პროექტის ავტორი არასამთავრობო ორგანიზაცია “ჭიათურელთა კავშირია“ და მის მისაღებად საკრებულოს თვენახევრიანი დებატები დასჭირდა.
როგორც დადგენილების თანდართულ განმარტებით ბარათშია აღნიშნული, დადგენილების მიღების მიზეზი მანგანუმის მადნის მოპოვების შედეგად ჭიათურის მუნიციპალიტეტის ტერიტორიის უკიდურესი დაბინძურება, შესაბამისად, ონკოლოგიური დაავადებების მკვეთრი ზრდა გახდა; დადგენილების მიზანი კი მუნიციპალიტეტის მოსახლეობისა და ტერიტორიის მანგანუმისა და სხვა წიაღისეულის მოპოვების პროცესის მავნე ზეგავლენისაგან დაცვაა.
_ ჭიათურაში მანგანუმისა და სხვა წიაღისეულის გადაზიდვას თან ახლავს გარკვეული რისკ-ფაქტორები, რომლებიც უარყოფითად მოქმედებს მუნიციპალიტეტში მაცხოვრებელ თითოეულ მოქალაქეზე. წიაღისეულის ტრანსპორტირებისას, მისი მტვერი დიდ საფრთხეს წარმოადგენს, იგი შეიცავს სხვადასხვა ტოქსინებს. მოპოვებული მადანი ხშირად მიდის დასახლებული პუნქტების გავლით და საფრთხეს უქმნის ადამიანის ჯანმრთელობას, იგი ილექება ფილტვებში, ძვლებში, ტვინში. ჭიათურაში აღებულ იქნა ჰაერის 4 ნიმუში (1. ცდფ-ის ქარხნის მიმდებარე ტერიტორიაზე; 2. ქ. ჭიათურის პირველი საჯარო სკოლის მიმდებარე ტერიტორიაზე; 3. საჩხერის გზატკეცილის პირველ კილომეტრზე; 4. წერეთლის საბადოზე) და განისაზღვრა მანგანუმის ორჟანგის შემცველობა. თითოეულ წერტილში ნიმუშების აღება წარმოებდა საშუალოდ 7-8 საათის განმავლობაში. ანალიზების შედეგად დადგინდა, რომ ჰაერის ნიმუშებში მანგანუმის ორჟანგის შემცველობა შესაბამისად შეადგენდა 193,1მკგ/მ3; 4.4მკგ/მ3; 237,7მკგ/მ3; 13,6 მკგ/მ3, რაც საშუალო დღე-ღამურ კონცენტრაციას (1.0 მკგ/მ3) აღემატება 193,1-ჯერ 4.4-ჯერ 237-ჯერ 13,6-ჯერ. ადვილად წარმოსადგენია, რა კატასტროფულ პირობებში უწევთ არსებობა მუნიციპალიტეტის მცხოვრებლებს, განსაკუთრებით ქარის დროს, როცა ქალაქი მთლიანად ეხვევა მანგანუმის მტვერში.
კვლევის შედეგები დამუშავდა აშშ ბუნებრივი რესურსების დაცვის სააგენტოს სამეცნიერო ლაბორატორიაში (დენვერი, კოლორადო) და შეფასდა საქართველოსა და აშშ-ს ნორმატიული დოკუმენტების მიხედვით, _ აღნიშნულია განმარტებით ბარათში.
ინიციატივის ავტორებს მიაჩნიათ, რომ მანგანუმისა და სხვა წიაღისეულის გადამზიდავი მძიმეწონიანი სატვირთო მანქანების მოძრაობის წესის დამტკიცება, გარკვეულწილად დაიცავს ადამიანების ჯანმრთელობას და კონსტიტუციით დადგენილი ადამიანის ძირითადი უფლებები _ ცხოვრობდეს ჯანმრთელობისათვის უვნებელ გარემოში და სარგებლობდეს ბუნებრივი და კულტურული გარემოთი (საქართველოს კონსტიტუციის 37-ე მუხლის მე-3 პუნქტი; ორჰუსის კონვენცია) ჭიათურელებზეც გავრცელდება.
