წელს, სოფლის მეურნეობის სამინისტროს მიერ განხორციელებული “შეღავათიანი აგროკრედიტის პროექტის” ფარგლებში აღებული სესხით, კომპანია “ჯორჯიან ბიზნეს ზონა” ბიზნესის გაფართოებას და საქონლის ფერმის აშენებას გეგმავს. დღეისათვის ქარხანაში 18 ადამიანია დასაქმებული. ქარხნის სრული დატვირთვით ამუშავებასთან ერთად კი, ახალი სამუშაო ადგილებიც შეიქმნება.
დავით გალეგაშვილი ფერმერთა ასოციაციის წევრებთან და კომპანია “ბიპის” წარმომადგენლებთან ერთად, “ჯორჯიან ბიზნეს ზონის” მიერ თანამედროვე ტექნოლოგიებით გაშენებული ვაშლის ბაღებიც დაათვალიერა.
დავით გალეგაშვილმა “ადგილობრივი მოასახლეობის განვითარების ინიციატივის” (CDI) დირექტორთან, ნინო ზამბახიძესთან ერთად ახალციხის რაიონის სოფელ ივლიტაში კომპანია “ბიპისა” და მისი პარტნიორების მიერ 2012 წელს დაფინანსებული სოციალური საწარმო დაათვალიერა და ფერმერებს შეხვდა. სოციალურ საწარმოს, რომელშიც გაერთიანებულია 24 ოჯახი, ივლიტას სათემო კავშირი მართავს. აღნიშნულმა ორგანიზაციამ პროექტის “ადგილობრივი მოსახლეობის განვითარების ინიციატივა” ფარგლებში თანამონაწილეობრივი გრანტი მიიღო და აგროტექნიკა შეიძინა.
დავით გალეგაშვილი ფერმერებს კოოპერატიული მეურნეობის სამართლებრივ ჩარჩოში მოქცევის უპირატესობაზე ესაუბრა და მათთან ერთად სამომავლო პერსპექტივებიც განიხილა.
“რაც ჩვენ ვნახეთ ეს არის სასოფლო-სამეურნეო კოოპერატივების ჩანასახი. ახალი კანონის მიხედვით ჩვენ ვაპირებთ ამ მიმართულების აქტიურად განვითარებას”, _ განაცხადა დავით გალეგაშვილმა.
სოფელ ივლიტას სათემო კავშირთან შეხვედრის შემდეგ, სოფლის მეურნეობის მინისტრის მოადგილე სოფელ წყრუთში 2012 წელს ამავე პროგრამის ფარგლებში დაფინანსებულ სადემონსტრაციო ნაკვეთებს ეწვია. ნაკვეთზე მოწყობილია თანამედროვე წვეთოვანი სარწყავი სისტემები, რამაც მნიშვნელოვნად გაზარდა მოსავლის რაოდენობა. წელს, აღნიშნულ ნაკვეთებზე პომიდვრის საჰექტარო მოსავალმა 75 ტონა შეადგინა.
2012-13 წლებში “ადგილობრივი მოასახლეობის განვითარების ინიციატივის” (CDI) პროგრამის ფარგლებში სამი სოციალური საწარმო შეიქმნა, სამცხე-ჯავახეთის 28 სოფელში 44 სადემონსტრაციო ნაკვეთი მოეწყო, რომლებზეც ადგილობრივ ფერმერთა ჯგუფებს სასოფლო-სამეურნეო პროდუქცია ახალი ტექნოლოგიებით, პროფესიონალი აგროკონსულტანტების დახმარებით მოჰყავთ.
