ორგანიზაცია “საქართველოს დემოკრატიულმა ინიციატივამ” და “ადამიანის უფლებათა დაცვის ევროპულმა ცენტრმა”, შსს მაღალჩინოსნის მხრიდან სისტემატური ძალადობის მსხვერპლი ქალის სახელით, ადამიანის უფლებათა ევროპულ სასამართლოს, საქართველოს წინააღმდეგ, საჩივრით მიმართა.
აღნიშნულ ფაქტთან დაკავშირებით, “საქართველოს დემოკრატიული ინიციატივა” განცხადებას ავრცელებს, რომელშიც აღნიშნულია, რომ შსს მაღალჩინოსანი _ საექსპერტო კრიმინალისტიკური სამსახურის ხარისხის მართვის სამმართველოს უფროსის მოადგილე გიორგი ბერიძე, საკუთარ თანამდებობას და გავლენებს იყენებდა, ძალადობის ფაქტებზე სამართალდამცავთა მხრიდან მის მიმართ წარმოებული სამართლებრივ პროცესებზე ზეგავლენის მოხდენის მიზნით.
“ქალბატონი თ.ტ. მისი მეგობარი მამაკაცის, შსს-ს მაღალჩინოსნის, საექსპერტო კრიმინალისტიკური სამსახურის ხარისხის მართვის სამმართველოს უფროსის მოადგილე გიორგი ბერიძის მხრიდან, 2015-2016 წლებში, განიცდიდა ფიზიკურ და ფსიქოლოგიურ ძალადობას. საქმეში იკვეთება ინტენსიური ფიზიკური ძალადობის 6 დამოუკიდებელი შემთხვევა. მსხვერპლის მიერ წარმოდგენილი ინფორმაციით და მტკიცებულებებით ირკვევა, რომ ძირითადად, ძალადობის საფუძველი სქესის ნიშნით დისკრიმინაცია იყო. ძალადობის გარკვეულ შემთხვევებში, შეიძლება ითქვას, რომ მოძალადე მოქმედებდა, როგორც სახელმწიფოს წარმომადგენელი, იყენებდა საკუთარ თანამდებობას და გავლენებს ძალადობის ფაქტებზე სამართალდამცავთა მხრიდან მის მიმართ წარმოებული სამართლებრივ პროცესებზე ზეგავლენის მოხდენის მიზნით. საქმის გარემოებებიდან ასევე ირკვევა, რომ სახელმწიფო ძირითად შემთხვევებში ინფორმირებული იყო ქალბატონ თ.ტ.-ს მიმართ მიმდინარე სისტემატური ძალადობის შესახებ. მიუხედავად ამისა, სამართალდამცავი ორგანოებისა და ზოგადად სახელმწიფოს ქმედებები არაეფექტური იყო მსხვერპლის მიმართ ძალადობის აღკვეთის, პრევენციისა და სავარაუდო დანაშაულების გამოძიების კუთხით”, _ ნათქვამია განცხადებაში.
როგორც GDI-ის განცხადებაშია ნათქვამი, პროკურატურამ, შსს მაღალჩინოსნის მიმართ დანაშაულის არარსებობის საფუძველზე, გამოძიება შეწყვიტა.
“პროკურატურამ 2015 წლის ოქტომბერში ჩადენილ ძალადობაზე დაწყებული გამოძიება 2016 წლის მაისში დანაშაულის ნიშნების არარსებობის საფუძვლით შეწყვიტა. თუმცა, იმავე ფაქტზე, საქართველოს შსს-ს გენერალურმა ინსპექციამ, გიორგი ბერიძეს დისციპლინური გადაცდომა დაუდგინა და აღნიშნა, რომ დისციპლინური გადაცდომა,” _ ნათქვამია წერილში.
“საქართველოს დემოკარტიული ინიციატივის” ინფორმაციით, 2018 წლის 5 მარტის დასკვნის მიხედვით, საექსპერტო კრიმინალისტიკური სამსახურის ხარისხის მართვის სამმართველოს უფროსის მოადგილემ გიორგი ბერიძემ, პირადი მიზნით, თ.ტ-ს პერსონალური მონაცემები, 2016 წლის 4-18 თებრვალს და 16 ივნისს პერსონალურ მონაცემთა ბაზაში უკანონოდ გადამოწმა, რაც პერსონალურ მონაცემთა დაცვის ინსპექტორმაც დაადასტურა.
“გურია ნიუსი” შეეცადა საექსპერტო კრიმინალისტიკური სამსახურის ხარისხის მართვის სამმართველოს უფროსის მოადგილე გიორგი ბერიძეს დაკავშირებოდა, თუმცა, ეს ვერ მოხერხდა; ბერიძის პრესსამსახურის წარმომადგენელმა კი განგვიცხადა, რომ პროკურატურისთვის მიგვემართა.
ასევე, ინფორმაციის გადამოწმების მიზნით, “გურია ნიუსი” პერსონალურ მონაცემთა დაცვის ინსპექტორის აპარატს დაუკავშირდა. თავდაპირველად, ფაქტი პრეს-სამსახურში დაგვიდასტურეს და შეგვპირდნენ, რომ სრულ კომენტარს წერილობით მოგვაწვდიდნენ, თუმცა რამდენიმე წუთში უარი განაცხადეს. უარის მოტივად “საქართველოს დემოკრატიული ინიციატივის” მიერ, შსს მაღალჩინოსნის ვინაობის გამჟღავნება დაასახელეს. აპარატის პრესსამსახურმა გვირჩია, აღნიშნული ორგანიზაციისთვის მიგვემართა და მის მიერ მოწოდებული ფაქტებით გვეხელმძღვანელა.
“რადგან მოხდა ორგანიზაციის მიერ პირის ინდეფიცირება, ჩვენ ვერ დაგიდასტურებთ, რადგან ეს არის პირის პერსონალური მონაცემები; ჩვენ ამ სტადარტით არ ვმუშაობთ. მიმართეთ აღნიშნულ ორგანიზაციას და მათ მიერ მოწოდებული ინფორმაცია შეგიძლიათ გამოიყენოთ ფაქტებად; ტყუილი რომ იყოს, ხომ არ იტყოდენ?! რადგან საქართველოს დემოკრატიული ინიციატივა არის თ.ტ.-ს წარმომადგენელი ანუ მხარე, გამოითხოვა ინფორმაცია და ჩვენც მივაწოდეთ. მათ აქვთ ყველა დოკუმენტი, აღნიშნულთან დაკავშირებით”, _ განაცხადეს პერსონალურ მონაცემთა დაცვის ინსპექტორის აპარატში.
როგორც დამცველი ორგანიზაციის წარმომადგენლები ამბობენ, “2018 წლის 05 მარტის დასკვნით, პერსონალურ მონაცემთა დაცვის ინსპექტორმა დაადასტურა, რომ შსს-ს მაღალჩინოსანმა, გიორგი ბერიძემ, 2016 წლის 04, 18 თებერვალსა და 16 ივნისს, თ.ტ-ს პერსონალური მონაცემები არასამსახურებრივი (პირადი) მიზნით, შსს-ს მონაცემთა ბაზებში უკანონოდ გადაამოწმა”.
“საქართველოს დემოკრატიული ინიციატივა” ქალბატონ თ. ტ.-ს ინტერესებს 2017 წლის ივლისიდან იცავს. ევროპულ სასამართლოში წარდგენილ საჩივარში, ორგანიზაცია მომჩივნის მიმართ სახელმწიფოს მხრიდან ევროპული კონვენციის მე-3 (წამების აკრძალვა) და მე-14 (დისკრიმინაციის აკრძალვა) მუხლების დარღვევას ასაბუთებს.
