დღითიდღე უარესდება მდგომარეობა. ახლა განვუცხადეთ რწმუნებულს, მივმართავთ ჟურნალისტებს და მერე, იცოდეთ, საწყენი არ იყოს,-თქო. არ მეწყინება, მე რა ვქნა, არანაირი საშუალება არ მაქვს, მეტი არ შემიძლიაო, გვითხრა რწმუნებულმა,” _ ამბობს ლიხაურელი ოთარ მამალაძე.
ოზურგეთის მუნიციპალიტეტის სოფელ ლიხაურში მდებარე ე. წ. “საყვავილის ბინებში” მცხოვრები 17 ოჯახი ხელისუფლებას დახმარებას “გურია ნიუსის” საშუალებით თხოვს.
_ ბინა მეტად ავარიულ მდგომარეობაშია. მარტში რომ სტიქია იყო, იმის მერე შეტანილი გვაქვს განცხადებები ოზურგეთის მუნიციპალიტეტის გამგეობაში. მოვიდნენ, შეამოწმეს, შეადგინეს სადეფექტო აქტები, დაგვპირდნენ, მოვალთ და გადავხურავთო, მაგრამ საერთოდ არ გამოჩენილან. ძალიან გამწარებული ვართ _ .დაზიანებულია სახურავი, თავზე გვაწვიმს. წვიმის დროს თასებით დავრბივართ. ღამე შიშით ვიძინებთ, თავზე რომ არ დაგვენგრეს სახლი. ადამიანებად არავის მივაჩნივართ. არჩევნები რომ მოახლოვდება, ყველას მაშინ ვახსენდებით. წინასაარჩევნოდ დღე არ გავიდოდა, ყველა პარტიის წარმომადგენლები არ მოსულიყვნენ _ ხმების სანაცვლოდ გადაგიხურავთ ბინებსო. მერე ყველას დავავიწყდით. ახლა ზამთარი მოდის და გთხოვთ დაგვეხმარეთ, ასეთ პირობებში შეიძლება ცხოვრება? _ ამბობენ აღნიშნული ბინის მცხოვრებლები.
ორსართულიან კორპუსებში მცხოვრები მოსახლეობა აცხადებს, რომ ოზურგეთში ძლიერი ქარის შედეგად დაზიანებულ უმეტეს შენობებს სახურავები შეუცვალეს, მათ კორპუსებს კი ყურადღება არავინ მიაქცია.
_ როცა გაწვიმდება სახლიდან გავდივართ, გვეშინია ჭერი არ ჩამოინგრეს, გვაინტერესებს, სად ბრძანდება მუნიციპალიტეტის ხელმძღვანელობა?! _ კითხულობს მოსახლეობა.
კიდევ ერთი პრობლემა, რომელიც ამ მოსახლეობას აწუხებს, მოუწესრიგებელი საკანალიზაციო სისტემაა. ადგილობრივების თქმით, სისტემა მოძველებულია, ამიტომ, ხშირად მწყობრიდან გამოდის.
ადგილობრივები უგზოობაზე და სასმელი წყლის არქონაზეც საუბრობენ.
ლიხაურის ტერიტორიული ორგანოს რწმუნებული კახა გობრონიძე “გურია ნიუსთან” ადასტურებს აღნიშნული ბინების მცხოვრებთა გასაჭირს და აღნიშნავს, რომ საქმის კურსშია ოზურგეთის მუნიციპალიტეტის გამგეობის ინფრასტრუქტურის სამსახური.
_ ნამდვილად უჭირთ ამ ბინების მცხოვრებლებს. მე ჩავაყენე საქმის კურსში ინფრასტრუქტურის სამსახური, შედგენილია ყველა საჭირო სადეფექტო აქტი. მათ საცხოვრებელ სახლს დაუზიანდა ისედაც ძველი სახურავი და ახლა უმძიმეს მდგომარეობაში არიან. ბევრი სახლი შეაკეთეს ლიხაურში და ალბათ, არც ამას დატოვებენ. მესმის, ყველაფერი ჩქარა უნდათ, მაგრამ ასე არ ხდება, _ თქვა გობრონიძემ.
