ერთი მედლის ორი მხარე

სახლში, რომელიც ერთ ოთახს და მცირე, ავარიულ ავეჯს შეადგენს, ორი ადამიანი ცხოვრობს _ ბატონო დავითი და მისი მეუღლე, რომელიც ხშირად ავადმყოფობს.

როგორც ოჯახის უფროსმა გვითხრა, რამდენიმე წელია, რაც მეუღლესთან ერთად, ცალკე გადმოვიდა საცხოვრებლად: _ ხუთი შვილი გავზარდე _ სამი გოგო და ორი ვაჟი. გოგოები გათხოვდნენ და თავიანთი ოჯახები აქვს. ვაჟებიც დაცოლშვილდნენ. რამდენიმე წელი ბიჭთან ვცხოვრობდი, მაგრამ მერე ცალკე გადავედით საცხოვრებლად. მართალია, ჩვენი სახლები ერთ ეზოში დგას, მაგრამ ცალ-ცალკე ვცხოვრობთ და ამას ყველა დაგიდასტურებთ, _ გვითხრა დავით კვირიკაძემ.

მათი შემოსავალი მხოლოდ პენსიაა, რომელიც წამლებში ძლივს ყოფნით. ოჯახი სოციალურ დახმარებას 4 წლის განმავლობაში იღებდა. როგორც გავარკვიეთ, კვირიკაძეების ოჯახი სოციალური მომსახურების სააგენტოს დირექტორის 04-49/ო (13.02.2013) ბრძანების შესაბამისად შემოწმდა, რაც შემწეობის მიმღების ოჯახების გადამოწმებას ისახავდა მიზნად.

სოციალური მომსახურების სააგენტოს ჩოხატაურის რაიონული განყოფილების უფროსის, ზურაბ კალანდაძის ინფორმაციით, კვირიკაძეების ოჯახის მიერ სოციალური აგენტისადმი მიწოდებული ინფორმაცია არ ასახავდა რეალურ მდგომარეობას, რის გამოც ამ ოჯახის გადამოწმება მოხდა უფროსი სოციალური აგენტის მიერ და შევსებული იქნა ოქმი ოჯახის სოციალურ-ეკონომიკური მდგომარეობის შეფასების შესახებ.

_ ბატონი დავითი და მისი მეუღლე ცალკე არ ცხოვრობენ. როცა აგენტი მივიდა და შეამოწმა, ამაში თავიდანვე შეეპარა ეჭვი. ამტკიცებენ, რომ ერთ საწოლზე სძინავთ ცოლ-ქმარს, მაგრამ ასე არ არის. საკმაოდ შეძლებული ოჯახია. მიკროვატობუსი ჰყავთ და სახერხიც აქვთ. შვილებთან ერთად ცხოვრობენ. თავად ამბობს, რომ შვილთან ნაჩხუბარია, მაგრამ იმ სახლში თუ მიხვალთ, დარწმუნდებით, რომ ასე არ არის, _ აღნიშნა ჩვენთან საუბრისას კალანდაძემ.

_ ბატონო ზურაბ, ჩვენ ვიყავით კვირიკაძეებთან. მართალია, მათი სახლები ერთ ეზოში დგას, მაგრამ როგორც ამბობენ, ცალ-ცალკე ცხოვრობენ…. გარდა ამისა, სამოქალაქო რეესტრის ბაზაში, ბატონ დავითის მტკიცებით, ოჯახში მხოლოდ მეუღლე ჰყავს ჩაწერილი… თქვენც ხომ გაქვთ იგივე ბაზაზე წვდომა და ხომ შეგიძლიათ გადამოწმება?

_ აუცილებლად გადავამოწმებ მაგ ინფორმაციას და მეზობლებსაც ვკითხავ კიდევ ერთხელ, მაგრამ როგორც ვიცი, დავით კვირიკაძე შვილთან ერთად ცხოვრობს და ამას სოფლის რწმუნებულიც ადასტურებს, _ გვითხრა კალანდაძემ.

მოგვიანებით კალანდაძე დაგვიკავშირდა და გვითხრა, რომ სამოქალაქო რეესტრის ბაზაში, დავით კვირიკაძე, როგორც ცალკე მცხოვრები არ ფიქსირდება. თუმცა, როგორც გავარკვიეთ, ბატონმა დავითმა და მისმა ვაჟმა სოფლის მეურნეობის სამინისტროს მიერ დარიგებული ბარათები ცალ-ცალკე მიიღეს.

სოფელ ქვენობნის რწმუნებული, დავით კვაჭანტირაძე ამბობს, რომ ზურაბ კალანდაძესთან ამ თემაზე საუბარი არ ჰქონია, თუმცა, აღნიშნავს, რომ კვირიკაძეების ოჯახი საკმაოდ შეძლებულად ცხოვრობს. კვაჭანტირაძის თანაშემწის, რომან კალანდაძის განმარტებით, ოჯახს ორი მანქანა ჰყავს, აუზიც აქვთ და სოციალურ დახმარებას ნამდვილად არ საჭიროებენ: _ ხელოვნურად გაყოფილი ოჯახია. მართალია, ამბობენ, რომ ცალ-ცალკე ცხოვრობენ, მაგრამ ასე არ არის. ამდენ ხანს, სწორედ მაგის გამო იღებდნენ სოციალურ დახმარებას, თუმცა, არ უჭირთ და შემიძლია დაზუსტებით გითხრათ, რომ დავით კვირიკაძე შვილთან ერთად ცხოვრობს, _ გვითხრა კალანდაძემ.

როგორც სოციალური მომსახურების სააგენტოში განმარტავენ, ასეთი შემთხვევები იშვიათი არაა. აგენტების თქმით, გადამოწმებისას გაირკვა, რომ მხოლოდ ჩოხატაურში, დაახლოებით 30 ოჯახი თანხის მიღების მიზნით ხელოვნურად იყო გაფორმებული ცალ-ცალკე კომლად.

სტატიები მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.