ლატვიელ ბიზნესმენს ბრალი სისხლის სამართლის კოდექსის 182-ე მუხლის მე-3 ნაწილით ედება, რაც დიდი ოდენობის თანხის მითვისება-გაფლანგვას გულისხმობს. თბილისის საქალაქო სასამართლომ არ დააკმაყოფილა პროკურატურის შუამდგომლობა და ბიზნესმენი დარბაზიდან გაათავისუფლა. როგორც ირკვევა, მისი დაპატიმრება ეხება არა “პოპულს”, არამედ ბიზნესმენის ადრინდელ საქმიანობას.
ამავე დროს ცნობილი ხდება, რომ სავაჭრო ქსელს სერიოზული ფინანსური პრობლემები აქვს და გაკოტრების პირასაა.
რამდენიმე დღის წინ “პოპულის” კრედიტორებმა კომპანიის გაკოტრების საქმე წამოიწყეს.
საულიუს ვაიტეკევიჩუსის დაკავებასთან დაკავშირებით პროკურატურამ განცხადება გაავრცელა, რომელშიც ნათქვამია:
“ლიტვის მოქალაქე საულიუს ვაიტკევიჩუსი, რომელიც საქართველოს სსკ-ის 182-ე მუხლის მე-3 ნაწილის “ბ” ქვეპუნქტით გათვალისწინებულ დანაშაულშია ბრალდებული მთავარი პროკურატურის წარმოებაში არსებულ სისხლის სამართლის საქმეზე, 2013 წლის 29 მაისს, საქართველოდან გამგზავრების დროს, დაკავებული იქნა ქ. თბილისის აეროპორტში.
საულიუს ვაიტკევიჩუსის ფაქტობრივი დაკავება განხორციელდა 2013 წლის 29 მაისს, 05:20 საათზე, რა დროსაც სრულად იქნა დაცული უცხო ქვეყნის მოქალაქის დაკავებისას კანონით დადგენილი უკლებლივ ყველა საპროცესო მოთხოვნა, კერძოდ:
საქართველოს სისხლის სამართლის საპროცესო კოდექსის 177-ე მუხლის თანახმად, უცხო სახელმწიფოს მოქალაქის დაკავების თაობაზე 3 საათის განმავლობაში უნდა ეცნობოს მისი ოჯახის რომელიმე წევრს ან ახლობელს, ასევე დაკავების თაობაზე უნდა ეცნობოს საგარეო საქმეთა სამინისტროს.
დაკავებისთანავე, 05:25 საათზე, ბრალდებულს მიეცა წინადადება, დაკავების შესახებ შეეტყობინებინა ოჯახის წევრის ან ახლობლისთვის. საულიუს ვაიტკევიჩუსმა გამოხატა სურვილი დაკავშირებოდა ახლობელს და დაუყოვნებლივ, საკუთარი მობილური ტელეფონით, დაუკავშირდა მისი ინტერესების დამცველ ადვოკატს ირაკლი ყანდაშვილს, რომელსაც განუცხადა მისი აეროპორტში დაკავების თაობაზე და განუმარტა, რომ გადაყვანილ იქნებოდა შსს-ს დროებითი მოთავსების №1 იზოლატორში.
საპროცესო კოდექსის თანახმად, უცხოელის დაკავების თაობაზე შეტყობინება – 29 მაისს 08:10 საათზე ელექტრონულად გაეგზავნა საგარეო საქმეთა სამინისტროს საკონსულო დეპარტამენტს.
დაკავებისას და შსს-ს დროებითი მოთავსების №1 იზოლატორში შესახლებისას, საულიუს ვაიტკევიჩუსი უზრუნველყოფილი იყო თარჯიმნის მომსახურებით.
გარდა ზემოაღნიშნულისა, საულიუს ვაიტკევიჩუსს, დროებითი დაკავების იზოლატორში მიყვანისთანავე, მიეცა შესაძლებლობა კიდევ ერთხელ გასაუბრებოდა ახლობლებს (რაც არ არის პროცესის მოთხოვნა) და ბრალდებულის სურვილის შესაბამისად, ამჯერად იგი დაკავების დეტალებზე ესაუბრა მეუღლეს”.
2013 წლის 29 აპრილს თბილისის საქალაქო სასამართლოს განცხადებით მიმართა სს “წყალი მარგებლის” და შპს “ენგადის” წარმომადგენელმა როინ მიგრიაულმა და მოითხოვა სს “პოპულის” მიმართ გადახდისუუნარობის საქმის წარმოების დაწყება.
განმცხადებლის განმარტებით, მოვალეს არ გააჩნია უნარი, გადაიხადოს ვადამოსული დავალიანებები. ასევე ირკვევა, რომ “პოპულის” მთელი ქონება დატვირთულია იპოთეკით, მას არ შეუძლია ვალების გასტუმრება , მთელი მისი ქონება დაყადაღებულია და შესაბამისად ვერ მოხდება მისი გაყიდვა. “პოპულს” არ გააჩნია იმ ოდენობის საკუთარი ქონება, რომ შეძლოს საბანკო და საკრედიტო დაწესებულებებში მათი უზრუნველყოფით ვალების გასტუმრებისათვის საკმარისი სესხების აღება. მოვალე შეყვანილია მოვალეთა რეესტრში, რაც აფერხებს მესამე პირებთან მოვალის სამართლებრივ თანამშრომლობას.
სს “პოპულის” დავალიანება შპს “ენგადის” მიმართ შეადგენს 553 371.35 ლარს, საიდანაც ძირითადი დავალიანება არის 399 311 ლარი და პირგასამტეხლო 154 060.35 ლარი.
სს “პოპულის” დავალიანება სს “წყალი მარგებლის” მიმართ შეადგენს 105 684 ლარს, საიდანაც ძირითადი დავალიანება არის 70 687 ლარი, ხოლო პირგასამტეხლო _ 34997 ლარი.
სასამართლომ . სს “წყალი მარგებლის” და შპს “ენგადის” განცხადება სს “პოპულის” მიმართ გადახდისუუნარობის საქმის წარმოების დაწყების შესახებ წარმოებაში მიიღო.
