თსუ-ში 2013-2014 სასწავლო წლის შემოდგომის სემესტრის აკადემიური რეგისტრაცია 11 სექტემბერს დაიწყო. რეგისტრაციის პირველ დღესვე შეივსო საგნებზე ადგილები და სტუდენტთა დიდმა ნაწილმა ვერ მოახერხა სასურველ საგანზე ჩაწერა.
გიორგი ჭალაგანიძე, ჰუმანიტარულ მეცნიერებათა ფაკულტეტის სტუდენტი: “11 სექტემბერს, სამწუხაროდ, ვებგვერდზე არ გაიხსნა ბაზები. მე თანხა გადავიხადე რეგისტრაციამდე ერთი კვირის წინ. დაახლოებით ორი საათის განმავლობაში მიწევდა სიარული და გარკვევა იმისა, თუ რატომ არ გაიხსნა ბაზა. საბოლოოდ, გაირკვა, რომ იყო ამათი პრობლემა. ბოლოს და ბოლოს როცა გაიხსნა, ვნახე, ადგილების შევსებულია და საგნებს ვერ ვირჩევ.”
ეთერი გორგილაძე, ფსიქოლოგიის მესამე კურსის სტუდენტი: “რეგისტრაციის დაწყებისას, დილით ვერ შევედი ნორმალურად ბაზაში, 5 წუთში კი ადგილები უკვე შევსებული დამხვდა. ძალიან ბევრ სტუდენტს აღარ შეხვდა ადგილი და ახლა იმხელა რიგია, რომ იქ ჩადგომა არც ღირს. მეორე საიტი გაიხსნა, მაგრამ სანამ იქაც უკვე არ აირჩა ყველა საგანი, ვერც იქ შევედი. იდეაში კარგად არის განაწილებული 2-საათიანი შუალედებით რომ იხსნებოდა სხვადასხვა ფაკულტეტის ბაზა, მაგრამ ადგილები არ არის, რომ ყველა სტუდენტი დაკმაყოფილდეს. სავალდებულო სამი საგანი მქონდა და ვერ ავირჩიე ვერც ერთი”.
ქრისტინე გაბისონია, ჰუმანიტარულ მეცნიერებათა ფაკულტეტის მეოთხე კურსის სტუდენტი: “ცოტა უჭირს რეგისტრაციის პროცესს. ნელ-ნელა მიდის, მაგრამ თითქმის დარეგისტრირებული ვარ ყველაფერზე. ამბობენ, რომ კიდევ ემატება საგნებზე ადგილები და ჯგუფები. ჰუმანიტარებისთვის 11 სექტემბერს დილის თერთმეტი საათიდან მიმდინარეობდა რეგისტრაცია. გაკეთდა ალტერნატიული საიტი, რომელიც უფრო აადვილებს შესვლას ბაზაში და აღარ ჭედავს საიტი. სავალდებულო საგნები თითქმის მოვასწარი, მაგრამ ამბობენ, რომ კიდევ დაემატება ადგილები.”
ბოლონიის პროცესის ერთ-ერთ კომპონენტი ისაა, რომ სტუდენტი უნივერსიტეტში საგნების არჩევისას თავისუფალია. ის საკუთარი მოსაზრებების და სურვილების მიხედვით წყვეტს, სწავლების რომელ სემესტრში რა საგანი ისწავლოს. რა თქმა უნდა, არსებობს წინაპირობები, სავალდებულო საგნები და ა.შ. თუმცა, იდეაში სტუდენტი არჩევანში მაინც თავისუფალია.
საქართველომ ბოლონიის დეკლარაციას ხელი 2005 წელს მოაწერა. ბოლონიის პროცესთან შეერთებით, ჩვენმა ქვეყანამ მზადყოფნა გამოხატა, მონაწილეობა მიეღო უმაღლესი განათლების ერთიანი ევროპული სივრცის ჩამოყალიბებაში.
სწორედ 2005 წლიდან აფიქსირებენ სტუდენტები უნივერსიტეტების ელექტრონულ ბაზებში სასწავლო საგნებს და თავად ირჩევენ საკუთარი ლექციების ცხრილს. თუმცა, როგორც სტუდენტები აღნიშნავენ, თავისუფალი არჩევნის პარალელურად, ყოველი სასწავლო წლის დადგომისას, თავს იჩენს ბაზების გაუმართაობის საკითხი.
კითხვაზე, რატომ აქვს თსუ-ს მუდმივად ეს პრობლემა და რას აკეთებს ადმინისტრაცია მის მოსაგვარებლად, სასწავლებლის საზოგადოებასთან ურთიერთობის დეპარტამენტი გვპასუხობს:
“აკადემიური რეგისტრაციისას დაფიქსირდა მცირე ხარვეზები, მაგრამ ეს წინა წლებთან შედარებით იყო მინიმალური და მცირე ვადებში გადაიჭრა. სასწავლო ბაზის გამართულად მუშაობისთვის თსუ-ს ინფორმაციული ტექნოლოგიების უზრუნველყოფისა და ოპერაციების მართვის დეპარტამენტმა sms.tsu.ge-ის, ქსელური და სერვერული სისტემების ოპტიმიზაცია განახორციელა. ასევე მიღებული იყო გადაწყვეტილება უნივერსიტეტის ფაკულტეტებზე რეგისტრაციის ეტაპობრივად გახორციელების შესახებ. 12 სექტემბრის 12:00 საათიდან სტუდენტები ირჩევენ სხვა ფაკულტეტების შეთავაზებულ სასწავლო კურსებს. თუმცა, თითოეულ ფაკულტეტზე ჯგუფები იხსნება საჭიროების და მოთხოვნის მიხედვით”.
საკუთარი პრობლემების უნივერსიტეტის ადმინისტრაციისთვის გასაცნობად თსუ-ს სტუდენტები წლევანდელ სასწავლო წელსაც აქციით იწყებენ: “16 სექტემბერს, თსუ-ს პირველ კორპუსთან ვიკრიბებით, რათა ახალ რექტორს დავანახოთ ის პრობლემები, რომლებიც გვაწუხებს და მოვისმინოთ მისი ხედვა, როგორ აპირებს აღნიშნული პრობლემის გადაწყვეტას”, _ ნათქვამია სტუდენტების მიერ “ფეისბუქით” დაანონსებულ განცხადებაში.
თსუ საზოგადოებასთან ურთიერთობის დეპარტამენტი სტუდენტთა აქციასთან დაკავშირებით აცხადებს, რომ ადმინისტრაცია მოისმენს და შეისწავლის სტუდენტების დასახელებულ ყველა პრობლემას, შემდგომში მათი გადაჭრის მიზნით.
