მინისტრის ინფორმაციით, პირველი ოქტომბრიდან დღემდე სასჯელაღსრულების სხვადასხვა დაწესებულებიდან ამოღებულ იქნა ხელნაკეთი დანები, მობილური ტელეფონები, ციხეში დამზადებული ალკოჰოლური სასმელები, ე.წ. ბრაგა, კუსტარულად დამზადებული “ტატუს” გასაკეთებელი აპარატი, ხელნაკეთი მადუღარები, კუსტარულად დამზადებული ბანქო და ა.შ.
უწყების ხელმძღვანელმა მედიას გააცნო ის სტატისტიკური მონაცემებიც, რომლის მიხედვით, 2012 წლის 1 ოქტომბრიდან დღემდე სასჯელაღსრულების დაწესებულებებში აკრძალული საგნების შენახვის, თანამშრომლებზე თავდასხმის, მსჯავრდებულთა მიერ ერთმანეთის ჯანმრთელობის დაზიანებისა და სხვისი ნივთების დაზიანების ფაქტზე სულ 202 სისხლის სამართლის საქმეა აღძრული.
პერმანენტული ოპერატიული სარეჟიმო ღონისძიებების შედეგად, აკრძალული საგნების აღმოჩენისა და შენახვის ფაქტზე აღძრულია 103 საქმე. ყველა გამოვლენილ ფაქტზე ადეკვატური რეაგირება მოხდა: 20 შემთხვევაში გამოძიება უკვე დასრულებულია და სასამართლო გადაწყვეტილებით დამდგარია შესაბამისი განაჩენი; ადმინისტრაციაზე თავდასხმისა და დაუმორჩილებლობის ფაქტზე აღძრულია 26 (24+2) სისხლის სამართლის საქმე; აღნიშნულ პერიოდში 39 საქმე აღიძრა მსჯავრდებულების მიერ ერთმანეთის ჯანმრთელობის დაზიანების ფაქტზე; მსჯავრდებულების მიერ ერთმანეთის ნივთების დაზიანების ფაქტზე კი აღძრულია 34 სისხლის სამართლის საქმე.
დღესვე მინისტრმა ჩხრეკის შედეგად ამოღებულ ვიდეოჩანაწერებზეც ისაუბრა:
_ ჩვენ გვაქვს ინფორმაცია, როგორ მუშაობენ ჩვენი ოპონენტები მსჯავრდებულებთან და მათი ოჯახის წევრებთან, ასევე ჩვენს მიერ სისტემიდან დათხოვნილ, თუ ჯერ კიდევ მოქმედ ზოგიერთ თანამშრომელთან კომპრომატების მოპოვებისა თუ მათი ხელოვნურად შექმნის მიზნით. მათი მიზანია – მოიპოვონ ან ხელოვნურად შექმნან ვიდეოჩანაწერები, სადაც ასახული იქნება მსჯავრდებულებს შორის კონფლიქტები და არეულობის სცენები, რათა შემდეგ ეს ჩანაწერები გამოიყენონ სისტემის დიკრედიტაციისთვის _ განაცხადა სოზარ სუბარმა.
