_ ითქვა, რომ თხილის ფასს ოზურგეთში ბიზნესმენი ბეგი სიორიძე და მისი გუნდი არეგულირებს, რომლებიც გზას უკეტავენ ინვესტორებს და ხელოვნურად დაბლა წევენ თხილის ფასს.
ამ განცხადებას მწვავე რეაქცია მოჰყვა თავად ბიზნესმენის ბეგი სიორიძისგან, რომელმაც ჟურნალისტებს ამ თემებით დაინტერესება და სიტუაციაში გარკვევა მოგვთხოვა: _ რატომ არ ინტერესდებით ჟურნალისტები ქალაქის ცენტრი რომ სანაგვეს ჰგავს? ყველა ხის ძირში დგას სასწორი, ტომარა და სტიქიურად, ისე, რომ არანაირი აღრიცხვა და უბრალოდ ჩანაწერიც არ არსებობს, ხდება თხილის მიღება. ეს არ არის თქვენი ინტერესის სფერო?
ვინ არის ეგ “პატრიოტთა ალიანსი”?! 200 ადამიანი მყავს დასაქმებული საწარმოში, ჩემზე მაგარი პატრიოტები არიან?
გურიაში დაახლოებით 15 000 ტონა თხილი მოდის. შარშან ჩვენმა საწარმომ მიიღო სულ 500 ტონა თხილი, 14 500 ტონა თხილი სად წავიდა? ეს არის, სულ მცირე, 2 ლარზე ნაანგარიშები, 29 მილიონი ლარი, სად წავიდა ამ ღირებულების თხილი? რატომ არ დაინტერესდით, აქედან ბიუჯეტში რა თანხა შევიდა და თუ გადაიხადა, რომელიმე საწყობმა, რომელიმე ხის ძირში მდგომმა ადამიანმა ბიუჯეტში ერთი თეთრი? 200 ადამიანს ვაძლევ პურის ფულს, მაქსიმუმ ერთ კვირაში უკვე დავიწყებთ თხილის გადამუშავებას და იმის მაგივრად. რომ ჟურნალისტებმა მოხვიდეთ და გვკითხოთ რაიმე ხომ არ გვჭირდება, რაიმე ხელს ხომ არ გვიშლის, პირიქით აკეთებთ?
_ დაგვიკონკრეტეთ, ბატონო ბეგი _ ჩვენ გიშლით მუშაობაში ხელს?
_ ჯერ თქვენ მიპასუხეთ კითხვებზე. არ გაინტერესებთ რა ხდება თხილის ბიზნესის გარშემო? თხილის ჯიშები იცით? გულშიშველა, ბერძნულა, სურები. გულშიშველა ბერძნულასთან შედარებით ღირს სადღაც 40-50 თეთრით ნაკლები. ეს გადამყიდველი ქალბატონები, რომლებიც ყველა ხის ძირში ზიან, ურევენ გულშიშველას ბერძნულაში და ატყუებენ მყიდველს. ეს არის კანონის დარღვევა, რომელიც დასჯადია.
_ თუ თქვენ მიგაჩნიათ, რომ ვიღაცა კანონს არღვევს და ეს არის კანონსაწინააღმდეგო, შეგიძლიათ მიმართოთ შესაბამის უწყებებს.
_ თქვენ რატომ არ ინტერესდებით, ასეთი ფაქტები რომ ხდება? მერე რა, რომ არ ხართ სამართალდამცავები? მე მგონი, პირველი თქვენ გეხებათ ფაქტების მოძიება და მიტანა ხელისუფლებამდე. რატომ არ გაქვთ სურვილი, სხვა საწარმოებით დაინტერესდეთ, რომლებიც თხილს ამუშავებენ? მე რა შუაში ვარ? რამდენი კაცი მუშაობს, რა ხდება ამ სფეროში? მე ვფიქრობ, რომ გავაკეთო პრესკონფერენცია, თუ კიდევ გაგრძელდება ჩემს მიმართ ასეთი ცილისმწამებლური კამპანია. ძალიან გთხოვთ თქვენც და იმათაც, ვინც ჩემი მისამართით იშვერს ხელს, დადონ ფაქტები. რა შუაშია ბეგი სიორიძე თხილის ფასებთან? ბეგი სიორიძე აგდებს თხილის ფასს ხელოვნურად? ნორმალური ადამიანი ასეთ რამეს არ იტყვის.
_ ბატონო ბეგი, რატომ ასოცირდება რამდენიმე წელია თხილთან თქვენი სახელი და გვარი?
_ 15 000 ტონა თხილი მოდის გურიაში და მე მხოლოდ 500 ტონა თხილი მივიღე,-მეთქი გეუბნებით და ამის მერე ასეთ შეკითხვას მისვამთ კიდევ? თქვენ მითხარით რატომ ასოცირდება? ხის ძირში რომ ქალი ზის და თხილს იბარებს, მას ყველა დღე მიაქვს სახლში, მინიმუმ, 200 ლარი, საიდანაც ერთ თეთრს არ იხდის ბიუჯეტში. უჭირს? ვის უფრო უჭირს, საკითხავია. ჩვენთან როცა მოიტანენ თხილს, თან უნდა ჰქონდეთ პირადობის მოწმობა, რომელიც უნდა წარმოადგინონ, გაატარონ და თანხა გადაგიხადონ. ეს არის წესი და კანონი. როგორ უნდა გავუწიო იმას კონკურენცია, რომელიც არაფერს არ იხდის არსად, თან ასეთი ერთი კი არა, ასია.
_ და ის ხის ძირში მჯდომი ვის აბარებს თხილს საღამოს?
_ ვინც მეტს გადაუხდის, იმას. მოსახლეობისგან მე ვიბარებ თხილს ყველაზე მაღალ ფასად. მოსახლეობამ ხის ძირში მდგომი ქალების არც სახელი იციან და არც გვარი, მაგრამ იციან ბეგი სიორიძის სახელი და გვარი, რადგან მე მაქვს დიდი საწარმო, ქარხანა. ამიტომ მე ვარ ქვეყნის დამაქცევარი! თან ხალხს გადამყიდველები ეუბნებიან, ჩვენ რა შუაში ვართ, ბეგი სიორიძემ დააგდო ფასიო. დაიჯერა გლეხმა და გაიმეორა ამანაც _ აი, თურმე რას შვრება ბეგი სიორიძეო!
_ ანუ თქვენ აცხადებთ, რომ ეს არის უსაფუძვლო ჭორები თქვენს წინააღმდეგ?
_ ნამდვილად მასეა. რა თქმა უნდა, ცილისწამება და დაუსაბუთებელი ჭორებია.
_ რატომ არის თხილის ფასი არასტაბილური?
_ დღეს მე თხილში ვიხდი 2 ლარს და 30 თეთრს. ნახეთ, ქალაქში რამდენს იხდიან. მე ვიძლევი ყოველ დილით განკარგულებებს, დააგდეთ ფასი ორ ლარზე,-მეთქი? როგორ შეიძლება ფასი ხელოვნურად დააგდო? როცა არის ჭარბი პროდუქცია ბაზარზე, ფასი ვარდება და როცა ნაკლებია, მაშინ იწევს მაღლა. ეგ არავინ არ იცის, როგორ მოხდება. როცა 10 ტონა შემოდის ბაზარზე და არის 100 მყიდველი, რა თქმა უნდა, ამ დროს კონკურენცია არის დიდი და ფასიც არის მაღალი, მაგრამ როცა შემოდის 200 ტონა თხილი და მყიდველი არის ცოტა, ამ დროს ფასი იწევს დაბლა. ახლა არ არის კონკურენცია და ფასიც ამიტომაც არის დაბალი.
ხელისუფლებამ უნდა აღკვეთოს თხილის ყოველგვარი აღრიცხვის გარეშე მიღება, ქალაქი სანაგვეს არ ჰგავდეს და ბიუჯეტში უნდა შევიდეს ეს თანხა _ აი, ამაზე უნდა იზრუნოთ, _ გვითხრა ბეგი სიორიძემ.
