შეხვედრას ესწრებოდნენ: გიორგი აბაშიშვილი (ილიაუნი), მერაბ ჯანიაშვილი (ახალგაზრდა ფინანსიტთა და ბიზნესმენთა ასოციაცია), რომეო სარია (აირჩიე ქართული), აკაკი ჩარგეიშვილი (ქართულ-ამერიკული უნივერსიტეტი), ლევან კალანდაძე (ეკონომიკური და სოციალური სტრატეგიების ცენტრი).
ასოციაციის მხრიდან ექსპერტებს დარგში არსებული პრობლემები გააცნეს: სს “წყალი მარგებელის” გენერალურმა დირექტორმა გია გოგოლაძემ, სს “წყალი მარგებელის” კორპორატიულ საქმეთა დირექტორმა ნუკრი ხუნძაკიშვილმა, შპს “კოკა-კოლა ბოთლერს ჯორჯიას” აღმასრულებელმა მენეჯერმა ვახტანგ ლაღიძემ, შპს “კოკა-კოლა ბოთლერ ჯორჯიას” მენეჯერმა გიორგი ახალაძემ, შპს “კოკა-კოლა ბოთლერ ჯორჯიას” მენეჯერმა თამარ მჭედლიშვილმა, “იბერია რეფრეშმენტსის” (პეპსის) კომერციულმა დირექტორმა ლევან კასრაძემ, კომპანია “აქვა გეო”-ს გენერალურმა დირექტორმა დავით გიგაიამ.
ასოციაციამ ექსპერტებს გააცნო ახალი რეგულაციის შემოღების სავარაუდო ეკონომიკური ანალიზი და მოსალოდნელი ფისკალური შედეგები. გიორგი ახალაძემ წარადგინა მიმდინარე პროცესის მეცნიერული ანალიზი და ახალი რეგულაციის შემოღების შემთხვევაში, მოსალოდნელი ფისკალური შედეგები. პროგნოზი პესიმისტურია – ბიუჯეტს მხოლოდ გადასახადების სახით ყოველწლიურად 4 მილიონამდე ლარი დააკლდება, რაც უარყოფითად აისახება როგორც მთლიანი შიდა პროდუქტის შემცირების, ასევე სოციალური საკითხების მოგვარების კუთხით.
ეკონომიკის ექსპერტებმა სამუშაო ადგილებისა და დარგში დასაქმებული ადამიანების დიდი ნაწილის ანაზღაურების მნიშვნელოვან შემცირებაზე ისაუბრეს. ისინი მიიჩნევენ, რომ არააქციზური საქონლის სავალდებულო ელექტრონული მარკირების შემოღება როგორც ფისკალური, ასევე ეკონომიკური პოლიტიკის კუთხით, გაუმართლებელია, რადგან არათუ ხელს უწყობს ახალი სამუშაო ადგილების შექმნას, ბიზნესის განვითარებას და ბიუჯეტის შემოსავლების მატებას, არამედ ბარიერებს უქმნის ადგილობრივ წარმოებას და მას არაკონკურენტულ პირობებში აყენებს უცხოურ კომპანიებთან შედარებით.
დავით გიგაია ელექტრონული მარკირების უარყოფით ეფექტებზე საუბრობს და აცხადებს, რომ ელექტრონული მარკირების სისტემის შემოღებას ცალსახად უარყოფითი ეკონომიკური და ფისკალური ეფექტი ექნება. ეს ყველა შემთვევაში იმოქმედებს პროდუქციის თვიღირებულებასა და შესაბამისად ფასზე.
“ჩვენი პროდუქცია უბრალოდ გაძვირდება, როგორც ადგილობრივი მომხმარებლისთვის, ასევე გაძვირდება მისი საექსპორტო ფასიც. მსგავსი ტიპის პროდუქციისთვის კი ფასების თუნდაც უმნიშვნელო ზრდა, მაშინვე იწვევს რეალიზაციის შემცირებას. ეს ექსპორტის მაჩვენებლის შემცირებასაც გამოიწვევს და საბოლო ჯამში გამოვა ისე, რომ კომპანიებს ნაკლები შემოსავალი გვექნება და ბიუჯეტშიც ნაკლებს შევიტანთ გადასახადების სახით. ანუ, ბიუჯეტს ფული მოაკლდება და თანხები წავა მხოლოდ შვეიცარიულ ფირმაში, რომელიც ამ ყველაფერს მოემსახურება. სახელმწიფოსთვის ეს კანონი როგორც მოკლევადიან, ასევე გრძელვადიან პერსპექტივაში არ უნდა იყოს მომგებიანი.” _ განაცხადა დავით გიგაიამ
ასოციაციის წევრებმა ექსპერტებთან მომავალი თანამშრომლობის გეგმაზეც ისაუბრეს და შეხვედრის მთავარი თემის განხილვის გასაგრძელებლად მომავალი შეხვედრები დაგეგმეს.
შეგახსენებთ, რომ ფინანსთა ყოფილი მინისტრის ბრძანების თანახმად, 2013 წლის 1 იანვრიდან მატერიალური ან არამატერიალური ფორმით სავალდებულო მარკირებას უნდა დაქვემდებარებულიყო არაალკოჰოლური სასმელები (მათ შორის , მინერალური და მტკნარი წყლები). ბრძანების ამოქმედება ახალმა მინისტრმა ნოდარ ხადურმა რამდენჯერმე გადადო, თუმცა ჯერ არ გაუუქმებია.
