კომისიამ მოისმინა სხვადასხვა სამინისტროს განმარტებები და პასუხები იმ განცხადებებზე, რომლებითაც კომისიას სხვადასხვა პოლიტიკურმა და არასამთავრობო ორგანიზაციამ მიმართა. უწყებების ინფორმაციით, არცერთი ფაქტი, რომელთა შესახებაც შემოვიდა ინფორმაცია, არ ფასდება როგორც საარჩევნო გარემოს უხეში დარღვევა, თუმცა, ყველა მათგანი შესწავლილია და მათზე რეაგირებაც მოხდა. მათ შორის, კომისიის სხდომაზე აღინიშნა, რომ კომისიის ჩარევით მოგვარდა “გურიის მოამბის” ოფისის საკითხი და აღნიშნული მედიაორგანიზაცია იმავე შენობაში გააგრძელებს ფუნქციონირებას, სადაც ამ დრომდე იყო.
უწყებათაშორისი კომისიის თავმჯდომარემ მოუწოდა ყველა იმ პარტიას, ვისაც საპრეზიდენტო კანდიდატი ჰყავს, კომისიას რეგულარულად მიაწოდონ მათი კანდიდატების გადაადგილების მარშრუტი და თარიღი.
“საქართველოში დღეს არის მშვიდი საარჩევნო გარემო, ყველა კანდიდატს აქვს საარჩევნო კამპანიის თავისუფლად წარმოების საშუალება. ისიც ფაქტია, რომ დღემდე პოლიციას ცალკეულ შემთხვევებში დასჭირვებია ჩარევა. ამის მიუხედავად, კარგი იქნება, თუ ჩვენ გვეცოდინება, სად და როდის იმყოფება ესა თუ ის კანდიდატი. ეს საშუალებას მოგვცემს, პრევენციული ღონისძიებები განვახორციელოთ”, − განაცხადა თეა წულუკიანმა.
ამასთან, კომისიის თავმჯდომარემ “ნაციონალური მოძრაობის” წარმომადგენელს ჰკითხა, ხომ არ არის წინასაარჩევნოდ პრეზიდენტის ინიციატივა ნასამართლეობისა და პირობითი მსჯავრის მქონე პირების მასობრივი შეწყალება, ადმინისტრაციული რესურსის გამოყენება. “ნაციონალურმა მოძრაობამ” ითხოვა, ამ თემასთან დაკავშირებით უწყებათაშორისმა კომისიამ წერილობით მიმართოს პრეზიდენტსა და “ნაციონალურ მოძრაობას” და მომავალ სხდომაზე წერილობითვე მიიღებს პასუხს.
კომისიამ შეიმუშავა საარჩევნო გარემოს გაუმჯობესების ხელშემწყობი რეკომენდაცია, რომელიც მალევე გამოქვეყნდება.
კომისიამ მიიღო გადაწყვეტილება რეკომენდაციების გაცემის შესახებ ადგილობრივი თვითმმართველობის ორგანოებისადმი ადგილობრივი მედიის ხელშეწყობისა და, აგრეთვე, გამგებლების შესაძლო იმპიჩმენტის პროცედურების შეჩერების მიზნით, ცენტრალური და ადგილობრივი ხელისუფლების ორგანოებისადმი საჯარო მოხელეებზე მკაფიო ინსტრუქციების გაცემის მიზნით იმის შესახებ, თუ რა არის კანონით ნებადართული წინასაარჩევნო პერიოდში და რა _ არა. გარდა ამისა, კომისიის წევრებმა გადაწყვიტეს, იმსჯელონ ისეთ საკითხებზე, როგორიცაა საქართველოს პრეზიდენტისა და თბილისის მერიის მიერ ადმინისტრაციული რესურსის გამოყენების შესაძლო ფაქტები, _ იუწყება იუსტიციის სამინისტრო.
