დედაქალაქში მოქალაქეების პროტესტი არ წყდება. უკვე 12 დღეა სხვადასხვა პროფესიის და ასაკის ადამიანები ყოველ საღამოს პარლამენტის შენობასთან იკრიბებიან, მას შემდეგ რაც პრემიერმა ირაკლი კობახიძემ გამოაცხადა, რომ საქართველო ევროკავშირთან გაწევრიანების შესახებ მოლაპარაკებებს 2028 წლამდე აჩერებს და სრული წევრობისთვის მზად 2030 წლისთვის იქნება.
რა მოლოდინები აქვთ მოქალაქეებს- ამის გარკვევა “გურია ნიუსმა” პარლამენტის წინ შეკრებილ მოქალაქეებთან სცადა.
“იმედი მაქვს რომ დათმობენ ძალაუფლებას. იმიტომ ვდგევარ აქ რომ შემაშფოთებელი მდგომარეობაა. მე თვითონ საქართველოში არ ვცხოვრობ, მაგრამ აქ არის ჩემი ოჯახი და ჩამოვდივარ ხოლმე ჩემს შვილთან და მეუღლესთან ერთად ევროპიდან. იქ ძალიან იგრძნობა სად მიდის ეს ქავეყანა, იმიტომ რომ ჩვენ არ ვუყურებთ პროპაგანდისტულ არხებს, ვკითხულობთ ბეჭდურ მედიას, სადაც უფრო მეტი ლოგიკაა. სამწუხაროდ, ეს დღეს და გუშინ არ დაწყებულა. დიდი ხანია ხალხს ტვინს ურეცხავენ, თესავენ აგრესიას და უნდათ რომ გახლიჩონ ერი და ხელისუფლებაში დარჩენის გამო უნდათ, რომ ქვეყანა დატოვონ იმ სიბნელეში, საიდანაც მე იმედი მქონდა რომ გამოვედით, მაგრამ როგორც ჩანს არ გამოვსულვართ. იმ პოლიციელის, რომელიც მე მჯეროდა, ახლა უკვე მახსენდება ის 90-იანი წლები, როდესაც ქალები ძეწკვით ვერ გადიოდნენ ქუჩაში, ან თუ ვინმე გამოგეკიდებოდა, იმედი გქონდა, რომ პოლიციელს ნახავდი და ის დაგეხმარებოდა. ახლა ამ ნდობის დაკარგვა არის ძალიან ადვილი. მე თვითონ აქვე ვცხოვრობ სოლოლაკში და რომ გამოვდივარ, ვიწრო ქუჩებში გადაადგილების უკვე მეშინია, არადა მთელი ახალგაზრდობა აქ გავატარე. მინდა რომ ყველა დანარჩენ ქართველს, ჩემს შვილს, რომელიც აქ ჩამოვა ჰქონდეს ნდობა ამ ქვეყნის მთავრობის რომელსაც შეუძლია იყოს გარანტი იმ მშვიდობის, რომლისთვისაც ამდენი წელია ვიბრძვით”,_ ამბობს ეკა ადენაძე.
აქციაზე მყოფი დავით კალარედისი გვეუბნება, რომ ყოველდღე მიტინგზეა და ამ დღეების განმავლობაში დარბევაშიც მოუწია მოხვედრა, მაგრამ ამის მიუხედავად, დღეს მაინც რუსთაველის გამზრიზე დგას.
“ყოფილი საბერძნეთის მოქალაქე ვარ. ასეთ მძიმე პერიოდში მოვდივარ და ჩემს ქვეყანას გვერდში ვუდგავარ. რამენაირად უნდა მოხდეს შეთანხმება, რომ ხელახლა ჩატარდეს არჩევნები და ხალხი დაწყნარდეს. აქ ხშირად მოვდივარ. რამდენჯერმე დარბევაშიც მოვყევი, ხან წყლით გავიწუწე და ხან გაზის სუნთქვა მომიწია, მაგრამ მაინც აქ ვდგავარ და ხალხსაც მოვუწოდებ, რომ გამოვიდნენ და დადგნენ სამართალისთვის”,_ ამბობს ის.
აქციის კიდევ ერთი მონაწილე, რომელსაც ევროკავშირის დროშა უჭირავს ხელთ, ამბობს, რომ ხელისუფლებას ხალხის ევროპული არჩევანი არ მოსწონს და ამიტომ არც კაცს და არც ქალს აღარ ინდობს.
“აქ ჩემს უამრავ თანამოაზრესთან ერთად ვიმყოფები. ვაპროტესტებ ჩვენი ე.წ. მთავრობის საშინელ კურსს, რომელსაც სურს წავიდეს რუსეთისკენ და არ წავიდეს ევროპისკენ. მიჭირავს ევროკავშირის დროშა და ძალიან დიდი იმედი მაქვს რომ გავიმარჯვებთ. არ მომწონს არაფერი, რასაც ისინი ახლა აკეთებენ და პირველ რიგში ეს საშინელი ძალადობა, არავის აღარ ინდობენ, არც კაცს, არც ქალს. ჩვენს პროტესტს, რომ არ მოგვწონს რუსეთი და გვინდა ევროპა, ემატება ყოველდღე საშინელი ამბები, რასაც ვაპროტესტებთ და ძალიან დიდი იმედი მაქვს რომ რაღაცას მივაღწევთ. ძალიან ბევრი ვართ და არ მჯერა, რომ ეს ფუჭად ჩაივლის”,_ ამბობს აქციაზე მოსული თამარი.
“ასეთი მოქცევით თავიანთ მომხრეებს კარგავენ. ჟურნალისტ ქალს რომ თავსდაესხმევა და ასე მოექცევა, ის არაადამიანია. 74 წლის კაცი ვარ, არცერთი პარტიის წევრი არ ვყოფილვარ და ვიცი, რომ ჩემზე არავინ არ იზრუნებს, მაგრამ მინდა რომ ახალგაზრდებს გასაქანი მისცენ. ამიტომ ვდგევარ აქ”,_ ამბობს გურამ ქუხილავა.
მხატვარი ვაჟა ყავლელაშვილი კი აქციაზე თავისივე შესრულებული ნახატით მოვიდა.
“ მე-12 დღეა რაც აქ ვდგავართ. ნახატი გამოვიტანე მესიჯად. არჩევნების დარღვევაზე მეტად მნიშვნელოვანი ცოცხალი ოკუპაციაა . ეს ნახატი არის 2 წლის წინაა შესრულებული ზუსტად ცოცხალი ოკუპაციის თემაზე, რაც მე ყველაზე მეტად მეტკინა, როგორც შემოქმედს. დღესაც გამოვიტანე, რაღაც მხრივ დაემთხვა, ნაძვის ხე არის ჩემს ნახატზე. სამწუხაროდ, ბევრი რამ დაემთხვა და დღემდე არის ცოცხალი ოკუპაცია რუსეთის მხრიდან. რაზეც რეაქცია დიდად არც ოპოზიციას და არც ხელისუფლებას არ აქვთ. მოვუწოდებ ხელოვნებს, შემოქმედებს, მხატვრებს, ძალიან ბევრი მესიჯი გაავრცელონ, გამოხატონ და შემქნან ნამუშევრები იმ სოციალურ თემატიკაზე, რაც ხდება დღეს ქვეყანაში, რადგან ძალიან მნიშვნელოვანია ხალხისთვის და მე ვერ წარმომიდგენია დღეს შემოქმედი ადამიანი, იჯდეს და პეიზაჟებს ხატავდეს. როცა ყოველ დღე გვარბევენ და იჭერენ მშვიდობიან მოქალაქეებს”,_ ამბობს ვაჟა.
