საქმე ეხება, აღნიშნული სამინისტროს მიერ, საინფორმაციო-საკონსულტაციო ცენტრის თანამშრომლების შესარჩევ კონკურსს. ამ კონკურსში მარინე სუნგულიამ მაღალი შედეგი მიიღო, მაგრამ თანამშრომლად სხვა კადრი შეირჩა. სუნგულიამ სასამართლოს მიმართა, მაგრამ მისი სარჩელი არ დაკმაყოფილდა.
_ სასამართლოდან დღეს გავიგე პასუხი _ ჩემი სარჩელი არ დაკმაყოფილდა, რასაც ველოდი კიდეც და ამას მშვიდად შევხვდი. კონკურსიდან მოყოლებული სასამართლო პროცესის დასრულებამდე, ისეთი შეგრძნება დამრჩა, რომ დამსაჯეს სიმართლისა და პროფესიონალიზმისთვის. ოთხი სასამართლო პროცესი ჩატარდა, მათ შორის პირველი სამი, ვფიქრობ, ობიექტურად მიმდინარეობდა; სარჩელი სპეციალურად თბილისის საქალაქო სასამართლოში შევიტანე, თითქოს გავერიდე კოტე შარაშენიძეს და მის გუნდს, რომელიც ჩემი დაბლოკვით იყვნენ დაინტერესებული და ამას არც მალავდნენ. ამიტომ, თითქოს მეტ ობიექტურობას ველოდი…
_ ქალბატონო მარინე, იქნებ დაგვისახელოთ ერთი ფაქტი მაინც, რამაც სასამართლოს ობიექტურობაში ეჭვი შეგატანინათ…
_ სოფლის მეურნეობის სამინისტრომ, მისივე განცხადებით, კონკრეტული პირების შერჩევის გადაწყვეტილება მიიღო სამი კომპონენტის გათვალისწინებით: ტესტირება, საბუთები განათლებისა და გამოცდილების შესახებ და გასაუბრება.
სასამართლოზე ჩემს მიერ დასახელებულ ორ არგუმენტს, რომ მე ტესტირებაში გაცილებით მაღალი ქულები მქონდა; საბუთები და გამოცდილება გაცილებით მეტი მაქვს, სამინისტრომ დადებითი პასუხი გასცა. როგორც აღმოჩნდა, მესამე კომპონენტი ანუ გასაუბრება აღმოჩნდა გადამწყვეტი. მოვითხოვე მოეტანათ გასაუბრების ოქმი ან ვიდეოჩანაწერი სადაც ჭყონიას უპირატესობა დამტკიცდა. სამინისტრომ წარმოადგინა ასეთი ფორმის ოქმი: მოუსმინეს მარინე სუნგულიას, გიორგი ჭყონიას და სხვებს და ხმათა უმრავლესობით მიიღეს გადაწყვეტილება, კონკრეტული კანდიდატის სასარგებლოდ.
სასამართლოზე დავსვი ასეთი კითხვა: კომისიის ოთხი წევრიდან, ჩემთან გასაუბრებას ორი ესწრებოდა, აქედან, ერთი იურისტი იყო და არაადეკვატურ კითხვებს სვამდა, მაშინ ხმათა უმრავლესობამ როგორ მიიღო გადაწყვეტილება ჩემს შესახებ?!
საინტერესო იყო ისიც, რომ საუბრისას მოსამართლემ შემაჩერა და მითხრა: _ თქვენი საგაზეთო სტატიები წავიკითხე, სატელევიზიო გამოსვლები ვნახე და არ გააკეთოთ აქ თქვენი პოლიტიკური განცხადებებიო. გაოგნებული დავრჩი. ძალიან კარგად ვიცი, სად რა უნდა ვთქვა, სასამართლო პროცესზე რომ პოლიტიკური განცხადებები არ უნდა გაკეთდეს, კარგად მესმის და ამ შენიშვნის საფუძველი მისთვის არ მიმიცია.
გამიჩნდა გონივრული ეჭვი იმისა, რომ დაინტერესებულმა პირებმა ჩემი საგაზეთო სტატიები, სატელევიზიო გამოსვლების ფირები სპეციალურად მიუთითა საქმეში, რომ ნაციონალებისდროინდელი მოსამართლე ჩემ მიმართ არაპოზიტიურად განეწყო.
_ აპირებთ თუ არა ამ გადაწყვეტილების გასაჩივრებას?
_ რა თქმა უნდა ჯერ სააპელაციოში და შემდეგ უზენაეს სასამართლოში შევიტან სარჩელს; თუ საჭირო იქნება, სტრასბურგამდეც მივალ, არ გავერიდები.
