და სტატიაში ნახსენებ ზოგიერთ დანაშაულის შემთხვევასთან დაკავშირებით განმარტება გააკეთა.
“ის კონკრეტული ფაქტები, რაც თქვენს სტატიაში იყო აღნიშნული, გადავამოწმეთ და კიდევ ერთხელ გვინდა აღვნიშნოთ, რომ ბოლო თვეების განმავლობაში ამ კონკრეტულ რეგიონში დანაშაულის მატება არ აღინიშნება. რეგიონში პოლიცია აქტიურად მუშაობს,” _ განუცხადა “გურია ნიუსს” შსს-ს სამეგრელო-ზემო სვანეთის სამმართველოს პრესსამსახურის უფროსმა ეკატერინე ბრეკაშვილმა.
“თქვენ სტატიაში აღნიშნულ დაჭრის ფაქტთან დაკავშირებით, რომელიც 8 ივლისს მოხდა, საქმე გახსნილია და ოლეგ ფიფია დაკავებულია.
რაც შეეხება “ლიბერთი ბანკის” გაქურდვის საქმეს, ამ შემთხვევაშიც საქმე გახსნილია და დამნაშავე ბექა ჩანგელია დაკავებულია. ნაქურდალი ნივთებიც ამოღებულია.
კრიმინალური გარჩევის დროს დაჭრის შესახებ ჩვენთან ინფორმაცია არ შემოსულა.
თქვენს მიერ ნახსენებ ფაბრიკის დასახლებაში 5 ოჯახის გაქურდვასთან დაკავშირებით მიუხედავად იმისა, რომ შსს-ში შეტყობინება არ შემოსულა, ჩვენ ამ ფაქტებით მაინც დავინტერესდით და გადავამოწმეთ. ფაქტი არ დასტურდება.
დანაშაულის სტატისტიკასთან დაკავშირებით კონკრეტულად მაგ რეგიონში, შეგვიძლია განვაცხადოთ რომ მონაცემების მიხედვით დანაშაული განახევრებულია და ზრდა არანაირად არ ფიქსირდება,” _ უთხრა ბრეკაშვილმა “გურია ნიუსს” და დასძინა, რომ სამინისტრო არ ადასტურებს ინფორმაციას წალენჯიხის რაიონში კრიმინალური გარჩევების ფაქტს.
კითხვაზე, თუ რა მეთოდოლოგიით დგინდება დანაშაულის სტატისტიკა და მასში შედის თუ არა დანაშაულის აღუნიშნავი შემთხვევები, შს სამინისტროში განგვიცხადეს, რომ ამის შესახებ ინფორმაციის ნახვა სამინისტროს ვებ-გვერდზეა შესაძლებელი. თუმცა, სამინისტროს საიტზე აღნიშნული ინფორმაცია არ იძებნება.
იურისტი და პოლიტოლოგი კახი კახიშვილი “გურია ნიუსთან” აცხადებს, რომ სტატისტიკაში აღურიცხავი დანაშაულები არ აისახება.
“თუ პოლიციაში განცხადება არ შევიდა, ბუნებრივია, სტატისტიკაში ასეთი დანაშაული ვერ აისახება. აქედან გამომდინარე, აღურიცხავი დანაშაული სტატისტიკურ მონაცემებში არ შედის,” _ აღნიშნა კახიშვილმა.
“გურია ნიუსში” რამდენიმე დღის წინ სტატია გამოქვეყნდა, სადაც წალენჯიხის მცხოვრებლები რეგიონში არსებულ კრიმინოგენურ ვითარებაზე საუბრობდნენ. წყაროები დანაშაულის კონკრეტულ ფაქტებზე საუბრობდნენ და აცხადებდნენ, რომ მოსახლეობა ძირითად შემთხვევაში დანაშაულის შესახებ პოლიციას არ ატყობინებს: “რისთვის განვაცხადოთ, მაინც არავის იჭერენ და რა აზრი აქვს. თან რომ ვიჩივლოთ, გაიგებენ და შეიძლება უარესი დაგვმართონ,” _ უთხრა “გურია ნიუსს” წყარომ.
