პატივცემულო რედაქცია! წელს კვირტის ტკიპას გარდა, შევამჩნიეთ, რომ თხილის ნებისმიერ ბუჩქზე ტოტების კენწეროები წამხმარია. რა შეიძლება იყოს ამის მიზეზი? ხომ არ დადგება თხილის პლანტაციების სრულად გახმობის საშიშროება?
ნონა ლომჯარია, ნუგზარ ანთიძე, ბაჩი მამინაშვილი,ზურაბ ლომჯარია, ლადო სალუქვაძე, ჟორა კვირკველია,კოტე თავაძე, ნინო სალუქვაძე, ქეთევან ურუშაძე, ოზურგეთი
თხილის მრავალი დაავადება არსებობს. კვირტის ტკიპას მიერ მიყენებული დაზიანება ასეთი ფორმით არ ვლინდება. შესაძლოა, ეს ამბროზიის ხოჭოსგან იყოს გამოწვეული. თუმცა, ამ შემთხვევაში გამხმარი წვეროს თუ ღეროს ნედლ სიღრმეში, როცა გადავტეხავთ, სიმწვანეში განივად უნდა იყოს ღრუ. ვიცით, რომ ამბროზიის ხოჭოს ხარაბუზა ჯდება კენწეროზე, ღეროს ხვრეტს და შედის სიღრმეში, რის შემდეგაც იწყება ხმობა. თუ ასე არ არის, ეს სულაც შეიძლება იყოს შარშანდელი გვალვის შედეგი.
ასეთ დროს კენწეროების კვირტები ვერ ასწრებს გახარებას და მომდევნო სეზონზე უკვე ხმელია. შესაძლოა, ეს იყოს ნიადაგის მჟავიანობის შედეგი და მიწას სჭირდებოდეს მოკირიანება, სხვადასხვა მინერალებით გამდიდრება. ყველა შემთხვევაში საჭიროა, ფერმერებმა მეტი ყურადღება მიაქციონ თხილის მოვლის საქმეს. როცა პრობლემა თავს იჩენს, აუცილებელია რამდენიმე ადამიანი მაინც შეიკრიბოს, შეგვატყობინონ და ჩვენ ადგილზე გავეცნობით პრობლემას. უნდა ვთქვა, რომ ჩვენ ხშირად ვატარებთ სემინარებს, კონსულტაციებს, ვურეკავთ არაერთს, რომ მოვიდნენ, ისაუბრონ მოწვეულ სპეციალისტების თანდასწრებით, რა უჭირთ, რა პრობლემები აქვს მცენარეს. თუმცა ნაკლებად მოდიან და გასაჭირი როცა მოადგება კარს, ზოგი მაშინ აქტიურობს. მანამდე კი თავს არ იწუხებს. ჩვენ გვინდა, თხილმა სულ მოგვცეს ნაყოფი, ხოლო ბუჩქს რომ მუდმივი მოვლა, მკურნალობა და ყურადღება სჭირდება, ეს გვავიწყდება.
აკაკი ღლონტი,
ფერმერი, აგრონომი
