საკითხი კომიტეტის წევრებს შინაგან საქმეთა სამინისტროს წარმომადგენელმა, გიორგი მანჯავიძემ გააცნო.
მისი ინფორმაციით, აღნიშნული ხელშეკრულება საქართველოსა და ლატვიას შორის 2005 წელს გაფორმდა, რაც შეეხება დოკუმენტში ცვლილების შეტანას, რომელზეც ხელი 2013 წლის 23 სექტემბერს იქნა მოწერილი, უკვე არსებულ საიდუმლოობის ხარისხის სამ პუნქტს დამატებითი ტერმინი – “შეზღუდული სარგებლობისთვის” ემატება. მისივე განცხადებით, აღნიშნული ცვლილება ნატოს სტანდარტების შესაბამისად მომზადდა და ანალოგიური ცვლილებები ქართულმა მხარემ ესტონეთის და ბულგარეთის სახელმწიფოებთან უკვე გააფორმა.
პარლამენტის პრესსამსახურის ინფორმაციით, კომიტეტის სხდომაზე II მოსმენით “სამხედრო და ორმაგი დანიშნულების პროდუქციის კონტროლის შესახებ” და მისგან გამომდინარე კანონპროექტები განიხილეს. მომხსენებლის, თავდაცვის სამინისტროს წარმომადგენლის, ვეფხია გრიგალაშვილის განცხადებით, პარლამენტში პირველის მოსმენისას გამოთქმული შენიშვნების უმრავლესობა სამინისტრომ გაიზიარა და ასახა წარმოდგენილ კანონპროექტში. კომიტეტის წევრებმა მუხლობრივად განიხილეს აღნიშნული პროექტების პაკეტი და რიგ პუნქტებთან დაკავშირებით დამატებითი განმარტებები მოისმინეს. ვეფხია გრიგალაშვილმა ასევე მეორე მოსმენით “ომისა და სამხედრო ძალების ვეტერანების შესახებ” საქართველოს კანონში ცვლილების შეტანის თაობაზე” კანონპროექტიც წარმოადგინა. დოკუმენტის განხილვისას როგორც კომიტეტის თავმჯდომარემ, ირაკლი სესიაშვილმა განმარტა, წარმოდგენილი კანონპროექტი პირველი მოსმენისას მიღებული კანონპროექტისგან შინაარსობრივად განსხვავებული იყო და პარლამენტის რეგლამენტის შესაბამისად, კომიტეტს მისი განხილვის უფლება არ ჰქონდა. საკითხი შეეხებოდა კანონპროექტში ვეტერანებისთვის დამატებითი სოციალური პაკეტის მიღებაზე და მათთვის რიგი შეღავათების დაწესებაზე, რაც როგორც გაირკვა, მთავრობასთან შეთანხმებულიც კი არ იყო. ირაკლი სესიაშვილმა კომიტეტის წევრებს და საკითხის ინიციატორებს შესთავაზა მეორე მოსმენით გაეგრძელებინათ პარლამენტის მიერ პირველი მოსმენით უკვე მიღებული კანონპროექტის განხილვა, ხოლო რაც შეეხება იმ დამატებით საკითხებს, რომელიც დღევანდელ კომიტეტის სხდომაზე იქნა წარმოდგენილი, მათი ცალკე საკანონმდებლო ინიციატივად მომზადება მოგვიანებით მოხდება. დეპუტატებმა მოიწონეს კომიტეტის თავმჯდომარის შეთავაზება და მეორე მოსმენით, მუხლობრივად განიხილეს კანონპროექტი, რომელიც საჯარო სამართლის იურიდიული პირის – ვეტერანების საქმეთა სახელმწიფო სამსახურის შექმნას შეეხებოდა. სხდომის დასასრულს, ირაკლი სესიაშვილმა კომიტეტის წევრებს მეორე მოსმენით “ინფორმაციული უსაფრთხოების შესახებ” საქართველოს კანონში ცვლილების შეტანის თაობაზე” კანონპროეტი წარუდგინა. თავდაცვისა და უშიშროების კომიტეტის სხდომაზე განხილულ საკითხებზე პარლამენტის პლენარული სხდომა იმსჯელებს.
