ჯერ იყო და სოფლის მეურნეობის სამსახურის ხელმძღვანელი მანანა მინდაძე საბოტაჟზე ალაპარაკდა და საკრებულოს დეპუტატები უმოქმედობაში დაადანაშაულა, შემდეგ კი გაირკვა, რომ საკმაოდ ბევრი ადამიანი ბარათების გარეშე დარჩა.
დაზუსტებული ინფორმაციით, ჩოხატაურის მუნიციპალიტეტში ასეთი 820 ოჯახია _ როგორც გავარკვიეთ, დაბა ჩოხატაურში _ 20 ოჯახი, სოფელ ბუკისციხეში _ 17, ამაღლებაში _ 58, გოგოლესუბანში _ 14, გორაბერეჟოულში _ 11, გუთურში _ 28, დაბლაციხეში _ 8, ერკეთში _ 45, დიდივანში _ 4, ზემოსურებში _ 20, ზემოხეთში _ 52, ვაზომლეთში _ 48, ზოტში _ 4, კოხნარში _ 66, ნაბეღლავში _ 39, საჭამიასერში _ 66, ფარცხმაში _ 55, ქვენობანში _ 37, შუამაღლებაში _ 40, შუასურებში _ 1, ჯვარცხმაში _ 107, ხევში _ 15, ხიდისთავში კი 73 ოჯახი.
სოფლის მეურნეობის სამსახურში არ იციან, თუ რატომ დარჩნენ ეს ოჯახები ბარათების გარეშე.
_ რწმუნებულები იყვნენ საქმეში ჩართულნი. ვერ გეტყვით, რატომ მოხდა, რომ ოჯახები ვაუჩერების გარეშე დარჩნენ. ეს სიები ჩვენი სამსახურის შექმნამდე შედგა, _ აღნიშნა ჩვენთან საუბრისას სამსახურის უფროსმა, მანანა მინდაძემ.
_ ქალბატონო მანანა, როგორც გვითხრეს, ამ ოჯახებს ბარათები არ მიეცემათ…
_ მგონი, ვერ მიიღებენ. თავიდან იყო უზუსტობები. როცა პირველი განმარტება კეთდებოდა, რწმუნებულები მხოლოდ ზეპირი ინფორმაციით შემოიფარგლნენ. ეს სიები აზომვითი ნახაზებით არ შექმნილა. ვისაც რა უნდოდა, იმას ეუბნებოდა. მე შემეძლო მეთქვა, ჩემი მიწა არის ათასი ან ხუთასი კვადრატი. ინფორმაციის ასე მიწოდებამ განაპირობა ეს ყველაფერი.
_ სიტყვაზე ენდნენ მოსახლეობას?
_ ჰო, რადგან გამოკითხვის მეთოდით შეიქმნა სიები. გარდა ამისა, რამდენიმე სოფელში შეიცვალა რწმუნებული და შესაძლებელია, სიები გაიბნა კიდეც, _ გვითხრა მინდაძემ.
როგორც გავარკვიეთ ჩოხატაურში სულ 9 641 ნომინალური და 5 133 კომბინირებული ბარათი დარიგდა.
ის, რომ ბარათებთან დაკავშირებით პრობლემები იყო და სიტუაცია შესწავლას საჭიროებდა, “გურია ნიუსმა” საკმაოდ დიდი ხნის წინ გაახმოვანა. უფრო მეტიც, ამის შესახებ პრემირ-მინისტრსაც ვესაუბრეთ.
“მე დიდ ყურადღებას ვუთმობ ამ პროცესს, თუმცა, ყველა წვრილმანს ვერ გავაკონტროლებ პირადად. გამოძიების დაწყების შესახებ რამდენიმე თვეა საქმის კურსში ვარ… ამან გარკვეულწილად ხელი შემიშალა. მიჭირდა თათბირების მოწყობა მათთან. პროცესების ორგანიზება შეიძლებოდა უკეთესად. ჯერ კიდევ არ მინდა წინასწარ დასკვნები გავაკეთო, ბევრი კითხვები მაქვს მე თვითონ. საერთო ჯამში ვაკონტროლებ სიტუაციას.
ეს პროცესი, რამდენადაც სწრაფად ხორციელდებოდა, არ შეიძლებოდა ყოფილიყო იდეალურად ორგანიზებული, თუმცა, შეიძლებოდა უკეთესიც. მეც მაქვს გარკვეულწილად შენიშვნები, მაგრამ ახლა იცით რაც ხდება სამინისტროში და არ მინდა დასკვნები წინასწარ გავაკეთო, არც ზედმეტად წავახალისო ვინმე და არც ზედმეტად გავაკრიტიკო, რამეთუ ძალიან რთული პროცესია ახლა გამოძიება მიდის,” _ ამბობდა ერთი თვის წინ ჩვენთან საუბრისას ბიძინა ივანიშვილი.
ჯერჯერობით, უცნობია, რა დასკვნები გამოიტანა ბიძინა ივანიშვილმა. ცნობილია ის, რომ ბარათების გარეშე დარჩენილი მოსახლეობა, არმიღების შემთხვევაში, პროტესტის აქციებით გამოხატვას აპირებს.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, არგლებში და მასში გამოთქმული მოსაზრება არ გამოხატავს ფონდის პოზიციას.
