რა ბედი ელის ამ მანქანას? გაიყიდება, თუ ისევ მუნიციპალიტეტში დარჩება? ამ საკითხის გასარკვევად “გურია ნიუსი” სამსახურის უფროსს სპირიდონ სურმავას ტელეფონით დაუკავშირდა, რომელმაც გვითხრა, რომ ვერ გაგვცემდა ამ კითხვაზე პასუხს, რადგან მის კომპეტენციაში არ შედიოდა და დაამატა, მიმართეთ გამგებლის ყოფილ მოადგილეს, გიორგი დუნდუას, რომელიც კურირებდა სოფლის მეურნეობასო. გიორგი დუნდუა ახლა გამგეობის ეკონომიკური განვითარების, სტატისტიკისა და ინვესტიციების სამსახურის უფროსის მოვალეობის შემსრულებელია.
გიორგი დუნდუა: ეს მანქანა გამგეობის მუნიციპალიტეტის ბალანსზეა და ალბათ მუნიციპალიტეტს დარჩება. ჩვენს ახალ სამსახურს ბევრი და საკმაოდ შრომატევადი საქმეები აქვს და მართლაც საჭიროა გვყავდეს ტრპანსპორტი. ამ ეტაპზე არ არის გარკვეული ვის სარგებლობაში გადავა, მაგრამ ერთი ვიცი, რომ ეს გამგეობის ქონებაა და დარჩება აბაშაში.
– ბატონო გიორგი, სოფლის მეურნეობის განვითარების სამსახურს რამდენად ესაჭიროებოდა ასე ძვირადღირებული მანქანა? არ შეიძლებოდა სოფლის დანგრეულ გზებზე უფრო ნაკლებფასიანი მანქანით ევლოთ თანამშრომლებს საქმეებზე?
– ეგ ჩემს კომპეტენციაში არ შედის. ასეთი მანქანები ჰყავს მარტვილს, სენაკს. ეს მანქანები სოფლის მეურნეობის მაშინდელი მინისტრის, ზაზა გოროზიას ბრძანებით იქნა შეძენილი.
_ რატომ ავალებდა სამინისტრო მანქანების შეძენას მუნიციპალიტეტებს? რა დაჯდა ამ მანქანის შეძენა? ხალხი ამბობს 15 ათასიანი ავტომანქანა არისო. მართალია?
– რატომ მავალებდა ვერ გეტყვით, არ ვარ კომპეტენტური, არც ის ვიცი, ნამდვილად რა თანხა იქნა გადახდილი, ამას უფრო გამგებელი გეტყვით.
რადგან გამგებელი ადგილზე არ დაგვხვდა, იმის გასაგებად, თუ რა ღირებულებისაა და ვის მფლობელობაში გადავა ეს მანქანა, გამგებელის მოადგილეს, მაია ბესელიას ვესაუბრეთ.
მაია ბესელია: ის მანქანა არის მუნიციპალიტეტის საკუთრება, მაგრამ დროებით სარგებლობაში გადაცემული იყო გამგებლის მოადგილის მფლობელობაში, რომელიც სოფლის მეურნეობის საკითხებს კურირებდა, რათა სოფლის მეურნეობის განვითარების სამსაურს შეძლებოდა სოფლებში გასვლა და საქმეების მოგვარება. მანქანა დარჩება მუნიციპალიტეტში, მოემსახურება ყველას, მუნიციპალიტეტის ნებისმიერ თანამშრომელს, ვისაც დასჭირდება რაიმე საქმეზე გასვლა და საქმის მოგვარება.
– რა თანხა იქნა ამ მანქანაში გადახდილი და რითი იყო განპირობებული ასე ძვირადღირებული ავტომანქანის შეძენა?
– მანქანა, რამდენადაც მე ვიცი, სამინისტროს მოთხოვნით იქნა შეძენილი.
– რატომ ავალებდა სოფლის მეურნეობის სამინისტრო ძვირადღირებული მანქანების შეძენას მუნიციპალიტეტებს?
– ეს ერთი წლის წინანდელი მოვლენებია და მე ვერ გეტყვით რა აუცილებლობას წარმოადგენდა მისი და არა ვთქვათ უფრო დაბალფასიანი მანქანის შეძენა. ვერც იმაზე გაგცემთ პასუხს, რატომ მოხდა სამინისტროს მოთხოვნით ეს. ისე კი მინდა გითხრათ, რომ მედიასთან ურთიერთობას არეგულირებს გამგებლის მოადგილე გიორგი სიმონია, ასე რომ შეგიძლიათ მას მიმართოთ.
– სამწუხაროდ, ვერ შევხვდით გიორგი სიმონიას. ეს გუშინდელ სტატიაშიც აღვნიშნეთ, დღეს უკვე მესამედ მოვედით და მისი კაბინეტი ისევ დაკეტილია. ტელეფონით დავუკავშირდი 14 საათსა და 34 წუთზე, მითხრა, რომ აუცილებლად დამიკავშირდებოდა, მაგრამ როგორც ხედავთ, სამუშაო საათი მთავრდება და კიდევ არ მოსულა. რადგან გამგებელიც ვერ ვნახეთ, ამიტომ მოგმართეთ თქვენ.
– პრობლემა არ არის, მე რაც შემიძლია, ყოველთვის გაგცემთ პასუხს, მაგრამ რადგან ეს ფუნქცია ოფიციალურად ავალია გიორგი სიმონიას, არ მინდა ვინმეს ფუნქციაში შევიჭრა და სხვის მაგივრად გავაკეთო კომენტარები. ის უფრო უნდა ფლობდეს ინფორმაციებს და იმედია, მომავალში გია უფრო ამომწურავ პასუხებს გაგცემთ.
ვესაუბრეთ გამგეობის სამ თანამშრომელს, თუმცა მაინც ვერ გავიგეთ რატომ ავალებდა სოფლის მეურნეობის სამინისტრო ძვირადღირებული მანქანების შეძენას მუნიციპალიტეტებს, ამიტომ დავუკავშირდით ექსპერტს სოფლის მეურნეობის დარგში ალექსანდრე ლომოურს და ამ კითხვით მივმართეთ.
ალექსანდრე ლომოური: ძვირადღირებული მანქანები, ჰიბრიდული სიმინდის პროგრამა და სხვა… ეს ყველაფერი გამოსაძიებელია, რადგან ძალიან ბევრ კითხვას ბადებს, ამიტომ ძნელია ახლა ითქვას თუ რატომ ავალებდა. სამინისტროს ჰქონდა უფლება სახელმწიფო ბიუჯეტი გამოეყენებინა სოფლად მცხოვრები საზოგადოების დასახმარებლად და არა ძვირადღირებული ტექნიკის შესაძენად. სოფლის მეურნეობის სამინისტროს ბიუჯეტი არის საზოგადოებისთვის და ის არ უნდა ხმარდებოდეს საკუთარ ამბიციებს. თუმცა, ეგ ყველაფერი არ არის და გამოსაძიებელია ბევრი საქმეა, რაც სოფლის მეურნეობაში ხდებოდა… იმედია გამოძიება დაინტერესდება წინა ხელისუფლების სოფლის მეურნეობის მინისტრებით და გაარკვევს თუ რატომ იხარჯებოდა ასე ხელაღებით სახელმწიფო ბიუჯეტიდან გამოყოფილი თანხები, რომელიც სოფლების განვითარებას უნდა მოხმარებოდა….
