იაპონიაში 140 ქვეყნის მთავრობის მიერ ხელი მოეწერა მინამატას კონვენციას ვერცხლისწყლის შესახებ. კონვენცია აწესებს რიგ ვალდებულებებს სხვადასხვა წარმოებიდან ვერცხლისწყლის გაფრქვევებზე, ასევე ვერცხლისწყლის შემცველი პროდუქტების წარმოებაზე, ექსპორტსა და იმპორტზე. ვერცხლისწყალი არის ქიმიური ნივთიერება, რომელიც გამოირჩევა უარყოფითი ზემოქმედებით გარემოზე და ადამიანის ჯანმრთელობაზე, ამასთან, გააჩნია გარემოში მდგრადობის და ეკოსისტემებში ბიოაკუმულაციის უნარი.
ვერცხლისწყლით დაბინძურების უდიდეს წყაროს წარმოადგენს ოქროს მცირემასშტაბიანი (კუსტარული) მოპოვება და ქვანახშირის თბოელექტროსადგურები. მინამატას კონვენციით, მთავრობები შეთანხმდნენ, რომ შეიმუშავებენ სტრატეგიებსა და ეროვნულ გეგმებს ვერცხლისწყლის და მისი შენაერთების მართვის მიზნით. მინამატას კონვენცია ხაზს უსვამს ფინანსური, ტექნიკური, ტექნოლოგიური და შესაძლებლობების გაძლიერების მხარდაჭერის მნიშვნელობას, განსაკუთრებით განვითარებადი ქვეყნებისა და გარდამავალი ეკონომიკის ქვეყნებისთვის, ვერცხლისწყლის მართვის ეროვნული შესაძლებლობების გაძლიერების და კონვენციის ეფექტიანად განხორციელების ხელშეწყობას.
მინამატას კონვენცია დაექვემდებარება რატიფიკაციას, შეერთებას და მიღებას სახელმწიფოების მიერ და ღია იქნება შეერთებისთვის იმ თარიღის შემდგომ, როდესაც კონვენცია დაიხურება ხელმოწერისთვის.
აღნიშნული შეთანხმება განაპირობა იაპონიის მთავრობის გადაწყვეტილებამ ვერცხლისწყლით გარემოს დაბინძურებისა და მოსახლეობის ჯანმრთელობაზე მავნე გავლენის შემცირების შესახებ. კონვენციას სახელი ეწოდა იაპონიის ქალაქ მინამატას მიხედვით. გასული საუკუნის 50-იან წლებში ადგილობრივი საწარმოს მიერ მინამატას ყურეში ვერცხლისწყლით დაბინძურებული წყლის ჩაშვების შედეგად ათი ათასობით ადამიანი მოიწამლა ამავე ყურეში დაჭერილი თევზით. მსხვერპლის რაოდენობამ 2000-ს მიაღწია.
