“მე ვფიქრობ, რომ აქ ძალიან ბევრი მომენტია, რომელიც პოლიტიზირდა, მაგრამ ჩავუღრმავდეთ იმას, რას ნიშნავდა სამართლიანობის აღდგენა არჩევნებამდე და არჩევნების შემდეგ. მე მგონი, ძალიან დიდ ნაწილს დაავიწყდა არჩევნებამდე რა ტიპის ქვეყანაში ვცხოვრობდით _ მედია იყო აბსოლუტური კონტროლის ქვეშ, ეს იყო პოლიციური სახელმწიფო, ყველას უსმენდნენ და ყველა ოჯახში იყო პრობაციონერი, ეს იყო ქვეყანა, სადაც მთავრობას ტერორის ქვეშ ჰყავდა მთელი ქვეყანა. მაშინ, როდესაც ჩვენ ვსაუბრობდით სამართლიანობაზე, ვგულისხმობდით არა მარტო იმას, რომ ძველი საქმეები იქნებოდა გამოძიებული, ჩვენ ვსაუბრობდით იმაზე, რომ ეს უნდა გაჩერებულიყო მყისიერად. მაშინ ამ მყისიერ გაჩერებაზე იყო ბევრად უფრო მეტად საუბარი, ვიდრე ძველი საქმეების გადასინჯვაზე. ეს ნამდვილად მოხდა და ადამიანებს, ვისაც ამის დანახვა უჭირთ, მინდა გავახსენო, რომ ჩვენ პოლიციურ სახელმწიფოში ვცხოვრობდით. ის მოთხოვნები, რაც არის პროკურატურის მიმართ, ეს იგივე მოთხოვნებია, რაც იდგა “ნაციონალური მოძრაობის” მიმართ 2003-2004 წლებში და “ნაციონალურმა მოძრაობამ” ყოველგვარი სამართლებრივი საფუძვლის გარეშე, პოპულისტური მიზნებით, ხალხი აზეიმა სამართლებრივი განცდით და მივიღეთ ქვეყანა, რომელიც ბოლოს მივიდა პოლიციურ სახელმწიფომდე,” _ განაცხადა მარგველაშვილმა გადაცემა “ღია ეთერში”.
მარგველაშვილის თქმით, ის კმაყოფილია პროკურატურის პოზიციით, რომელიც ზეწოლის მიუხედავად, მაინც სამართლებრივად მიჰყვება ყველა საკითხს.
