მთავრობის კანცელარიის რეგიონებსა და ადგილობრივი თვითმმართველობის ორგანოებთან ურთიერთობის დეპარტამენტის უფროსი ირაკლი მელაშვილი სასამაღტლოს მიერ ემზარ კვიციანისთვის მისჯილ თორმეტწლიან სასჯელს ეხმაურება:
"რასაც ახლა ვწერ სხვისი მონაყოლით არ ვიცი, 20 წლის წინ პატარა ჯგუფი ჩავედით დალის ხეობაში (ასე ეძახდნენ ისტორიულად კოდორის ხეობას). იქ პარტიზანების პატარა ჯგუფი იყო და ემზარ კვიციანის "მონადირე". ჯარი მაშინ ფაქტიურად არ გვყავდა. აფხაზებმა ისე გამოიარეს ლათას გვირაბები, წინააღმდეგობა არ შეხვედრიათ. არადა ვერ უნდა აეღოთ! ემზარი და მისი მონადირე, ასევე მცირე პარტიზანული რაზმები რომ არა, ყველაფერი კატასროფით დამთავრდებოდა. დალის (კოდორის) ხეობის დანარჩუნებით აფხაზეთის ტერიტორიის მნიშვნელოვანი ნაწილი (გულრიფშის რაიონში) საქართველოს სახელმწიფოს კონტროლის ქვეშ დარჩა.
არ შეიძლება სახელმწიფომ ეს დაუკარგოს ემზარ კვიციანს. ისიც კარგად მესმის, რომ არავის აქვს უფლება სახელმწიფოს იარაღით დაუპირისპირდეს, ეს კვიციანის შეცდომა იყო. რამ აიძულა ამ ნაბიჯის გადადგმა თვითონ უკეთ იცის. მის დაჭერამდე ცოტა ხნით ადრე მოგვიწია სუფრაზე ერთად ყოფნა და იქ ამბობდა, ამათ (ანუ ნაცებს) კოდორის ხეობის ჩაბარება აქვთ გადაწყვეტილიო. ფაქტი ერთია, იმ ე.წ. ამბოხის დროს არც ერთი ქართველის სისხლი არ დაუღვრია. ეს განზრახვა რომ ჰქონოდა ემზარ კვიციანს, ოქრუაშვილ-მერაბიშვილს ძვირად დაუსვავდა ხეობაში შესვლას. ვინც კოდორის ხეობაში ერთხელ მაინც ყოფილა, ყველა დამეთანხმება, ამ ადგილების ერთი კარგად მცოდნე ადგილობრივი მონადირე, მინიმუმ 10 ჯარისკაცს უდრის. ფაქტია, რომ არც ემზარმა და არც მისმა ბატალიონმა არ ისროლა. კიდევ ერთხელ ვიმეორებ, კანონის წინაშე ის იმ მომენტში მტყუანი იყო, ამის უარყოფა სისულელეა. მაგრამ ეს განაჩენი რომ აშკარად უსამართლოა, ჩემთვის ესეც ფაქტია. ამ კაცმა თუნდაც იმით აგო პასუხი, რომ წლების განმავლობაში იძულებით, თავისი სამშობლოს, თავისი მთების გარეშე მოუწია ცხოვრება. დედა დაუპატიმრეს, წლების განმავლობაში მძევლად ჰყავდათ, ოჯახი და საახლობლო აუწიოკეს.
ისიც ხომ ფაქტია, ხელისუფლების შეცვლის შემდეგ თავისი ფეხით ჩამოვიდა და ჩაბარდა სამართალდამცავებს. საერთოდ მოსამართლე გადაწყვეტილებას საკუთარი სინდისითა და რწმენით უნდა იღებდეს.(თუკი ასეთი გააჩნია!) კუბლაშვილის განცხადება მოვისმინე ნორა კვიციანის განცხადებების საპასუხოდ. კოტე ბატონო, ემზარ კვიციანი თავისი ფეხით ჩამოვიდა და ჩაბარდა ქართულ მართლმსაჯულებას, ხოლო შენი მეგობარი პრეზიდენტი, რომ ყოველ ჯერზე დაუმორჩილებლობას უცხადებს და საცინლად იგდებს ქართულ სასამართლოს მაგაზე რატომ სდუმხარ? სასამართლოს მიერ გაუბედურებულ ნორა კვიციანს მკაცრი ტონით რომ სთხოვ სასამრთლო გადწყვეტილებებისადმი მორჩილებას და მისდამი პატივისცემას, იმაზე რატომ არაფერს ამბობ, შენი დამნიშნავი ბელადი მთელ მსოფლიოში რომ დარბის და ლაპარაკობს საქართველოში თავისუფალი სასამართლო არ არსებობსო.
შენზე ამბობს კოტე, ამაზე რატომ ხარ გაჩუმებული უზენაესი სასამართლოს თავმჯდომარე? ამ შემთხვევაში რატომ არ იცავ სასამართლოს ღირსებას ?! თუ ყოფილ პრეზიდენტს ნაკლებად მოეთხოვება სახელმწიფო ინსტიტუტების პატივისცემა? ეგაა შენი სიმართლე? და ბოლოს, კვიციანს 12 წელს რომ უსჯი, იმას რამდენს მიუსჯი, 2008 წელს ტყვიის გაუსვრელად, კუდამოძუებულმა, საკუთარ ჯიპებს და ვილისებს რომ გამოასწრო ხეობიდან და აფხაზეთში უკანასკნელი ქართული ფორფოსტი უბრძოლვევლად ჩააბარა მტერს, მერაბიშვილზე გეკითხები!!!!! ამ კუთხით ვის უფრო მეტი დანაშაული მიუძღვის ამ ქვეყნის წინაშე ემზარს თუ ვანო მერაბიშვილს? არ ვიცი, იქნებ დეპუტატებმა თავდების მოთხოვნით მიმართონ უზენაეს სასამრთლოს, ან პრეზიდენტმა შეწყალების აქტი გამოსცეს, ეს კაცი გარეთ გამოვიდეს და ისე განაგრძოს თავის სიმართლის დამტკიცებისათვის ბრძოლა.
P.S. იმედია, ეს გაბრაზებული პოსტი სასამართლოზე ზეწოლის მცდელობად არ ჩამეთვლება", _ წერს მელაშვილი სოციალურ ქსელში
.
