გადაცემა „20 30“-ის ყოფილი წამყვანი არჩილ გამზარდია „გურია ნიუსთან“ საუბრისას ამბობს, რომ მას ხელშეკრულება არ გაუგრძელეს, რადგან „გადაწყვეტილების მიმღებ პირებს მის მიმართ განსხვავებული მოსაზრება ჰქონდათ“:
_ პროექტმა სეზონი დაასრულა, ხელშეკრულება დასრულდა და გაგრძელებაზე საუბარიც არ ყოფილა, რადგან როგორც კი პროექტი დასრულდა ჩემი ნივთები ჩავალაგე და წამოვედი, რადგან ვიცოდი, რომ ჩემთან მიმართებაში ჰქონდათ განსხვავებული მოსაზრება გადაწყვეტილების მიმღებ პირებს.
_ ბიძინა ივანიშვილს არ მოსწონდით?
_ არ ვიცი, ბიძინას ნაცვლად ვერ გეტყვით, მაგრამ როგორც ჩანს მე მხარედ ვერ მიმიღეს. გადაცემას ვინც უყურებდა ისიც, რომ მე ვცდილობდი ყოფილიყო, როგორც წარმატებების წარმოჩენა, ასევე კრიტიკული გადაცემა, რომელიც საკმაოდ კვალიფიციური და საინტერესო იყო, რომელმაც ძალიან მნიშვნელოვან სივრცეს და საზოგადოებრივ დიალოგს გაუსვა ხაზი. რაც შეეხება რეიტინგებით მანიპულირებას _ გადაცემას მზარდი რეიტინგი ჰქონდა და გინდა მაქ და გინდა სხვა არხზე რეიტინგები ბევრ გადაცემას არა აქვს, მაგრამ არ იხურება ასე მარტივად. თან მით უმეტეს მიწვევით მიმიღეს, კასტინგზეც კი არ გავსულვარ.
_ თქვენს მიერ გავრცელებულ განცხადებაში აღნიშნულია, რომ ბოლო გადაცემები კრიტიკით გამოირჩეოდა… როგორც გადაცემის თანაპროდიუსერმა ენძელა მაჭავარიანმა გვითხრა, ზემდგომისგან შენიშვნაც კი არასდროს მიგიღიათ…
_ ჯერ ერთი, ენძელას არაფერი ეკითხება. მეორეც _როგორც კი კრიტიკულ სტატუსს დავდებდი ნარმანიაზე, ორმოებზე ან სერგეენკოზე, ზემდგომებისგან დიდი განხილვები მოდიოდა, როგორ გავბედე რაღაც მოსაზრების გამოთქმა _ მთელი ამბები იყო.
_ კონკრეტულად ვისგან?
_ ადმინისტრაციული ნაწილისგან და ზოგადად, მაგრამ ამაშიც არაფერი ტრაგიკული არ არის. გადაცემაში ივანიშვილი ნამდვილად არ ჩარეულა. ამიტომ, ვვარაუდობ, რომ ივანიშვილს გარემოცვამ შეუქმნა ჩემდამი ცუდი აზრი. კარგად გახსოვთ, რომ ბიძინა ივანიშვილი არავის დაუჯდა ეთერში თანაწამყვანად _ მე შემარჩია. ვიღაცამ იზრუნა, რომ ჩვენი ურთიერთობა შემწყდარიყო.
_ გადაცემის პროდიუსერს, ვასილ მაღლაფერიძეს გულისხმობთ?
_ არ ვიცი, მე გარემოებებით ვმსჯელობ და არა პიროვნებებით. მაღლაფერიძესთან არ მაქვს არანაირი გამორჩეული დამოკიდებულება. მარტო ეს გადაცემა რომ ყოფილიყო, თემაც არ იქნებოდა, მე ტრაგიკულად არ აღმიქვია, რადგან წინასწარვე ვიცოდი გადაცემის დახურვის შესახებ. როცა ხელშეკრულება მთავრდებოდა, დავსვი შეკითხვა და მითხრეს, რომ ჩემთან თანამშრომლობა არ სურდათ და ხელშეკრულებას არ გამიგრძელებდნენ.
პრაქტიკულად, ერთადერთი თანამშრომელი ვარ, რომელთანაც ურთიერთობა არ სურთ. ახლა ახალ პროექტზე მუშაობენ, ბევრი თანამშრომელი მიიღეს და საქმე იყო კონკრეტულად ჩემთან მიმართებაში. ავიკარი გუდა-ნაბადი და წამოვედი, _ ამბობს გამზარდია.
მისივე თქმით, ივანიშვილს გარემოცვა ცუდ მგომარეობაში აყენებს:
_ ვრცელდება ინფორმაცია, რომ მიშველაძის შოუ დახურეს, გრიგოლიას გადაცემები დაუხურეს _ მე ეს ტენდენციები არ მომწონს, თორემ ჩემთან მიმართებაში არაფერს ვამბობ.
ბოლოსდაბოლოს, ივანიშვილის პროექტი იყო, არ უნდოდა _ ადგა და დახურა. დადებითი განწყობით ვარ საერთო ჯამში, მაგრამ თუ იკვეთება, რომ მიშველაძე, გრიგოლია, გამზარდია ან სხვა სახეები, რომლებიც მედიაში ჩანან, უნდათ ჩამოიცილონ და ჩამოცილების ხერხებს ეძებენ სხვადასხვა ფორმით, ეს უკვე სხვა თემაა.
მე არ ვარ ჟურნალისტი, ანალიტიკოსი ვარ და გადაცემის წამყვანობამდეც ვჩანდი მედიით. სამწუხარო პერსპექტივას ქმნის, რომ შეიძლება კონკრეტული პირების ჩარეცხვა-ჩამოცილება უნდოდეთ.
_ ვის?
_ არ ვიცი. ერთს გეტყვით_ ბიძინა ივანიშვილთან ურთიერთობის, ბევრს ვაკვირდებოდი, ვსწავლობდი. ის ღია პიროვნებაა და საწინაღმდეგო აზრთან მიმართებაში ბევრად უფრო გახსნილი ტიპია. ამიტომ, ივანიშვილს ვინ ეხმარება აზრების ფორმირებაში, ძაღლის თავი აქ არის დამარხული.
ვიცი მისი დამოკიდებულებები სხვა ტელევიზიების და გადაცემების მიმართ და არ ფიქრობს, რომ რაც არ მოსწონს უნდა დაიხუროს. საკმაოდ საინტერესო ადამიანთან გვაქვს საქმე და საკმაოდ დემოკრატია ბუნებით. ამიტომ, ის რომ გადაცემები ბიძინამ დაახურინა, ჩემთვის არადამაჯერებელია.
_ ფიქრობ, რომ ივანიშვილს ვიღაცა თავის აზრებს ახვევს თავს?
_ ეს აზრი მიჩნდება. ყველას ჰყავს ანგარიშგასაწევი პიროვნებები, მასაც ეყოლება და ეს ადამიანები მას აყენებენ ისეთ მდგომარეობაში რაც მის დისკრედიტაციას იწვევს. სხვა მხრივ მიშველაძესაც ეშველება, გამზარდიასაც და გრიგოლიასაც, _ დასძინა გამზარდიამ.
„გურია ნიუსმა“ გამზარდიას განცხადებების კომენტარი „2030“-ის პროდიუსერს ვასილ მაღლაფერიძესაც სთხოვა, თუმცა მან კომენტარის გაკეთება არ ისურვა.
