ამასთან დაკავშირებით სასჯელაღსრულების, პრობაციის და იურიდიული დახმარების სამინისტროს საზოგადოებასთან ურთიერთობის სამსახურის უფროსი, რეზო ხოფერია ,”გურია ნიუსთან” აცხადებს: “როგორც დეპარტამენტის უფროსმა განაცხადა, ამ პატიმართან დაკავშირებით, პირადად გაეცანო მის საქმეს და ნახა, რომ ჩვენთან დეპარტამენტს ამ მსჯავრდებულის საქმე განხილული აქვს. მისი საქმე გადაგზავნილი გვქონდა და სიაშიც იყო, მაგრამ არ ვიცით შემდეგ რა მოხდა; სად მოხდა ამ ადამიანის სიიდან ამოღება და უარის თქმა.ჩვენს შემდეგ ორი ინსტანცია არის გასავლელი. დეპარტამენტიდან _ სამინისტროში იგზავნება, შედეგ _ პროკურატურაში, ანუ რაღაც ფილტრებია და ერთ–ერთს უარი აქვს ნათქვამი. ეს უკვე დეპარტამენტის უფროსს აღარ ეხება. პატიმარ კ.ჯ–ს უმძიმესი მდგომარეობა აქვს. მაგრამ, როგორც კი ამის საშუალება იქნება და ჯანდაცვის სამინისტროსთან ერთად, მუდმივმოქმედი კომისია შეიქმნება, პირველი ამ პატიმრის საკითხი გადაწყდება. კონკრეტული მიზეზი ნამდვილად არ ვიცით რა მოხდა“, _ ამბობს ხოფერია.
გუშინ, პატიმარ კ.ჯ–სთან პაემანზე, მეუღლე ი.ჯ. იმყოფებოდა. “გურია ნიუსთან” ი.ჯ. აცხადებს: “ძალიან ცუდი მდგომარეობა აქვს. მარჯვენა ფეხს საერთოდ ვერ ამოძრავებს. 4 ადგილას სხეულზე მეტასტაზები აქვს გამოსული. პერიოდულად აქვს სისხლდენა, სუნთქვა უჭირს და ძლივს ლაპარაკობს. ასე მითხრა: რატომ უნდათ ციხეში მოვკდე, ვერ გავიგე, რას მიკეთებენო. დღეს ძალიან გაღიზიანებული იყო. ერთსაათიანი პაემანი გვქონდა, მაგრამ ნახევარ საათზე მეტი ვერ გაჩერდა. ცუდად გახდა.ვინ ამოიღო ჩემი ქმარი სიიდან, ამაზე პასუხი ვერავინ გამცა.”
_ რა გითხრათ გლდანის #18 ციხის ადმინისტრაციამ, რატომ არ გაათავისუფლეს თქვენი მეუღლე?
_ იქ რომ შევედი ადმინისტრაციაში, მითხრეს, ჩვენ პასუხის გაცემა არ შეგვიძლიაო. ჩემმა მეუღლემ მითხრა, ორი წერილი მომივიდა, ამ კვირაში კიდევ უნდა წამიყვანონ შემოწმებაზეო.
რა შემოწმებას ითხოვენ, ყველაფერი გამოკვლეულია, ადამინს მე-4 სტადიის კიბო აქვს. უმძიმესი მდგომარეობაა. 10 გვერდიანი დასკვნა გადავაქსეროქსე და მუდმივმომქმედ კომისიაში დავტოვეთ.
ჩემს მეუღლეს ვკითხე, შენ რა გითხრეს, გასათავისუფლებელ მძიმე ავადმყოფ პატიმართა სიიდან რატომ ამოგიღეს-თქო? მიპასუხა: ვერ მეუბნებიან რატომ ამომიღეს სიიდან, ისე სიაში ვყოფილვარო. გაგიჟებულია, ვერ ვხდები რა უნდათ. იმიტომ დავბრუნდი საქართველოში და ჩავბარდი, კიბოიანი კაცი ვარ, ჩემი 4 წლის შვილის ნახვა მინდოდა და მასთან სიკვდილი. მე მგონი, ესენი გამოშვებას აღარ აპირებენ და აქ მკლავენო.
_ როგორც ვიცით, თქვენ სასჯელაღსრულების სამინისტროში ნათია ლანდიას შეხვდით. რა გითხრათ, სიიდან ვინ ამოიღო თქვენი მეუღლე?
_ ლანდიასთან რომ შევედი, უთხარი მე კ.ჯ.–ს მეუღლე ვარ. ჩემი მეუღლე პარასკევს უნდა გაგეთავისუფლებინათ და იგი სიაშიც კი არ ყოფილა მეთქი. საუბარი გამაწყვეტინა და მითხრა: რა ვქნა ქალბატონო, თქვენი მეუღლე სიაში იყო, ვინ და სად, ან რატომ ამოიღეს, ამაზე პასუხის გაცემა არ შემიძლიაო. მითხრა, სიაში პირველი მყავს თქვენი მეუღლე, პირობას გაძლევთ, 21 რიცხვში გამოვუშვებთო. როცა ვკითხე, ვის მოვთხოვო პასუხი იმისთვის, რომ კიბოიანი კაცი სიიდან ამოიღეს, შეუძლია ვინმეს პასუხის გაცემა, სიაში მყოფი ადამიანი ვინ ამოიღო მეთქი, მხრები აიჩეჩა.
მეუღლეს ვუთხარი, გადაწყვეტილი მაქვს, რადგან სიიდან ამოგიღეს, ბავშვს ჩამოვიყვან და ვიშიმშილებ. სხვა გზა მე არ დამრჩენია. პასუხი გასცენ 4 წლის ბავშვს, რატომ ამოიღეს სიიდან კიბოიანი პატიმარი, რომელსაც სულ რადენიმე დღე აქვს დარჩენილი. რას ვითხოვ, მომცენ ეს ადამიანი, სახლში რომ მოკვდეს. ციხეში ნუ დაასრულებინებენ სიცოცხლეს.
ვინ ამოიღო კიბოიანი პატიმარი სიიდან, პასუხი ვერ გამცეს!
