების შესახებ მედიის საშუალებით გავრცელებული ინფორმაციის შემდეგ?
