ქართველმა სამართალდამცავებმა ე.წ. კანონიერი ქურდი დავით გერლიანი დააკავეს.
გერლიანი საქართველო-სომხეთის საზღვრის გადაკვეთის მცდელობისას დააკავეს.
ამის შესახებ შს მინისტრის, გიორგი მღებრიშვილის მიერ დღეს გამართულ ბრიფინგზე გახდა ცნობილი.
მინისტრის ინფორმაციით, 19 ივნისს შსს-მ დაიწყო გამოიძიება სისხლის სამართლის 223-ე პრიმა მუხლის მესამე ნაწილით, რაც გულისხმობს ქურდული სამყაროს წევრობას ან კანონიერ ქურდობას. მისივე თქმით, გამოძიებას საფუძვლად დაედო ინფორმაცია იმის შესახებ, რომ ქურდული სამყაროს ერთ-ერთმა წევრმა, ე.წ. კანონიერმა ქურდმა საქართველოს სახელმწიფო საზღვარი გადმოკვეთა.
"სამი დღის განმავლობაში უწყებამ გააზრებულად არ გააკეთა კომენტარი, რათა ხელი არ შეშლოდა საგამოძიებო მოქმედებებისთვის. ზემმო აღნიშნული პირის ადგილსამყოფელის დადგენის მიზნით განხორციელებული ინტენსიური ოპერატიულ სამძებრო მოქმედებების შედეგად, საქართველო-სომხეთის სახელმწიფო საზღვრის უკანონო გადაკვეთის მცდელობისას კანონიერი ქურდობის ბრალდებით დაკავებულია აღნიშნული პირი, დაკავებულის პირადი ჩხრეკისას ამოღებულია მის სახელზე გაცემული უკრაინის რესპუბლიკის პასპორტი"_ აღნიშნა მღებრიშვილმა.
"მედიაში და ასევე უკრაინის შსს-ს ოფიციალურ ვებგვერდზე გავრცელდა ინფორმაცია, რომ რამდენიმე დღის წინ უკრიანიდან საქართველოში პირის, როგორც კანონიერი ქურდის, დეპორტაცია განხორციელდა. მომხდარ ფაქტთან დაკავშირებით ისიმის კითხვა, თუ რატომ ვერ მოხერხდა საქართველოს შსს-ს და უკრაინის შსს-ს შორის დანაშაულის სფეროში თანამშრომლობის შესახებ შეთანხმების საფუძველზე ქართული მხარისთვის ინფორმაციის მოწოდება. მით უფრო, თუკი უკრაინულ მხარეს ჰქონდა ინფორმაცია იმის თაობაზე, რომ აღნიშნული პირი შესაძლოა ყოფილიყო დანაშულებრივი დაჯგუფების წევრი. ეწ. კანონიერი ქურდი, რომელისგანაც მოსალოდნელი იყო საზოგადოებისთვის საფრთხის შექმნა", _ განაცხადა შს მინისტრმა.
"ჩვენ ველოდებით ჩვენი კოლეგებისგან პასუხს. მანამდე კი, კიდევ ერთხელ გიდასტურებთ, რომ ზემოაღნიშნული პირი დაკავებულია და 48 საათის განმავლობაში წარედგინება ბრალი. საქმეზე გრძელდება გამოძიება. მინდა, საოზგადოებას მოვუწოდო, სოციალურ ქსელებში ინფორმაციის გავრცელებას და ჩასაფრებულის პოზიციიდან დაკვირვებას, თუ რას მოიქმოედებეს პოლიცია, ვფიქრობ აჯობებს, რომ მოახდინოს თავისი მოქალაქეობრივი ვალის მოხდა და შეასტყობინოს სამართალდამცავ უწყბებებს შესაძლო დანაშაულის შესახებ, ჩვენ უფრო ეფექტურად, უფრო ხარისხიანად შევძლებთ გარემოებებზე რეაგირებას",_აღნიშნა მღებრიშვილმა.
ცნობისთვის, გერლიანის მიერ საქართველოს საზღვრის გადმოკვეთასთან დაკავშირებით ინფორმაცია "ნაციონალური მოძრაობის" წევრმა გივი თარგამაძემ სოციალურ ქსელში რამდენიმე დღის წინ დაწერა.
მისი თქმით, უკრაინაში დაკავებისას კანონიერ ქურდს დედის გვარზე, ჩაჩიაბაიაზე დამზადებული პასპორტი ჰქონდა.
როგორც ოპოზიციური პარტიის წევრი განმარტავდა, გერლიანი, იგივე "სვანა" 1972 წელს სოხუმში დაიბადა და ის 2014 წელს თურქეთში კანონიერ ქურდად აკურთხეს.
"ველი შსს-ს მოქმედებებს ან მორიგ ოპუსს თვითმფრინავიდან ადამიანის გაუჩინარების შესახებ", _ წერდა თარგამაძე.
