მოხსენება ძირითადად ეხებოდა სამეგრელოს რეგიონში იძულებით გადაადგილებულ პირთა მდგომარეობას, განსახლების თანმდევ პრობლემებს, დევნილთა სტატუსის და ახლადშემუშავებული კანონპროექტით განსაზღვრულ სიახლეებს. პრეზენტაციას ესწრებოდნენ ადგილობრივი სამოქალაქო სექტორის და მედიის წარმომადგენლები.
“იძულებით გადაადგილებულ პირთა“ შესახებ პროექტის ხელმძღვანელის, თორნიკე ცაგარეიშვილის ცნობით, განსახლების პროცესში სხვადასხვა პრობლემები და ხარვეზები გამოვლინდა, როგორიცაა იძულებით გადაადგილებულ პირთა არასათანადო ინფორმირებულობა, არასაკმარისი გონივრული ვადის განსაზღვრა იმის მოსაფიქრებლად, სურდა თუ არა დევნილს სამინისტროს მიერ შეთავაზებული საცხოვრებელი ფართის მიღება, უწყების მიერ შემუშავებული ბუნდოვანი კრიტერიუმები, რომლითაც ოჯახები სხვადასხვა ობიექტებში გადაანაწილეს, მშენებლობების ნაჩქარევი ტემპი, სულადობის მიხედვით ფართების არასწორად გაცემა და სხვა.
სწორედ ამ პრობლემებზე და დარღვევებზე უკვე წლებია ლაპარაკობენ აბაშაში ჩასახლებული დევნილები, რომლებსაც კიდევ ერთი გადაუწყვეტელი საკითხი _ ბინების დაკანონება აწუხებთ.
ნაირა ბენიძე, დევნილი: “სახალხო დამცველის მოხსენებაში სხვა საკითხებთან ერთად მოხვდა მშენებლობა სწრაფი ტემპით და საქმის მწარმოებელი კომპანიების დაუდევრობა. ჩვენი საცხოვრებელი ფართებიც ამ შედეგის გამო უკვე სარემონტოა _ წყალი არ არის, სველი წერტილები არ მუშაობს, წყლის “ბაკები“ არ დგას და ეზოში ძრავი რისთვისაა დამონტაჟებული, ვერ გავიგეთ. ოთახებში წვიმს, ფანჯრებიდანაც წყალი შემოდის. ფართების გადანაწილებაზე რომ არაფერი ვთქვათ, რომელიც ძალიან ხშირად არასწორადაა გაკეთებული. ერთ-ერთ შენობაში შხაპი უნიტაზზეა დამონტაჟებული. ჩვენ დიდი ხანია ვითხოვთ შპს “აქსისის” ხელმძღვანელობის პასუხისმგებლობაში მიცემას უხარისხოდ ჩატარებული სამუშაოების გამო. გარდა ამისა, მათ არ გასცეს ხელფასები მშენებლობაზე დასაქმებულ დევნილებზე, თუმცა, ჯერ მათთვის პასუხი არავის მოუთხოვია, იმედი მაქვს, ახლა მაინც ყურადღებას მიაქცევენ სამინისტროში შესულ ჩვენს ათობით განცხადებას.”
იზოლდა ჭედია, დევნილი: “ჩვენ ე.წ. “სამკერვალოს“ შენობაში უკვე 20 წელია ვცხოვრობთ. არ ვიცი, აქ თუ გაძლებს ნორმალური ადამიანი, მაგრამ რა ვქნათ, სად წავიდეთ? კედლის ბლოკი პირდაპირ მიწაზე დევს, ოთახი ფანჯრებამდე წყლით ივსება, ყველგან ნესტის სუნია. რამდენჯერ ქარი ამოვარდება, იმდენჯერ გული გვისკდება _ არ ვიცით, როდის დაგვენგრევა თავზე ჭერი. არავინ ჩვენი პატრონი არაა. კარგია, რომ სახალხო დამცველის აპარატი დევნილების საკითხით დაინტერესდა და იმედია, ახლა მაინც არ გამორჩებათ აბაშა, თორემ სუბელიანის მინისტრობის დროს, მარტვილიდან სენაკში გადადიოდნენ და აბაშელები ერთხელაც არავის გახსენებია.”
მედეა გინდელია, დევნილი: “ყველგან თითქმის ერთნაირად საშინელი პირობებია. ჩვენ აბანოს შენობაში ჩასახლებული დევნილები ვართ. იმ უამრავ პრობლემებთან ერთად, სხვებს რომ აწუხებთ, ჩვენ კიდევ დამატებით ის პრობლემა გვაქვს, რომ სახურავზე ასასვლელი ლუკი არ გვაქვს _ ხანძრის დროს ან სხვა რაიმე დაზიანების დროს სახურავზე ვერსაიდან ავალთ. ბინები მაინც დაგვიკანონდეს. კარგია, რომ ომბუდსმენის ანგარიში წერია, სახელმწიფომ საკუთარი ვალდებულებები არ შეასრულაო. იმედია, ახლა მაინც მოიცლიან ჩვენთვის.”
ნაირა ბენიძე: “როგორც გავიგეთ, აგვისტოში დევნილთა რეგისტრაცია გახორციელდება. გამოუცხადებლობის შემთხვევაში კანონპროექტის ახალი რედაქციის თანახმად, ამ ადამიანებს იძულებით გადაადგილებული პირის სტატუსი შეუჩერდებათ. გარდა ამისა, სახელმწიფოს ახალი სტრატეგია დევნილთა ხელახალი რეგისტრაციის შესახებ გულისხმობს სრული მონაცემების შეკრებას, თუ რამდენი იძულებით გადაადგილებული პირი ჰყავს დღეს ქვეყანას. ეს ხელს შეუწყობს ბევრი ადგილობრივის დევნილთა ბინებიდან გაყვანას და ფართის იმ ლტოლვილებისთვის გადაცემას, რომლებიც წლებია ამას ითხოვენ. სიებში ჯერ კიდევ არიან გარდაცვლილები და ერთი და იგივე პიროვნებები სხვადასხვა ნომრით.
აბაშის დევნილთა სახელით კიდევ ერთხელ ვთხოვთ მინისტრს და სახალხო დამცველს, თბილისიდან გამოიყოს კომისია და აბაშის დევნილთა აუტანელი ყოფის პირობებში პირველად ადგილზე იქნას დათვალიერებული და შესწავლილი პრობლემები, მერე კი ერთად დავსახოთ მდგომარეობიდან გამოსასვლელი გზები.”
