როგორ ვებრძოლოთ კრაზანას თუ "ბაზს", როგორც ჩვენში უწოდებენ მას? ისინი ზაფხულში საკმაოდ მომრავლდებიან და მათი ნაკბენიც სახიფათოა.
ღამურებმაც აქტიურად დაიწყეს ფრენა. ზოგჯერ, ღამით ღია ფანჯარაშიც შემოფრინდებიან ხოლმე, რისიც ბავშვებს განსაკუთრებით ეშინიათ.
ია ბერაძე, ოზურგეთი
ე.წ. "ბაზი" კრაზანასებრთა ოჯახის წარმომადგენელია. მართალია, მას ძალიან უფრთხიან, მაგრამ რაოდენ დაუჯერებლადაც უნდა მოგეჩვენოთ, ის სასარგებლო მწერია და ბევრ მავნე მწერს ანადგურებს თვითონაც და ბარტყების გამოსაკვებადაც მიაქვს. იგი ბალახეულით არ იკვებება, საერთოდ არ აზიანებს ყვავილოვნებს თუ სხვა მცენარეების ფოთლებს. გვახსოვდეს, რომ ის ადამიანზე აგრესიულად არ იწევს, თუ ჩვენ თვითონ არ მოვუქნევთ რაიმეს ან შემთხვევით არ "გადავეყრებით". თუ მაინც და მაინც გიკბინათ და ეს იშვიათად, მაგრამ ხდება, ნაკბენზე სასწრაფოდ დავიდოთ ყინულის ნაჭერი _ ეს ხელს უშლის ორგანიზმში შხამის შესვლას, და დავლიოთ ალერგიის საწინააღმდეგო ანტიბიოტიკი. მდგომარეობის გაუარესების შემთხვევაში კი მივმართოთ ექიმს.
რაც შეეხება ღამურას, ისიც სასარგებლო ღამის ფრინველია. ანადგურებს მავნებელ მწერებს, მღრღნელებს და ადამიანის მიმართ არასოდეს იჩენს აგრესიას. თუ თქვენს ირგვლივ კრაზანა ან ღამურა დაფრინავს, ჩათვალეთ, რომ სანიტარი მოძრაობს, რომლებიც გარშემო ანადგურებენ მავნებელ მწერებს თუ მღრღნელებს. ამიტომ, ნუ მოკლავთ ღამურას, თუ ამის აუცილებლობა არ არის.
აკაკი ღლონტი, სწავლული აგრონომი
