ადვოკატები ამ პროცესს ფეოდალიზმის ხანას ადარებენ და აღნიშნავენ, რომ თუ მათი მოთხოვნა არ დაკმაყოფილდა და 111-ე მუხლის მე 2 პუნქტი არ შეიცვალა, ისინი აქციებს მთელი 3 წლის განმავლობაში გამართავენ, ვიდრე არსებული პარლამენტი თავის უფლებამოსილებას არ ამოწურავს.
“დღეს ადვოკატთა კორპუსმა დაიწყო უპრეცედენტო აქცია თავისი უფლებებისა და საზოგადოების უფლებების დაცვისთვის. ადვოკატები ჯერ ასეთი ერთსულოვნები არ ვყოფილვართ _ ჩვენ ერთად დავდექით ჩვენი უფლებების დასაცავად. როგორ შეიძლება ადვოკატს შუამდგომლობის დაყენება აუკრძალო სასამართლოს წინაშე? ეს არის ფეოდალიზმი, ეს არის ბოლშევიზმი და ამ ეპოქაში დაბრუნება აღარ გვინდა. ადვოკატებს უნდა გვქონდეს ინფორმაციის გამოთხოვის უფლება, როგორც პროკურორებს . 111-ე მუხლის მე 2 პუნქტის თანახმად ადვოკატს უნდა ქონდეს უფლება, მიმართოს სასამართლოს ჩხრეკვისა და ამოღების თაობაზე, ასევე პარლამენტმა დამატებად შეიტანა 120-ე მუხლში მეათე პუნქტი, ჩვენ რომ მტკიცებულება ამოვიღოთ, პროკურორმა უნდა წაიღოს და გამოიკვლიოს. ეს არის მართლა ფეოდალიზმი და ჩვენ ამას არავის ვაპატიებთ,” _ განაცხადა ადვოკატთა ასოციაციის თავმჯდომარემ ზაზა ხატიაშვილმა.
შეგახსენებთ, რომ პრეზიდენტმა აღნიშნულ კანონპროექტს _ “სისხლის სამართლის საპროცესო კოდექსში” გახორციელებულ ცვლილებებს ვეტო დაადო.
პრეზიდენტის მიერ პარლამენტისთვის მიბრუნებული შენიშვნები ორ ძირითად საკითხს: კანონპროექტის რიგი მუხლების ძალაში შესვლის ვადებსა და დაცვის მხარესთან დაკავშირებულ უფლებებს ეხება.
პრეზიდენტი პარლამენტს სთავაზობს, ჩხრეკა-ამოღების თაობაზე დაცვის მხარისთვის მინიჭებულ უფლებასთან დაკავშირებული მუხლი 2014 წლის 1 სექტემბრის ნაცვლად, ერთი წლით ადრე _ მიმდინარე წლის 1 სექტემბრიდან ამოქმედდეს.
პრეზიდენტის კიდევ ერთი შენიშვნა მტკიცებულებათა საკითხს შეეხება. კერძოდ, პარლამენტის მიერ მიღებული კანონპროექტის თანახმად, 2014 წლის 1 სექტემბრიდან უქმდება “სისხლის სამართლის საპროცესო კოდექსში” ჩადებული, დაცვის მხარის საგამონაკლისო უფლება, რომლის თანახმადაც, დაცვის მიერ ერთი ისეთი მტკიცებულების წარუდგენლობა, რომელიც განსაკუთრებით მნიშვნელოვანია დაცვის უზრუნველსაყოფად, სასამართლოში არსებით განხილვაზე ამ მტკიცებულების დაუშვებლობას არ იწვევს.
პრეზიდენტი საკუთარ მოტივირებულ შენიშვნებში აღნიშნავს, რომ მან არასამთავრობო ორგანიზაციებისა და ადვოკატთა ასოციაციის მოსაზრებები გაითვალისწინა.
