თუ დევნილები რეგისტრაციას არ გაივლიან, მათ შეუჩერდებათ, როგორც დევნილის სტატუსი, ისე ფინანსური შემწეობა.
საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრ დავით დარახველიძის განცხადებით, დევნილთა ხელახალი რეგისტრაცია უზრუნველყოფს მათ შესახებ ინფორმაციის განახლებას და მონაცემთა ბაზის მაქსიმალურ სრულყოფას. მისივე თქმით, ამ მონაცემებს დევნილი ოჯახების და ინდივიდუალურ პირთა განსასაზღვრად გამოიყენებენ, რათა მოხდეს სპეციფიკური საჭიროებების განხილვა და მათთვის გრძელვადიანი გადაწყვეტილებების იდენტიფიცირება.
სამინისტროს ცნობით, დევნილთა რეგისტრაციის პროცესს მთელი ქვეყნის მასშტაბით განახორციელებს 12 სარეგისტრაციო კომისია _ 8 დიდი (10 წევრის შემადგენლობით) და 4 მცირე (5 წევრის შემადგენლობით) კომისია.
ზუგდიდში ხელახალი რეგისტრაციისთვის ხუთი შესაბამისი პუნქტი ამოქმედდება, მათგან ოთხი 1 აგვისტოდან 14 სექტემბრამდე იფუნქციონირებს, ერთი კი 27 დეკემბრამდე, რეგისტრაციის დასრულებამდე დარჩება.
სამეგრელო-ზემო სვანეთის ტერიტორიული ორგანოს ხელმძღვანელის ირაკლი ქოჩუა კიდევ ერთხელ ახსენებს დევნილებს, რომ სარეგისტრაციო პუნქტები განთავსდება ზუგდიდის მუნიციპალიტეტის გამგეობის შენობაში, საკრებულოში, ზუგდიდის დამოუკიდებელი უნივერსიტეტის შენობაში და კომბინატში. ყველა იძულებით გადაადგილებული პირი პირადად უნდა გამოცხადდეს, ვინც 6 წელზე მეტი ასაკისაა, თუმცა ბავშვების მოსვლა ამ პუნქტებში არ არის სავალდებულო. დევნილებმა შესაბამისი მოწმობა და პირადობა უნდა წარმოადგინონ, არასრულწლოვანმა კი დაბადების მოწმობა.
დევნილების თხოვნა იყო, რომ შესაბამისი პუნქტები ამოქმედებულიყო სოფლებშიც, თუმცა ეს ტექნიკურად ვერ მოხერხდა.
დევნილთა უმეტესობამ უკმაყოფილება გამოთქვა ხელახალ რეგისტრაციასთან დაკავშირებით, როგორც ისინი ამბობენ, სულ ახლახანს აიღეს ახალი პირადობის მოწმობები და გაუგებარია, რა საჭიროებამ განაპირობა კიდევ ახალი რეგისტრაცია? _ კითხულობენ დევნილები. სწორედ ამიტომ კიდევ ერთხელ შევახსენებთ მათ მინისტრის განმარტებას.
დავით დარახველიძემ განაცხადა, რომ დევნილთა ხელახალი რეგისტრაცია უზრუნველყოფს მათ შესახებ ინფორმაციის განახლებას და მონაცემთა ბაზის მაქსმიმალურ სრულყოფას. მისივე თქმით, ამ მონაცემებს დევნილი ოჯახების და ინდივიდუალურ პირთა განსასაზღვრად გამოიყენებენ, რათა მოხდეს სპეციფიკური საჭიროებების განხილვა და მათთვის გრძელვადიანი გადაწყვეტილებების იდენტიფიცირება. გარდა ამისა, მინისტრის თქმით სამინისტრო რეგისტრაციის შემდეგ ელოდება დევნილთა რიცხვის შემცირებას, რადგან დაფიქსირებულია დევნილის მოწმობების გაყალბების ფაქტები, როდესაც ერთი და იგივე იძულებით გადაადგილებულ პირს რამდენიმე მოწმობა აქვს.
აღსანიშნავია, რომ მოქალაქეების იმ კატეგორიას რაც შეეხება, ვინც საზღვარგარეთ იმყოფება და 27 დეკემბრამდე საქართველოში ჩამოსვლას და რეგისტრაციის გავლას ვერ მოასწრებს, მათ დევნილის სტატუსი შეუჩერდებათ.
ხელახალ რეგისტრაციასთან დაკავშირებით სამინისტროში მოქმედებს ცხელი ხაზი, რომლის საშუალებითაც დევნილებს ამ საკითხებზე სათანადო ინფორმაციას მიაწვდიან.
