18 აგვისტოს, პრეზიდენტ სააკაშვილის შეხვედრა შუხუთის საჯარო სკოლის ეზოში მიმდინარეობდა. ტერიტორიაზე შესვლას მკაცრად აკონტროლებდნენ როგორც დაცვის სამსახური, ასევე პრეზიდენტის პრესცენტრის თანამშრომლები.
ნათია ბანძელაძის პირადი მოთხოვნით, ფოტო და ვიდეოაპარატურა ოპერატორს დავუტოვე და ეზოში სრულიად “განიარაღებული” შევედი. “გურია ნიუსის” ოპერატორი ნოდარ მინაძე სკოლის ეზოდან დაახლოებით 200 მეტრის დაშორებით იღებდა შეხვედრის კადრებს.
წინასაარჩევნო შეხვედრა დასასრულს უახლოვდებოდა, როცა ოპერატორმა ტელეფონით შემატყობინა, რომ უცნობმა მამაკაცმა ფოტო და ვიდეოკადრების წაშლა აიძულა. როგორც ნოდარ მინაძე ჰყვება, მას მოულოდნელად მიუახლოვდა უცნობი და გაყოლა მოითხოვა, ხოლო როცა წინააღმდეგობის გაწევა სცადა, იგი დაემუქრა. მისი აგრესიის მიზეზი აღმოჩნდა ოპერატორის მიერ სამსახურებრივი მოვალეობის შესრულების მცდელობა. უცნობი პირი ამტკიცებდა, რომ არ გვქონდა ქვეყნის პირველი პირის შეხვედრების გადაღების უფლება. მან მუქარით აიძულა ოპერატორი თავისი ხელით წაეშალა კადრები, წინააღმდეგ შემთხვევაში, აპარატურის განადგურებით დაემუქრა.
ფაქტის გამოქვეყნების გარდა, ჩვენ დავუკავშირდით მაშინდელი სახალხო დამცველის, გიორგი ტუღუშის აპარატს და ფაქტის შესახებ ვაცნობეთ. ინციდენტიდან რამდენიმე დღეში “გურია ნიუსის” ოპერატორს დაუკავშირდა სახალხო დამცველის აპარატის თანამშრომელი და თხოვა, ელექტრონული ფოსტით გადაეგზავნა განცხადება ამ ფაქტთან დაკავშირებით.
გამოქვეყნებულ მასალას გამოხმაურება მოჰყვა სახელმწიფო დაცვის სამსახურის მხრიდან _ მათი მოსაზრებით, პირი, რომელმაც ლანჩხუთში, ჟურნალისტებს ხელი შეუშალა, არ იყო ამ უწყების თანამშრომელი ოზურგეთში მომხდარი ანალოგიური შემთხვევიდან განსხვავებით; ოზურგეთში “გურია ნიუსის” ჟურნალისტებს სწორედ სახელმწიფო დაცვის სამსახურმა წაუშალა ფოტო და ვიდეომასალა. ამ ფაქტის უწყებათშორის კომისიისთვის მიწოდების შემდეგ, სახელმწიფო დაცვის სამსახური დაგვიკავშირდა და წაშლილი მასალების აღდგენა შემოგვთავაზა.
ლანჩხუთის პოლიციის სამმართველოს გამომძიებელმა ირაკლი კაცაძემ გვაცნობა, რომ აღნიშნულ ფაქტთან დაკავშირებით, დაწყებულია გამოძიება. გამომძიებელმა, პროფესიულ საქმიანობაში ხელის შეშლის ფაქტთან დაკავშირებით, უკვე დაკითხა “გურია ნიუსის” ჟურნალისტები.
