ჩვენი წყაროს ინფორმაციით, ოზურგეთის მუნიციპალიტეტის გამგებლის ვინაობა გარკვეულია _ გია ტაკიძეს, “ტაო პრივატ ბანკის” ოზურგეთის ფილიალის მმართველი, საკრებულოს წევრი, ილია ვაშაყმაძე შეცვლის.
ვაშაყმაძე თვითმმართველობის არჩევნებზე, “ნაციონალური მოძრაობის” სიის მეოთხე ნომერი იყო. დაიბადა 1973 წელს, ოზურგეთის მუნიციპალიტეტის სოფელ ლიხაურში. ჰყავს მეუღლე და ორი ქალიშვილი. ვარდების რევოლუციამდე გურიის სახელმწიფო რწმუნებულის აპარატში მუშაობდა, შემდეგ არასამთავრობო ორგანიზაციის _ “საზოგადოებრივი კავშირი _ მუნიციპალური რეფორმა” ხელმძღვანელი იყო. თუმცა, არასამთავრობოდან ისევ ხელისუფლებას დაუბრუნდა და გურიის რეგიონის ხაზინაში უფროსის მოადგილედ მუშაობდა.
_ ბოლო წლებში, მთლიანად ქვეყანაში და ოზურგეთშიც გაკეთდა იმდენი რამ, რაც არ გაკეთებულა თითქმის 35 წლის განმავლობაში. ბრმა უნდა იყო, ეს სასიკეთო ცვლილებები ვერ დაინახო, _ ამბობდა ერთი წლის წინ, წინასაარჩევნო კამპანიის დროს ვაშაყმაძე.
მომავალი გამგებელი, ერთი წლის წინ არც დაპირებებს იშურებდა: _ ამომრჩევლიდან ნდობის გამოცხადების შემთხვევაში, ჩემს გუნდთან ერთად, პრიორიტეტად დავისახავ სამუშაო ადგილებისათვის ბრძოლას. ეს ის ძირითადი პრობლემაა, რომლის მოგვარებაც ავტომატურად ხსნის უამრავ სხვა დაბრკოლებას.
როგორც ცნობილია, ამომრჩეველმა ნდობა მმართველ პარტიას გამოუცხადა, თუმცა, ვაშაყმაძემ მალე კერძო სექტორში გადაინაცვლა და დაპირებული სამუშაო ადგილებზე ზრუნვაც სხვას მიანდო.
როგორც წყარო ამბობს, იდეა ვაშაყმაძის გამგებლად დანიშვნის შესახებ გუბერნატორს, ვალერი ჩიტაიშვილს ეკუთვნის. ჩიტაიშვილი ჩვენთან საუბრისას ამბობს, რომ ეს საკითხი საკრებულოს გადასაწყვეტია: _ გამგებლის კანდიდატურა საკრებულომ უნდა განიხილოს და დანიშვნაც მათი ფუნქციაა.
_ ბატონო ვალერი, განიხილება თუ არა გამგებლის პოსტზე ვაშაყმაძის კანდიდატურა?
_ ალბათ, განიხილება, _ გვითხრა გუბერნატორმა.
ვაშაყმაძეზე ინფორმაციის მოგროვებისას, ერთ საინტერესო ინფორმაციას წავაწყდით _ ფეისბუქზე, მომავალ გამგებელს, პერსონალურ გვერდზე, უმაღლესი სასწავლებლის დასახელების გრაფაში ლიხაური (?!) უწერია. მართალია, ლიხაურში არანაირი უმაღლესი სასწავლებელი არ ყოფილა და არც არის, მაგრამ როგორც გავიგეთ, ვაშაყმაძეს, ლიხაურთან ახლოს, ანასეულის ბუნებათსარგებლობის ინსტიტუტი აქვს დამთავრებული.
ვაშაყმაძე ჩვენთან საუბრისას ამბობს, რომ ჯერ საბოლოო გადაწყვეტილება არ მიუღია (?!). თუმცა, აღნიშნავს, რომ მის კანდიდატურას მხარი საკრებულომ უნდა დაუჭიროს.
“გურია ნიუსის” შეკითხვაზე _ რატომ უწერია უმაღლესი სასწავლებლის გრაფაში ლიხაური, როცა ამ სოფელში მსგავსი დაწესებულება არასდროს ყოფილა, პასუხი არ გასცა: _ საუბარი სხვა დროისთვის გავაგრძელოთ, _ გვითხრა ვაშაყმაძემ.
როგორც ჩვენთვის გახდა ცნობილი, საკრებულო გამგებლის კანდიდატურას ხვალ დაამტკიცებს, თუმცა, ვაშაყმაძემ გურიის ხელისუფლებისგან ჯერ კიდევ გასულ პარასკევს მიიღო მილოცვები. უფრო მეტიც, 19 აგვისტოს, ილია ვაშაყმაძე ლანჩხუთის მუნიციპალიტეტის გამგებელმა, გია გოგუაძემ, ჩოხატაურელ კოლეგას, ოზურგეთის გამგებლად წარუდგინა.
რეგიონული ინფრასტრუქტურისა და განვითარების მინისტრი, რამაზ ნიკოლაიშვილი ჩვენთან საუბრისას ამბობს, რომ მომავალ გამგებელს არ იცნობს:
_ მე არ ვიცნობ მომავალ გამგებელს. მხოლოდ მისი სახელი და გვარი ვიცი. შემიძლია მხოლოდ ის გითხრათ, რომ ოზურგეთს უნდა ჰყავდეს პატიოსანი, გულწრფელი და სუფთა გამგებელი. დაუშვებელია, ვინმემ ხალხის ფულში ხელი აფათუროს.
_ თქვენ თქვით, რომ ჩამოხვიდოდით და გამგებლის პოსტზე კადრს გუბერნატორთან ერთად შეარჩევდით… ახლა გვეუბნებით, რომ მომავალ გამგებელს არ იცნობთ…
_ მე მასეთი რამ არ მითქვამს. მე არ ვწყვეტ ვინ იქნება გამგებელი. ეს საკრებულოს პრეროგატივაა და იმედი მაქვს, ოზურგეთის საკრებულო ამ ვალდებულებას თავს გაართმევს. როგორც ვიცი, სამშაბათს უნდა გადაწყვიტონ გამგებლის ვინაობა.
