გუშინ ცნობილი გახდა რომ იტალიური „ნაპოლის“ ნიგერიელი თავდამსხმელი ვიქტორ ოსიმენის შეძენა ინგლისურ კლუბებს სურთ. „არსენალი“, „მანჩესტერ იუნაიტედი“ და „ნიუკასლი“ ყველაფერს გაიღებენ შედეგიანი შემტევი საკუთარ რიგებში რომ იხილონ.
ცნობილი გახდა იტალიური გუნდის ხელმძღვანელობის რეაქციაც. „ნაპოლი“ არ აპირებს, რომ ოსიმენი ინგლისურ პრემიერლიგაში 150 მილიონ ევროზე ნაკლებად გაასხვისოს.
ოსიმენის აგენტის განცხადებით, ვიქტორი ახლა მხოლოდ მიმდინარე სეზონსა და იტალიის ჩემპიონის ტიტულის მოგებაზე ფიქრობს. მას ნეაპოლელებთან კონტრაქტი 2025 წლის ზაფხულამდე აკავშირებს.
ცნობილი გახდა რომ „ნაპოლი“ მთავარ მწვრთნელ ლუჩანო სპალეტისთან ხელშეკრულების გახანგრძლივებას აპირებს. ლუჩანოს კონტრაქტი მიმდინარე სეზონის ბოლოს ეწურება, თუმცა კლუბის პრეზიდენტი აურელიო დე ლაურენტისი მისი მუშაობით კმაყოფილია.
ნეაპოლელებს სურთ, რომ სპალეტისთან კონტრაქტი 2025 წლის ზაფხულამდე გაახანგრძლივონ და ხელფასიც გაუზარდონ.
ლუჩანო სპალეტი „ნაპოლის“ 2021 წლიდან ავარჯიშებს. მანამდე მას „ინტერში“, „რომაში“, „ზენიტში“, „უდინეზეში“, „ანკონაში“, „ვენეციასა“ და „სამპდორიაში“ უმუშავია.
იტალიელმა ფეხბურთის სპეციალისტმა ანტონიო კონტემ კი შესაძლოა ინგლისური „ტოტენჰემი“ საკუთარი ნებით დატოვოს. იტალიური მედიის ცნობით, იტალიელი სპეციალისტი არც თავისი მუშაობითაა კმაყოფილი და არც კლუბის ხელმძღვანელობით.
კონტე მიმდინარე სატრანსფერო პერიოდში მინიმუმ ორი ფეხბურთელის დამატებას ითხოვს, თუმცა მისი სურვილი კლუბმა ამ დრომდე ვერ შეასრულა. ამის გარდა, „ტოტენჰემი“ არასტაბილურად თამაშობს და ჩემპიონთა ლიგის ზონის მიღმაა.
იტალიელ სპეციალისტს ამჟამინდელ გუნდთან კონტრაქტი მიმდინარე სეზონის ბოლოს უსრულდება.
გუშინ, მოსკოვის „ლოკომოტივის“ ყოფილმა ნახევარმცველმა დმიტრი ტარასოვმა რუსს ჟურნალისტებს 2019 წელს ხვიჩა კვარაცხელიას გუნდიდან წასვლის შესახებ ესაუბრა.
„ის, რომ ხვიჩა გაუშვეს, კლუბის პრეზიდენტისა და სპორტული დირექტორის ბრალია. ის იური სიომინმა მოიყვანა გუნდში. მაგრამ მათ ეტყობა ვერ დაინახეს ქართველში პოტენციალი.
თუმცა ის უნიჭიერესია. მახსოვს მისი პირველი ვარჯიშები „ლოკომოტივში“. თავიდანვე ჩანდა, რომ ტექნიკური და გონიერი ყმაწვილი იყო. ცოტა დახმარება სჭირდებოდა რათა ეზოს ფეხბურთი არ ეთამაშა. თავიდან სწორედ ასე ირჯებოდა, როცა ათ კაცს მიყოლებით ატყუებდა. ცხადია, გუნდური თამაში უნდა ესწავლა.
ვერ დააფასეს და „რუბინში“ წავიდა. ახლა კი ყველა ვხედავთ ვინ არის ხვიჩა. წარმატებებს ვუსურვებ. სოციალურ ქსელში ხშირად ვწერ და გამარჯვებებს ვულოცავ ხოლმე.“ – განაცხადა დმიტრი ტარასოვმა.
გუშინ, იტალიურმა საკალათბურთო კლუბმა „რეჯო ემილიამ“ ოფიციალურად განაცხადა, რომ ქართველი ბექა ბურჯანაძის გუნდიდან გაშვებას არ აპირებს.
ბურჯანაძეს პირველადი კონტრაქტი 18 იანვრამდე ჰქონდა გაფორმებული. ახალი შეთანხმების საფუძველზე კი კლუბში კიდევ ერთი თვე დარჩება. შემდგომი გადაწყვეტილება სწორედ ამის მერე იქნება მიღებული.
საქართველოს ნაკრების თავდამსხმელი „რეჯო ემილიაში“ გასული წლის 14 ნოემბერს ჩაირიცხა და იტალიური კლუბის მაისურით ჩემპიონატში ჩატარებულ 9 მატჩში საშუალოდ 19.6 წუთში 7.2 ქულა და 3.8 მოხსნა აქვს.
ბურჯანაძეს ბოლო შეხვედრებში სათამაშო დრო გაეზარდა და საუკეთესო შედეგიც სწორედ უკანასკნელ ტურში ჰქონდა, როდესაც „ტრენტოსთან“ სტუმრად მოგებულ მატჩში 23 წუთში 14 ქულა და 6 მოხსნა მიითვალა.
„რეჯო ემილიას“ იტალიის პირველობის 15 ტურში მხოლოდ 4 მოგება აქვს და ბოლო ადგილზე იმყოფება, თუმცა, უსაფრთხო ზონას მხოლოდ ერთი გამარჯვებით ჩამორჩება.
გუშინ ცნობილი გახდა, რომ ცუდი შედეგების მიუხედავად, იურგენ კლოპი „ლივერპულის“ მთავარი მწვრთნელის პოსტის დატოვებას არ აპირებს.
კლუბის ხელმძღვანელობა კვლავაც ენდობა გერმანელ სპეციალისტს და მუშაობაში ხელს არ უშლის.
ინგლისის პრემიერლიგის 19 მატჩში „ლივერპულმა“ 28 ქულა მოაგროვა და ცხრილში მეცხრე ადგილზე იმყოფება.
იურგენ კლოპი „ლივერპულს“ 2015 წლიდან წვრთნის. კლუბთან მის კონტრაქტს ვადა 2026 წლის 30 ივნისს ეწურება.
ავტორი
