კინემატოგრაფისტების ბოიკოტი კინოცენტრის მიმართ გრძელდება. განცხადებას, რომელსაც ისინი ავრცელებენ 200-ზე მეტი ხელმომწერი ჰყავს.
“ჩვენ, ქართული კინოს თავისუფლებისთვის გაერთიანებული კინემატოგრაფისტები, რომლებიც ვეწინააღმდეგებით კულტურისა სამინისტროს რეპრესიულ პოლიტიკას, 2023 წლის აგვისტოდან ვაცხადებთ ბოიკოტს!
პროტესტის ნიშნად, ჩვენ აღარ მივიღებთ მონაწილეობას მიტაცებული კინოცენტრის გამოცხადებულ კონკურსებსა და პროექტებში, ჩვენ უარს ვამბობთ საკონკურსო კომისიების წევრობაზე, რადგან არ გვსურს ვიქცეთ ფორმალურ თანამონაწილედ იმ პროცესისა, რომელსაც ქართული თანამედროვე კინო, კულტურა და მეცნიერება განადგურებისაკენ მიჰყავს.
პროტესტის პირველივე დღიდან, ჩვენ ვითხოვთ სისტემურ ცვლილებას – კინოცენტრის დირექტორის დანიშვნის წესის შეცვლას! გვჯერა, რომ კინოცენტრის დირექტორი უნდა იყოს არჩეული მხოლოდ გამჭვირვალე და საჯარო პროცესით, სფეროს წარმომადგენლების მიერ და არ იყოს დანიშნული მინისტრის ერთიპროვნული გადაწყვეტილებით. მხოლოდ დემოკრატიული წესით არჩეული მმართველის პირობებში შეძლებს კინოცენტრი უზრუნველჰყოს ქართველი კინემატოგრაფისტების სიტყვის, გამოხატვისა და შემოქმედების თავისუფლება!
დამოუკიდებლობა კინოცენტრს!
ხელოვნება ცოცხალი, დამოუკიდებელი და პოლიტიკურია!
კინოს სფეროში მომუშავე ნებისმიერი პროფესიის ადამიანს შეუძლია, შემოუერთდეს ჩვენს პოზიციასა და ბრძოლას კულტურის თავისუფლებისა და დამოუკიდებლობისთვის”,_ ნათქვამია განცხადებაში.
ინფორმაციისთვის, თვეზე მეტია, კინოცენტრის თანამშრომლები კულტურის სამინისტროსთან აქციებს მართავენ. პროტესტი გამოიწვია კულტურის მინისტრის თეა წულუკიანის მიერ კინოცენტრის ყოფილი დირექტორის მოადგილის ნინო კუხალაშვილის მოულოდნელ დათხოვნას და ცენტრის ხელმძღვანელად დანაშაულის პრევენციისა და პრობაციის ეროვნული სააგენტოსა და აღსრულების ეროვნული ბიუროს ყოფილი თანამშრომლის კობა ხუბუნაიას დანიშვნას.
კინოს სფეროს მოღვაწეები შიშობენ, რომ კინოცენტრის დამოუკიდებლობას ბოლო მოეღო და კინოს დაფინანსებაში სახელმწიფო პირდაპირ ჩაერევა და, მეტიც, ცენზურას დაუწესებს მისთვის მიუღებელ ფილმებს.
