სფფ-ს პრეზიდენტობის კანდიდატის რევაზ არველაძის მიერ "გურია ნიუსისთვის" მიცემულ კომენტარს, სადაც არველაძე ამბობს, რომ "გურიისთვის მხოლოდ კარგი უკეთებია", საფეხბურთო კლუბ "გურიას" პრეზიდენტი, ლანჩხუთის მუნიციპალიტეტის გამგებელი ზაზა ურუშაძე გამოეხმაურა:
_ საინტერესოა, რას გულისხმობს ბატონი არველაძე? ფედერაციაში მისი ყოფნის დროს "გურია“ არაერთხელ დაზარალდა. გავიხსენოთ თუნდაც არაობიექტური მსაჯობა, რომლის გამო ჩვენ მოსაგები თამაშები წავაგეთ. ერთ-ერთი ასეთი იყო თამაში "შუქურასთან“, სადაც მსაჯმა აშკარად წაგვართვა მოგების შანსი.
თუმცა ამ ფაქტს, მიუხედავად იმისა, რომ კლუბის ოფიციალურ გვერდზე გავრცელდა თამაშის ამსახველი ვიდეო მასალაც, რეაგირება ფედერაციის მხრიდან არ მოჰყოლია. ამავე დროს, სწორედ არველაძის ფედერაციაში ყოფნის დროს „გურია“ რამდენჯერმე დაჯარიმდა. ისედაც, ქართული ფეხბურთის საქმე რომ უკან მიდის, ეს უკვე აშკარა და თვალშისაცემია.
ლანჩხუთისთვის, ისევე როგორც დანარჩენი მუნიციპალიტეტებისათვის, რთულია უმაღლეს ლიგაში გუნდის შენახვა ფინანსური თვალსაზრისით, სწორედ ეს უნდა იყოს გათვალისწინებული ფედერაციის მხრიდან. პირიქით, „გურია“ რამდენჯერმე დაჯარიმდა, რამაც ფინანსური ზარალი მოგვიტანა. ისიც გვინდა გკითხოთ: ისედაც ფინანსურად შეჭირვებულ გუნდს ქულების დაკლებითა და ეროვნული ჩემპიონატიდან გამოთიშვით რომ გვემუქრებიან, თქვენთვის რამდენად მისაღებია?
ქართული ფეხბურთი რომ არ ვითარდება, ეს უკვე აშკარაა. ცხრა წლის მანძილზე წარმატების ნაცვლად, უკუსვლა გვქონდა. საინტერესოა, ყოფილ პოსტ.საბჭოთა რესპუბლიკებს შორის მხოლოდ ერთ ქვეყანას რომ გაუსწრებ და ისიც არასაფეხბურთოს, რამდენად გაქვთ მორალური უფლება, რომ რაიმეზე პრეტენზია განაცხადოთ?
დღეს რომ ასეთ დღეშია ეროვნული ჩემპიონატი და სანაკრებო დონე, ამაზე პასუხს ვინ აგებს? ისიც ხომ პარადოქსია, რომ ისეთ დამსახურებულ გუნდს, როგორიც „გურიაა“ არჩევნებში ხმის მიცემის უფლება არა აქვს. რამდენჯერმე დავაყენეთ ეს საკითხი ფედერაციის წინაშე, მაგრამ ამაოდ.
მიუხედავად იმისა, რომ კლუბი „გურია“ და მე, როგორც პრეზიდენტი, არ ვერევით საქართველოს ფეხბურთის ფედერაციის პრეზიდენტის არჩევნებში, ჩვენ გვსურს სასიკეთო და ძირეული ცვლილებები ქართულ ფეხბურთში, რაც აუცილებელია და რაც ხელს შეუწყობს ფეხბურთის განვითარებას არა მხოლოდ რეგიონებში, არამედ ქვეყნის მასშტაბით“, _ აღნიშნავს ურუშაძე.
ურუშაძის ბრალდებებთან დაკავშირებით არველაძის კომენტარს "გურია ნიუსი" მალე შემოგთავაზებთ.
