“ტრაქტორების საქმეში” გამოძიებას პოზიციის კორექტირება მოუწევს”

იურისტის განმარტებით, რეალურად, აქ დახარჯულია ფონდის “ქართუ“ და სოფლისა და სოფლის მეურნეობის განვითარების საერთაშორისო საქველმოქმედო ფონდის სახსრები. შესაბამისად, სახელმწიფო სახრსების გაფლანგვაზე საუბარი არასწორია – ამ საქმეში დაზარალებული სახელმწიფო არ არის.

_ დაზარალებული შეიძლება იყოს მხოლოდ დამფინანსებელი – ფონდი „ქართუ” ან სოფლისა და სოფლის მეურნეობის განვითარების საერთაშორისო საქველმოქმედო ფონდი, _ ამბობს ალაფიშვილი.

მისივე თქმით, საქართველოს სახელმწიფო ბიუჯეტში, პროგრამული კოდის “3700” ქვეშ, არ არის გათვალისწინებული პროგრამები “მცირემიწიან ფერმერთა მხარდაჭერის პროგრამა” და “შეღავათიანი აგროკრედიტის პროგრამა” (http://www.mof.ge/5109). სოფლის მეურნეობის ოფიციალური საიტიდან, მინისტრის მოადგილის ინტერვიუდან (“ამბიონი”-სათვის მიცემული ინტერვიუ) და სოფლის მეურნეობის მინისტრის ინტერვიუდან დასტურდება, რომ ეს პროგრამები არც ფინანსდება და არც იმართება სახელმწიფოს მიერ სახელმწიფო ბიუჯეტიდან. ეს პროგრამები ფინანსდება კერძო ფინანსებით (სოფლისა და სოფლის მეურნეობის განვითარების საერთაშორისო საქველმოქმედო ფონდი და ფონდი “ქართუ”) და იმართება არასახელმწიფო სტრუქტურების მიერ: სოფლის მეურნეობის პროგრამების სააგენტო და შპს “მექანიზატორი”.

_ აღნიშნულის გათვალისწინებით, გამოძიებას მოუწევს პოზიციის კორექტირება, რადგან ამ შემთხვევაში, სახეზე არ არის სახელმწიფო სახსრების გაფლანგვა. თუმცა, ეს ყველაფერი სულაც არ ნიშნავს, რომ ვინმეს კანონშეუსაბამო ქმედება არ ჩაუდენია ან გამოძიების ხარვეზი ამართლებს მას, _ განმარტავს ალაფიშვილი.