ჩვენთვის, შესაძლოა დამოუკიდებლობის დასასრულს ნიშნავდეს.
დიმიტრი შაშკინი: _ ევრაზიული კავშირი მხოლოდ ეკონომიკური გაერთიანება არაა _ რუსეთმა ის ევროკავშირის საპირისპიროდ შექმნა. ევრაზიული კავშირი გულისხმობს თანამშრომლობას თავდაცვის სფეროში ODKB-ს მეშვეობით, ერთიან ვალიუტას, ზესახელმწიფოებრივი ორგანოების შექმნას, ერთიან პარლამენტს და ასე შემდეგ. ევრაზიული კავშირი ჩვენთვის გულისხმობს დამოუკიდებლობის დასასრულს. გარდა პოლიტიკური პრობლემისა, ამ კავშირის ეკონომიკური მხარეც ჩვენთვის დამღუპველია. მაგალითად, ევრაზიული კავშირი გულისხმობს პრეფერენციებს წევრი ქვეყნების პროდუქციაზე. შედეგად, რუსეთი ჩვენ ბაზარს მთლიანად აითვისებს. მოგვიწევს რუსული მანქანებისა და ტანსაცმლის ყიდვა. ბუნებრივია, რომ ამავედროულად ჩვენი ექსპორტისთვის თურქეთი, ევროპა და ამერიკა ჩაიკეტება.
_ ბოლო პერიოდში გააქტიურდა საუბარი აფზახეთის რკინიგზის აღდგენაზე. როგორ ფიქრობთ, გეოპოლიტიკური მდგომარეობის გათვალისწინებით, რამდენად რეალურია ეს პროექტი და რა ძირითად საფრთხეებს ხედავთ?
_ აფხაზეთის რკინიგზის აღდგენა არ არის წმინდა ეკონომიკური პროექტი, როგორც ამის წარმოჩენას ცდილობს რუსეთი. დავსვათ მარტივი კითხვა: თუ რკინიგზა გაიხსნა, საბაჟოზე აფხაზები უარს იტყვიან? ძალიან მეეჭვება ასე მოხდეს. ანუ, თუ ჩვენ გავხსენით რკინიგზა და აფხაზებმა თავისი საბაჟო გააკეთეს, ეს ნიშნავს, რომ ჩვენ ვაღიარებთ მათ დამოუკიდებლობას და სუვერენიტეტს.
_ ახალი მთავრობის მოსვლის შემდეგ, რუსეთთან მიდგომა შეიცვალა _ დაინიშნა სპეციალური წარმომადგენელი და გაჩნდა ახალი სტრატეგია. რამდენად ეფექტურად მიიჩნევთ ამ მიდგომას?
_ არ მიმაჩნია, რომ რუსეთის ამ მთავრობასთან ჩვენ მთავარ თემაზე _ აფხაზეთსა და ცხინვალზე მოვილაპარაკებთ. არის ხუმრობა _ პესიმისტი არის კარგად ინფორმირებული ოპტიმისტი. სამწუხაროდ, მე ვარ პესიმისტი და მიმაჩნია, რომ რუსეთი პატივს მხოლოდ ძალას სცემს. პუტინის რეჟიმი განწირულია და უახლოეს 5 წელიწადში შეიცვლება. ჩვენ ამისთვის მზად უნდა ვიყოთ.
_ რაც შეეხება ქვეყნის შიგნით მიმდინარე პროცესებს, პრემიერმა ბიძინა ივანიშვილმა არა ერთხელ განაცხადა, რომ პოლიტიკიდან ძალიან მალე წავა, მაგრამ მისი წასვლის შემდეგ ქვეყანაში პოლიტიკური სიტუაცია დალაგებული იქნება. რამდენად რეალურად გამოიყურება მისი ეს დაპირება, მით უმეტეს, რომ ექსპერტების აზრით, ივანიშვილი არის რგოლი, რომელიც კოალიციაში შემავალ პოლიტიკურ სუბიექტებს აერთიანებს.
_ “ქართული ოცნება”, როგორც პოლიტიკური სუბიექტი, ბიძინა ივანიშვილის გარშემოა გაერთიანებული. მის გარეშე ეს ერთობა ვერ შედგებოდა, რადგან კოალიციის წევრებს შორის იდეოლოგიური განსხვავებები ძალიან დიდია. გარდა პრემიერის ფაქტორისა, ამ კოალიციის წევრებს აერთიანებს პრეზიდენტ სააკაშვილისა და ნაცმოძრაობის მიმართ სიძულვილი. ოქტომბერში პრეზიდენტი შეიცვლება, ანუ ეს ფაქტორი უკვე არ იქნება კოალიციისთვის გამაერთიანებელი და იმ შემთხვევაში, თუ პრემიერიც პოლიტიკიდან წავა, გაერთიანების მეორე მიზეზიც გაქრება. ამის შემდეგ, ბუნებრივია გამწვავდება იდეოლოგიური განსხვავებები.
_ პრემიერი კოალიციის საპრეზიდენტო კანდიდატ გიორგი მარგველაშვილს უალტერნატივოდ მიიჩნევს. თქვენ რას ფიქრობთ ამის შესახებ?
_ არჩევნებში და პოლიტიკაში არასოდეს არ უნდა თქვა, არასოდეს. 2012 წლის არჩევნების ბედი ბოლო 2 კვირაში შეიცვალა. პოლიტიკური მოცემულობა ამ მომენტისთვის ბუნდოვანია. ბევრი ფაქტორია, რომელიც არჩევნებზე და პოსტ საარჩევნო პერიოდზე ზეგავლენას ახდენს, ამიტომ ახლა პროგნოზების გაკეთება რთულია.
