ბერას ახალ მუსიკალურ კლიპს _ „ვითხოვ ლეგალიზებას“, ლეიბორისტული პარტიის ლიდერი შალვა ნათელაშვილი ეხმაურება.
მისი თქმით, მმართველ ოჯახს ნარკოტიკებით ვაჭრობის დაკანონება აქვს გადაწყვეტილი, რასაც ერის რისხვა მოყვება.
„მმართველ ოჯახს ნარკოტიკებით ვაჭრობის დაკანონება აქვს გადაწყვეტილი. როგორც დიქტატურის წლებში ჩინეთი იმართებოდა მაო ძედუნის დაძიბაოებით, ისე დღეს საქართველო იმართება ბერა ივანიშვილის კლიპებით, საიდანაც წუხელ შევიტყვეთ, რომ მმართველ ოჯახს ახალგაზრდების დასაქმების, განათლების, გამრავლების, ჯანსაღი დასვენების ნაცვლად, გადაწყვეტილი აქვს ნარკოტიკებით ვაჭრობის დაკანონება.
მინდა გავაფრთხილო მთავარი ნარკობარონი ივანიშვილი (ამაში ეჭვი, ალბათ, აღარავის ეპარება), ერის რისხვა გარდაუვალი იქნება, თუ მოახდენ ახალგაზრდობის გადასაშენებელი ნივთიერებით თავისუფალი ვაჭრობის ლეგალიზაციას.
ის, ასევე, პარლამენტარებს მოუწოდებს, რომ ნარკოვაჭრობაზე სამუდამო პატიმრობა დააწესონ, რადგან სხვა შემთხვევაში ახალგაზრდა თაობა ვერ გადარჩება.
„მოვუწოდებ პარლამენტს, შეიკრიბეთ და დააწესეთ ნარკოვაჭრობაზე სამუდამო პატიმრობა, ამნისტიისა და შეწყალების გარეშე. გასაგებია, რომ ნარკომომახმარებლები ციხეში არ უნდა ისხდნენ, მაგრამ ნარკოვაჭრების ფეხქვეშ მიწა უნდა იწვოდეს.
მხოლოდ ამ გზით მოვახერხებთ ახალგაზრდების და მომავალი თაობის სულიერ და ფიზიკურ გადარჩენას იმ ფონზე, როცა კარს მოგვდგომია ნარკოტიკების ოკეანე ირანიდან, შია აზიიდან, პაკისტანიდან და იმ ფონზე, როცა ხელისუფლება პირდაპირ მფარველობს ნარკოვაჭრობას და ნარკობარიგებს“, _ ამბობს ნათელაშვილი.
