ასე გაგვიცხადა რეგიონული განვითარებისა და ინფრასტრუქტურის მინისტრმა, რამაზ ნიკოლაიშვილმა. რომელსაც დღეს ანასეულის მოსახლეობა შეხვედრაზე ელოდებოდა.
“გურია ნიუსის” ინფორმაციით, შეხვედერა დაბა ანასეულის ცენტრში უნდა შემდგარიყო. იქ მისულ მედიასაშუალებებს, ადგილობრივი მოსახლეობის ძალიან მცირე ნაწილი დაგვხდა.
ერთსაათიანი ლოდინის მიუხედავად, მინისტრი არ გამოჩენილა.
ინფორმაციის გასამოწმებლად, “გურია ნიუსი” თავად რამაზ ნიკოლაიშვილს დაუკავშირდა.
_ არ მცალია სალაპარაკოდ, ჩემო კარგო, _ გვითხრა მინისტრმა და ტელეფონი გაგვითიშა.
რამდენიმე წუთში, რამაზ ნიკოლაიშვილის პრესსამსახურის წარმომადგენელი, მაია სიხარულიძე დაგვიკავშირდა, რომელმაც გვითხრა, რომ მზად იყო ჩვენს კითხვაზე პასუხი გაეცა.
_ არანაირი შეხვედრა არ იყო დაგეგმილი დაბა ანასეულში, რა შეხვედერაც დაიგეგმა გურიაში, ყველა შედგა, _ გვითხრა სიხარულიძემ.
რამდენიმე წუთში, რამაზ ნიკოლაიშვილი თავად დაგვიკავშირდა. მასთან საუბარს უცვლელად გთავაზობთ.
_ მე მინდა რომ ესეთ რამეზე შევთანხმდეთ რა! როცა მოგივლის და ყველა კითხვა რომ გინდა დამისვა, მე ვერ ვიმუშავებ მასე! მე მაქვს ძალიან ბევრი საქმე, რომელიც არის მნიშვნელოვანი ჩვენი ქვეყნისათვის, ამიტომ უმნიშვნელო კითხვებზე მიმართეთ პრესსამსახურს რა!
თუნდაც ღამის 11 საათზე ჩემთან დარეკვა (არადა, თავად დაგვირეკა ბატონმა რამაზ ნიკოლაიშვილმა ავტ.) არ არის სწორი. შევთანხმდეთ რა! შეხვედრები ბევრია, მინისტრი ერთი, ამიტომ თუ მინდა ვინმეს შევხდე, არასდროს ჩემს შეხვდრას არ ვცვლი, რა! თუ გადავწყვეტ, რომ ვინმეს შევხდე ანასეულში, შევხდები ანასეულშიც, ლანჩხუთშიც და სადაც გადავწყვეტ იქ, კანონის ფარგლებში, გაიგე ჟანა? როცა ყველაფერი იცი, არ ნიშნავს იმას, რომ ყველა კითხვაზე დამირეკო, რომელიც თავში მოგივლის. ძალიან გთხოვ, ჩემს დროს გაუფრთხილდი, იმიტომ რომ ეს არის ხალხის დრო!
_ ბატონო რამაზ, როგორც ვიცით, თითქმის გადაწყვეტილია თქვენი მაჟორიტარ კანდადატად დასახელება ოზურგეთში.
_ კიდევ ერთხელ გეუბნებით რა, შენ რაც იცი, ის გაარკვიე შენს რედკოლეგიალობაში! შენ რა იცი, მე არ მაინტერესებს?! მეც ბევრი რამე ვიცი, მაგრამ ეს არაფერს არ ნიშნავს რა.
_ ჩვენ გვგულისხმობთ? რა იცით, ბატონო რამაზ?
_ რა, ჟანა? მე შენზე რა უნდა ვიცოდე? ვინა ხარ შენ, რომ რამე ვიცოდე? თქვენზე რა უნდა ვიცოდე? ვინა ხართ თქვენ, რომ მე რამე ვიცოდე? არაფერი არ ვიცი თქვენზე და არც მაინტერესებს, რა!
_ ჩვენ, ამ შემთხვევაში, გაზეთ “გურია ნიუსს” წარმოვადგენთ.
_ ძალიან კარგი გაზეთია, მომწონს თქვენი გაზეთი, მაგრამ ეს არ ნიშნავს, რა! იმუშავეთ ობიექტურად, ვიღაცეების დაკვეთების გარეშე და მაშინ იქნება ყველაფერი კარგად.
_ ვისი დაკვეთით ვმუშაობთ, ბატონო რამაზ? ვის გულისხმობთ?
_ მე მყავს პრესსამსახური, მიმართეთ იმას და მიიღებთ პასუხს.
_ აუცილებლად გავითვალისწინებთ, ბატონო რამაზ.
_ რა არის გადაწყვეტილი, ეგ არის სხვა საკითხები რა!
_ მაინც, ვის დაკვეთებზე ვმუშაობთ ბატონო რამაზ, გცოდნიათ, თურმე…
_ კარგი ჟანა, მე თქვენთან საუბრის დრო აღარ მაქვს, ამომეწურა, აღარ მაქვს, აღარც მაქვს სურვილი, იმიტომ რომ ყველა ჩემს ნათქვამს ამახინჯებ და არასწორად წერ მერე გაზეთში (მინისტრ რამაზ ნიკოლაიშვილის ყველა საგაზეთო და ვებგვერდზე განთავსებული ინტერვიუების აუდიოჩანაწერი არსებობს. მათ შორის, ამ კომენტარებისაც. ავტ). მე კი არ მაინტერესებს საბოლოო ჯამში, მარა მკითხველი კარგადაა გარკვეული, ნუ გეშინია! იციან რა, რისი გამკეთებელიც ვარ ჩემი ქვეყნისთვის, შენ როგორც არ უნდა დაწერო, იმის არ იყოს, კითხვა რომ დამისვი რატომ დაგაჯილდოვა პატრიარქმაო, ეს უკვე სასაცილოა რა! (გუშინ, რამაზ ნიკოლაიშვილი სრულიად საქართველოს პატრიარქმა ერისა და ეკლესიის წინაშე განსაკუთრებული ღვაწლისთვის სიგელით დააჯილდოვა. ავტ) ეს სცილდება ჟურნალისტიკას, რა! რატომ დაგაჯილდოვა პატრიარქმაო? ეს არის შენი ჟურნალისტური კარიერის ყველაზე მაგარი კითხვა, რა! რატომ დაგაჯილდოვა პატრიარქმა! მაგარია რა!
და მინისტრმა რამაზ ნიკოლაიშვილმა ტელეფონი გაგვითიშა…
