ამომავალი მზის ქვეყნის სატახტო ქალაქმა ეს საპატიო უფლება 7 სექტემბერს, არგენტინაში, ბუენოს აირესში გამართულ სოკ-ის 125-ე სესიაზე მოიპოვა.
ტოკიო 1964 წლის შემდეგ მეორედ უმასპინძლებს ოლიმპიურ თამაშებს. იაპონიის დედაქალაქის გარდა ამ უფლების მოსაპოვებლად მადრიდი (ესპანეთი) და სტამბული (თურქეთი) იბრძოდნენ. პირველ ტურში ტოკიომ 42 ხმა მიიღო, მადრიდმა და სტამბულმა – 26-26. მეორე ტურში ფინალისტი გაირკვა: სტამბულმა 49 ხმა მოიპოვა, მადრიდმა – 45. მესამე, უკანასკნელ ტურში ტოკიოს 60-მა დელეგატმა დაუჭირა მხარი, სტამბულს – 36-მა.
იაპონიის დედაქალაქს 2016 წლის ოლიმპიადის მასპინძლობაც სურდა, თუმცა რიო დე ჟანეიროსთან დამარცხდა. ამჯერად ტოკიომ გაიმარჯვა და გახდა აზიის პირველი ქალაქი, სადაც თამაშები მეორედ გაიმართება. საგულისხმოა, რომ ტოკიო ასევე აზიის პირველი ქალაქი იყო, სადაც ოლიმპიადა გაიმართა.
“ჩვენ ძალიან გვინდოდა ოლიმპიადის მასპინძლობა და უზომოდ მიხარია, ეს უფლება რომ მოვიპოვეთ! დარწმუნებული ვარ, ჩვენს სიხარულს მთელი იაპონია იზიარებს! მჯერა, რომ 2020 წლის თამაშები ერთ-ერთი საუკეთესო იქნება ოლიმპიადების ისტორიაში”! – განაცხადა იაპონიის ოლიმპიური კომიტეტის პრეზიდენტმა და ტოკიო 2020-ის საორგანიზაციო კომიტეტის თავმჯდომარემ ცუნეკაზუ ტაკედამ.
გადაწყვეტილია, რომ ტოკიოს ოლიმპიური სტადიონის ტევადობა 50 ათასიდან 80 ათასამდე გაიზრდება. ამ და სხვა სარბიელების რეკონსტრუქციისთვის იაპონიის ხელისუფლებამ უკვე გამოყო მილიარდი დოლარი.
2020 წლის ოლიმპიურ თამაშებამდე იაპონია კიდევ ერთ დიდ საერთაშორისო შეჯიბრებას უმასპინძლებს: 2019 წელს ამომავალი მზის ქვეყანაში რაგბის მსოფლიო თასი გათამაშდება.
ტოკიოს გამარჯვებიდან ერთი დღის შემდეგ, 8 სექტემბერს, ჭიდაობის თაყვანისმცემლებმაც გაიხარეს: სპორტისა და ახალგაზრდულ საქმეთა სამინისტროს პრესსამსახურის ინფორმაციით, სპორტის ანტიკური სახეობა ჭიდაობა 2020 და 2024 წლების ოლიმპიური თამაშების პროგრამაში დარჩება, თუმცა დამატებითი სახეობის სტატუსით.
ჭიდაობის საერთაშორისო ფედერაციის (FILA) ახალი პრეზიდენტის ნენად ლალოვიჩის თქმით (მან რაფაელ მარტინეტი შეცვალა), მისი ორგანიზაციის მთავარი ამოცანა მომდევნო 4 წლის მანძილზე ოლიმპიური თამაშების ძირითად 25 სახეობაში დაბრუნება იქნება.
“ჭიდაობა სპორტის ახალი სახეობა არაა, მაგრამ ის ჭიდაობა, რომელსაც ჩვენ წარვადგენთ, ახალი ჭიდაობაა! არ გადავაჭარბებ თუ ვიტყვი, რომ ეს უმნიშვნელოვანესი დღეა ჩვენი სპორტის თითქმის ორიათასწლიან ისტორიაში”! – განაცხადა ლალოვიჩმა ფარული კენჭისყრის დასრულების შემდეგ. ჭიდაობამ 49 ხმა მიიღო, ბეიზბოლმა და სოფტბოლმა – 24, ხოლო სქვოშმა – 22.
