ეკონომიკის, ინფრასტრუქტურისა და საინვესტიციო გარემოს განვითარების სამსახურის უფროსის მ. შემსრულებელმა თემურ გიორგაძემ, ა.(ა)ი.პ. კეთილმოწყობისა და არქიტექტურული დაგეგმარების ცენტრის სპეციალისტმა მალხაზ გორგოშიძემ, ქ. ოზურგეთის ტერიტორიული ორგანოს რწმუნებულმა ლევან მგელაძემ, შევადგინეთ ეს სადეფექტო აქტი, მასზედ, რომ ოზურგეთში, გურამიშვილის #6 მდებარე საცხოვრებელი სახლის სახურავის შეკეთებისთვის საჭიროა შემდეგი სახისა და რაოდენობის სამუშაოები: წყალსადინარი პლასტმასის ღარის მოწყობა _ 12 ცალი, წყალსადინარი ღარის სამაგრის მოწყობა _ 24 ცალი, ლურსმანი სხვადასხვა, და 100 მმ მილს ფასონური ნაწილები _ 6 ცალი, გოფრირებული თუნუქით სახურავის მოწყობა _ 9 ცალი, ლურსმანი ხრახნიანი (თუნუქით სახურავის გადასაჭედად}, სახურავის არსებული გადახურვის გამაგრება _ 500,0 სილიკონ 7,0 წყალსადინარი პლასტმასის ღარის მოწყობა _ 12 ცალი. აქტის სიზუსტეს ადასტურებენ _ გ. ღურჯუმელიძე, თ. გიორგაძე, მ. გორგოშიძე და ლ. მგელაძე.”
ხარჯთაღრიცხვის მიხედვით ოზურგეთში, გურამიშვილის #6-ში მდებარე საცხოვრებელი სახლის სახურავის შეკეთების ღირებულების ჯამმა შეადგინა 502, 59 ლარი, ხოლო აქტის თანახმად, ობიექტი _ ოზურგეთში, გურამიშვილის ქ. #6-ში მდებარე საცხოვრებელი სახლის სახურავის შეკეთების შესრულებული სამუშაოს ღირებულება, ოფიციალური დოკუმენტების თანახმად, 400 ლარს შეადგენს.
ჩვენს მიერ გამგეობიდან გამოთხოვილი ოფიციალური დოკუმენტების თანახმად, ქალაქ ოზურგეთის მუნიციპალიტეტში 2013 წლის 23 მარტს, ძლიერი ქარის შედეგად, სულ დაზიანდა 340 საცხოვრებელი სახლი, ქალაქში _ 92. ოფიციალური საბუთების თანახმად, ქალაქში 92 დაზიანებული საცხოვრებელი სახლის ნაცვლად, სულ გადახურულია 17 საცხოვრებელი სახლი, თუმცა, ჩვენ მხოლოდ 10 საცხოვრებელ სახლზე მოგვაწოდეს შესაბამისი ხარჯთაღრიცხვაც და სადეფექტო აქტებიც. სოფლებში კი დაზიანებული 248 საცხოვრებელი სახლის ნაცვლად, რეაბილიტირებულია 47 სახლი.
ჩვენ შევეცადეთ, პირველ ეტაპზე ქალაქიდან დაგვეწყო, გადაგვემოწმებინა ეს ინფორმაცია და რეალურად გვენახა, არიან თუ არა დაკმაყოფილებულები ის ოჯახები, რომლებიც სტიქიით დაზარალებულთა სიაში მოხვდნენ. ვისი სახლები გადაიხურა და ვინ ვერ მოხვდა დასახმარებელთ სიაში, რა კრიტერიუმებით შეირჩა ის ოჯახები, რომლებსაც გამგეობამ დახმარება გაუწია, ან ვერ გაუწია.
ჩვენ მივედით ოზურგეთში, დანჩენკოს ქუჩის #3-ში, სადაც გიორგი მამალაძის საცხოვრებელი სახლის ეზოში გამგეობის მიერ მიტანილი იყო მასალა, თუმცა, სახლის გადახურვა ჯერ არ დაუწყიათ. აღმოჩნდა, რომ აღნიშნული ოჯახი ოზურგეთის მუნიციპალიტეტის გამგებლის მოადგილის ირაკლი სირაძის მეუღლის ოჯახია. “გურია ნიუსს” ჰქონდა ინფორმაცია, ამის შესახებ, თუმცა ოჯახის უფროსს არ დაუმალავს იგი.
გიორგი მამალაძე: _ 24 მარტს განცხადებით მივმართე გამგეობას, სტიქია იყო 23 მარტს. რა ვიცი, რა გითხრათ, ჩემი ინფორმაციით ხურავენ. დაგიხურავთო, მეუბნებიან და ველოდები. თქვენ თვითონაც შეგიძლიათ ნახოთ – მოტანილია ყველაფერი, რაც საჭიროა. ჩვენ არ ვართ იმ კატეგორიის ხალხი, რომ მივიდეთ გამგეობაში და დავიწყოთ ტირილი, არიქა, გადამიხურეთ სახლიო. ვინც საჩივრით შედის, ალბათ, იმას უფრო აქცევენ ყურადღებას და იცილებენ მასეთ ხალხს. მაგას ჩვენ ვერ გავაკეთებთ. რა ვქნათ, ველოდები. მეტი რა გზა მაქვს _ ალბათ. ჩემი დროც დადგება. თქვენ რატომ დაგაინტერესათ ისე ამ ამბავმა? მე კი არ ვჩივი, ისე არ მინდა გამომივიდეს, თან ჩემი სიძე გამგებლის მოადგილეა. ეგ უფრო მიშლის ხელს და თავს ვიკავებ. ერიდება მასაც გამგებლისთვის მოთხოვნა. ამის გამო ვერც მე მივდივარ კოტესთან, _ გვითხრა მამალაძემ.
ოზურგეთში, გურამიშვილის #6-ში მცხოვრებლები ციცინო ონიანი და მარინა ანტონიანი აღნიშნავენ, რომ დაზარალებულები არიან და ძალიან მძიმე მდგომარეობაში იმყოფებიან. მათი განცხადებით სახლში წყალი ჩამოდის. მიმართეს გამგეობას დახმარებისთვის, იყვნენ მოსულები, დაპირდნენ, რომ გააკეთებდნენ, მაგრამ, როგორც თავად აცხადებენ, არაფერი არ ჩანს.
_ ჩვენ გვაქვს საბუთი, სადაც გარკვევით წერია, რომ ამ ბინების სახურავი შეკეთდა. ასეთი რამ არ ყოფილა?
_ არ ვადასტურებთ ამ ინფორმაციას. ასეთი რამ ნამდვილად არ ყოფილა. საერთოდ არ გაუკეთებიათ, რომ გაწვიმდება რა უნდა ვქნათ, არ ვიცით. ფაქტი ხომ სახეზეა?! თქვენც ხომ ხედავთ თქვენი თვალით? ნახეთ გადაიღეთ, როგორ წვიმს ოთახებში. ასეთი ტყუილი შეძლება? როგორ გვატყუებენ ამ გაჭირვებულ ხალხს? _ განაცხადეს აღნიშნული ბინების მცხოვრებლებმა.
ქალაქის ტერიტორიული ორგანოს რწმუნებულის მოვალეობის შემსრულებელი ლევან მგელაძე “გურია ნიუსთან” ამბობს, რომ გურამიშვილის #6 საცხოვრებელი სახლის სახურავი ნამდვილად შეკეთდა.
_ ბატონო ლევან, წავიდეთ ერთად და ვნახოთ, რა მდგომარეობაა იმ სახლში.
_ გადახურული კი არა, შეკეთებული უნდა იყოს. მე გეტყვით, რა სიტუაციაა _ პირველად მე ვადგენ აქტს და ჩემ მიერ გაკეთებული აქტის საფუძველზე სრულდება სამუშაოები. ეს არის ფორმა ორი. პროექტით, რომლებსაც სპეციალური სამსახური ამზადებს, ამ სამუშაოების შესრულებაზე დახარჯულია 400 ლარი. საბუთებში გაშიფრულია როგორ შესრულდა სამუშაოები და რა თანხაა დახარჯული.
_ და თუ მოსახლეობა აცხადებს, რომ არ შეკეთებულა სახურავი და ისევ ისეთი მდგომარეობაა, როგორც ადრე იყო?
_ ეს გამოძიების საქმეა და თუ არ გაკეთებულა, სასამართლოს უნდა მიმართონ. მე ვადასტურებ, რომ ეს სამუშაოები ნამდვილად შესრულებულია.
_ ბატონო ლევან, კიდევ ერთხელ გთხოვთ წავიდეთ ერთად და შევამოწმოთ შესრულებული სამუსაოები.
_ ნამდვილად ვერ წამოვალ დროის უქონლობის გამო, ახლა მეორე სტიქიის შედეგებზე ვმუშაობთ, _ გვითხრა ლევან მგელაძემ.
საქართველოს დემოკრატიული განვითარების კავშირის აღმასრულებელი დირექტორი ლევან ხინთიბიძე აღნიშნულ თემასთან დაკავშირებით ასეთ კომენტარს აკეთებს:
_ ოზურგეთში, სტიქიით დაზარალებული მოსახლეობისთვის ბიუჯეტიდან დახმარებების გაწევის თემა უფრო მეტ გამჭვირვალობასა და მეტ ანგარიშვალდებულებას მოითხოვს ადგილობრივი ხელისუფლების მხრიდან. მაგალითად, თუ ოფიციალური მონაცემებით ირკვევა, რომ ქალაქ ოზურგეთში 17 საცხოვრებელი სახლის სახურავია რეაბილიტირებული, რატომ არის მხოლოდ 10 შემთხვევაზე დოკუმენტები ხელმისაწვდომი? აღნიშნული საკითხი ასევე მთავარი განსჯის საგანი უნდა იყოს ოზურგეთის საკრებულოში, რომელმაც გამგეობის მხრიდან მიმდინარე წლის აგვისტოს ბოლომდე ბიუჯეტის 6 თვის შესრულების ანგარიში უნდა ჩაიბაროს.
რაც შეეხება გურამიშვილის ქუჩაზე მომხდარ ფაქტს, ფრიად საყურადღებო და გასათვალისწინებელი საკითხია, რადგან იგი სისხლის სამართლის დანაშაულის ნიშნებს ატარებს და მისი დადასტურების შემთხვევაში, შესაძლებელია დადგეს ცალკეული თანამდებობის პირების პასუხისმგებლობის საკითხი, მაგრამ მანამდე შესაბამისი კომპეტენტური დასკვნა უნდა დაიდოს პროკურატურის მიერ, _ აღნიშნავს ხინთიბიძე.
