"ჩვენ დაკავებას დავარქმევდი სპეცოპერაციას, რომელსაც ხელმძღვანელობდა ქალაქ ოზურგეთის ვიცე მერი ალეკო ბურჭულაძე და მერის მოადგილე კობა დუდუა, ასევე მთელი დღის განმავლობაში ჩვენს გადაადგილებას უთვალთვალებდნენ მერიის თანამშრომლები გელა სარიშვილი და შუქრი გაბრიჩიძე", _ განაცხადეს, დღეს, "ნაციონალური მოძრაობის ლიდერებმა, მათ მიერ სპეციალურად გამართულ ბრიფინგზე.
"ნაციონალური მოძრაობის "ოზურგეთის რაიონული ორგანიზაციის თავმჯდომარე დავით მჟავანაძე და "თავისუფალი ზონის"ლიდერი ბესო ქათამაძე, დღეს მაშინ დააკავეს, როდესაც ქალაქში გუბერნატორის საწინააღმდგეო პროკლამაციებს აკრავდნენ.
ენმ-ს ლიდერები ხუთი საათის განმავლობაში დაკავებულები იყვნენ. ისინი პრემიერის გურიაში ვიზიტის დასრულების შემდეგ გამოუშვეს.
"პრემიერის ვიზიტის პარალელურად, გვქონდა მშვიდობიანი აქცია, რომელიც დაკავშირებული იყო გურიის ახალი გუბერნატორის დანიშვნასთან. ამ აქციის ფარგლებში გავედით ქალაქ ოზურგეთში, ჭავჭავაძის ქუჩაზე და ვაკრავდით სტიკერებს, რომელზეც გურიის გუბერნატორი იყო გამოსახული. აღნიშნულმა ფაქტმა გაღიზიანება გამოიწვია ქალაქის მერიის თანამშრომლებში, რომლებიც მოცვივდნენ და პოლიციელების მაგივრად დაიწყეს მოქმედებები. ჩამოხიეს პლაკატები და განგვიმარტავდნენ, რომ ეს იყო დარღვევა, რისთვისაც პასუხს ვაგებდით.
მერიის თანამშრომლების მიერ ჩვენი მისამართით განხორციელებულ ქმედებებს კი ჩვენი დაკავება მოჰყვა ", _აღნიშნა ბრიფინგზე დავით მჟავანაძემ.
ბესო ქათამაძის განმარტებით, მას აქვს ვიდეო, სადაც ნთლად ჩანს თუ როგორ გადაკვეთს ავტომანქანით ღერძულა ხაზსს მერიის თანამშრომელი.
"საინტერესოა, აგებს თუ არა ამისთვის ისინი პასუხს? თუ ჩვენი დანაშაული დანაშაულია, და ეს არ არის კანონდარღვევა? ჩვენ აღნიშნული ყველა ფაქტის დამადასტურებელი ვიდეოფირები გვაქვს, რომელსაც ხვალ დილით სასამართლოზე წარმოვადგენთ, რომელიც დილით 10 საათზე გაიმართება"_ განაცხადა ქათამაძემ.
"საინტერესოა, რატომ აქამდე არ გააკეთა გუბერნატორმა კომენტარი, თუ მისთვის ადამიანების დაკავება არაფერს წარმოადგენს?გვინდა ვურჩიოთ ქალაქ ოზურგეთის მერიას, რომ ქალაქში არის უამრავი საქმე და იმ საქმეების კეთებით დაკავდნენ, არის უამრავი პრობლემა მოუგვარებელი, გაიარონ ქუჩები და ნახონ რა მდგომარეობაა, ჩვენ არ უნდა გვდევნიდნენ მერიის თანამშრომლები. თუ დავაშავებთ, ამისთვის არიან სამართალდამცავები, ფაქტიურად სპეცოპერაცია ჩაგვიტარეს მერიის თანამშრომლებმა , ამით მათ თავი მოიწონეს ახალი გუბერნატორისა და პრემიერის წინაშე და მაშინ გამოგვიშვეს, როდესაც პრემიერი წავიდა ოზურგეთიდან, მანამდე 5 საათის განმავლობაში ვიყავით დაკავებულები" _ განაცხადეს "ნაციონალური მოძრაობის" ლიდერებმა ბრიფინგზე.
აღნიშნულთან დაკავშირებით ქალაქ ოზურგეთის მერიის პოზიცია ასეთია:
"ქალაქის მერიის თანამშრომლები პრემიერ-მინისტრის ვიზიტთან დაკავშირებით სამსახურებრივად, საორგანიზაციო საკითხებით იყვნენ დაკავებულნი. შესაბამისად, ‘’ნაციონალური მოძრაობის’’ თვალთვალის არც სურვილი და არც დრო არავის ჰქონია. რაც შეეხება სტიკერების ჩამოხსნის ფაქტს, ამასთან დაკავშირებით მერის მოადგილემ კომენტარი უკვე გააკეთა, ხოლო სამართალდამცავებმა, შესაბამისად, მათი უფლებამოსილების ფარგლებში იმოქმედეს. აღნიშნული ბრალდება კი ‘’ნაციონალური მოძრაობის’’ მორიგი ტყუილი და ცილისწამებაა "
