გუშინ, ლანჩხუთის მუნიციპალიტეტის ადმინისტრაციული შენობის სხდომათა დარბაზში ფილმის _ “ცხელი არჩევნები” პრეზენტაცია გაიმართა. აღნიშნული ფილმი ლანჩხუთში ჟურნალისტმა ია ანთაძემ ჩაიტანა, რადგან “ცხელი არჩევნები” “სამოქალაქო განვითარების ინსტიტუტის” მუშაობის ერთგვარი ანგარიში გახლდათ. ფილმის ჩვენებას საზოგადოების სხვადასხვა სფეროს, ხელისუფლების და მედიის წარმომადგენლები ესწრებოდნენ.
ამ შეხვედრას არ ესწრებოდა “ნაციონალური მოძრაობის” ლანჩხუთის ორგანიზაციის ხელმძღვანელი, კახა ასკურავა. თუმცა, როგორც თავად ამბობს, მიღებული ინფორმაციები დასკვნის საფუძველს ნამდვილად იძლევა. ასკურავა მიიჩნევს, რომ ეს წინასაარჩევნო შეხვედრა იყო, რომელიც წინა ხელისუფლების დისკრედიტაციას ისახავდა მიზნად:
_ კარგი იქნებოდა, ქალბატონ იას შეხვედრაზე განსხვავებული აზრის მქონე ადამიანებიც მიეწვია, თუმცა, ასე არ მოიქცა. ანთაძემ შეხვედრის დასრულების შემდეგ აღნიშნა, რომ “წინა ხელისუფლება იყენებდა ბევრ ბერკეტს: ძალადობა, მოფერება, მაგრამ ერთობლიობაში ეს იყო შემზარავი. საბედნიეროდ, ახალ ხელისუფლებას ამდენი ბერკეტი ჟურნალისტების წინააღმდეგ არ გამოუყენებია. დღეს, მე მგონი, ერთ-ერთი ყველაზე კარგი პერიოდი გვიდგას.
თუ გავითვალისწინებთ, რომ ეს შეხვედრა გაიმართა ადმინისტრაციულ შენობაში, რომელსაც ესწრებოდნენ საზოგადოების და ადგილობრივი ხელისუფლების წარმომადგენლები და ნაჩვენები იქნა ფილმი, რომელიც პროპაგანდისტულია და შეიცავს ყოფილი ხელისუფლების დისკრედიტაციას (ამ შემთხვევაში, ნაჩვენები სიმართლეა თუ არა, მნიშვნელობა არ აქვს) ხოლო ფილმის ჩვენების შემდეგ გაკეთებული კომენტარები, რომლებიც აქტიურად გაშუქდა ადგილობრივ პრესაში, ნათელი დასტურია იმისა, რომ ანთაძე წინასაარჩევნო კამპანიაშია ჩართული. როცა ქვეყანაში მიმდინარეობს წინასაარჩევნო კამპანია ოფიციალურად, არის თუ არა ეს კონკრეტული პოლიტიკური ჯგუფის მხარდაჭერა ასევე მეორე პოლიტიკური ჯგუფის ლანძღვისა და დისკრედიტაციის ხარჯზე?! _ ამბობს ასკურავა, რომლის მტკიცებით, ანთაძემ საარჩევნო კოდექსი დაარღვია. ასკურავა იმ არასამთავრობო ორგანიზაციებს, რომლებმაც გასულ კვირას იმავე დარბაზში წინასაარჩევნო კამპანიის მედიაგაშუქების როლის შესახებ შეხვედრა მოაწყვეს, ამ ფაქტის შეფასებას სთხოვს.
ია ანთაძე ჩვენთან საუბრისას აღნიშნავს, რომ ფილმის ჩვენებას არანაირი პოლიტიკური დატვირთვა არ ჰქონია:
_ წინასაარჩევნო კამპანიასთან მე რა შუაში ვარ?! მე რომელი პოლიტიკური პარტიის წევრი ვარ?! ეს ფილმი მომზადდა პროექტის ფარგლებში, რომელსაც სამოქალაქო განვითარების ინსტიტუტი ახორციელებდა. პროექტი ორი წლის განმავლობაში მიმდინარეობდა და მასში ძალიან ბევრი ადამიანი იყო ჩართული. ჩვენ, მოქალაქე ჟურნალისტების დახმარებით შევქმენით ჩვენი საარჩევნო ბაზა. პროექტში გათვალისწინებული იყო, რომ ამის შესახებ ფილმიც გადაგვეღო. გამოვაცხადეთ კონკურსი, გაიმარჯვა ორმა ადამიანმა და შეიქმნა კიდეც. ეს ფილმი, რომელიც ლანჩხუთში ვაჩვენეთ, არჩევნების დღეს ასახავს. მინდა გითხრათ, რომ პროექტის მიმდინარეობისას, ჩვენ სხვა შეხვედრაც ადმინისტრაციულ შენობაში გავმართეთ და მიკვირს, რატომ არ ახსოვს ეს ბატონ ასკურავას. როგორ ვიცი, ლანჩხუთში სხვა შენობა, სადაც შესაძლებელია მსგავსი შეხვედრა გაიმართოს, არ არსებობს. წინა ხელისუფლებამაც და ახალმაც, შეხვედრისთვის პატიოსნად დაგვითმო დარბაზი. ეს იყო ერთგვარი ანგარიში იმ ადამიანებისთვის, რომლებიც ჩვენს პროექტში მონაწილეობდნენ. რაც შეეხება კომენტარს, მე ის ჟურნალისტს მივეცი, ის ჩემს აზრს გამოხატავს და ამის კანონიერი უფლება მე მაქვს, _ გვითხრა ანთაძემ.
საქართველოს დემოკრატიული განვითარების კავშირის ხელმძღვანელი, ლევან ხინთიბიძე ამბობს, რომ საარჩევნო კოდექსი “ვარაუდით” არ ირღვევა:
_ ზოგადად კანონი და, მათ შორის, საარჩევნო კოდექსი, ვარაუდით არ ირღვევა _ ყველა კანონს აქვს თავისი კონკრეტული მუხლი, რომელიც შეეფარდება ფაქტობრივი გარემოებებით დადასტურებულ კონკრეტულ ქმედებას და კანონისმიერი გადაცდომა სწორედ ასე იზომება.
სამოქალაქო განვითარების ინსტიტუტის მიერ, ქ. ლანჩხუთში ნაჩვენები ფილმი “ცხელი არჩევნები”, იგი შეიქმნა ერთი დამოუკიდებელი საზოგადოებრივი ორგანიზაციის მიერ, ერთი კონკრეტული პროექტის გარშემო და შეეხება დოკუმენტურ ფაქტებზე დაფუძნებულ საარჩევნო პერიპეტიებს და იმ გამოცდილების გაზიარებას, რომელიც გათვალისწინებული უნდა იყოს სამომავლოდ, უფრო კარგი, უფრო კონკურენტუნარიანი არჩევნების ორგანიზებისთვის. ანუ ეს არ გახლავთ სააგიტაციო მასალა და იგი არ ისახავს მიზნად აგიტაცია-პროპაგანდას. ბუნებრივია, იმავდროულად, ეს არ გახლავთ “ამომრჩევლის მოსყიდვა” და არც არავინ იყენებს არამართლზომიერად ადმინისტრაციულ რესურსებს (მაგალითად, ადმინისტრაციულ შენობას). ამ მოქმედებაში არ იკვეთება საბიუჯეტო თანხების გამოყენება და მასში არ არის ჩართული არც ერთი საჯარო თანამდებობის პირი. ფილმის ჩვენების ამოცანა არ გახლავთ წინასაარჩევნო კამპანიაში ჩართვა და მასზე არ ვრცელდება საინფორმაციო უზრუნველყოფის რეგულაციები, რაც დადგენილია საქართველოს საარჩევნო კოდექსით. თავის მხრივ, ფილმის ჩვენება ფარულად არ გახორციელებულა და არც რაიმე კრიმინალთან აქვს მას კავშირი. აქედან გამომდინარე, გაუგებარია, რა ტიპის დარღვევებზე შეიძლება იყოს საუბარი აღნიშნული ფაქტის გარშემო, _ აღნიშნა ჩვენთან საუბრისას ხინთიბიძემ.
