თუ რა მოხდება ახალი თვითმმართველობის კოდექსის ძალაში შესვლის შემდეგ გურიაში, “გურია ნიუსის” კითხვაზე ორივე მათგანმა მოკლედ გვიპასუხა.
თენგიზ შერგელაშვილის განცხადებით, უპირველეს ყოვლისა დაიწყება ტერიტორიული ოპტიმიზაცია მუნიციპალიტეტის, რაც ნიშნავს იმას, რომ თვითმმართველობის არჩევნებამდე ქალაქი ოზურგეთი გამოეყოფა ცალკე თვითმმართველ ერთეულად და მის გარშემო შეიქმნება რამდენიმე თემი, ეს შეიძლება იყოს სამი ან ოთხი თემი.
“არჩევნების შემდეგ გაგრძელდება მუშაობა, როგორც ჩოხატაურში ასევე ლანჩხუთშიც და საბოლოო ჯამში მივიღებთ თემებისა და ქალაქების ერთობლიობას. ასევე მინდა გითხრათ, რომ გურიაში სახელწმიფო რწმუნებული-გუბერნატორის პარალელურად იქმნება მუნიციპალური და რეგიონალური გაერთიანება, რამდენი მუნიციპალიტეტიც იქნება მათი საკრებულოს წარმომადგენლები შექმნიან საბჭოს ანუ საკრებულოები აირჩევენ წარმომადგენლებს გარკვეული კვოტების საფუძველზე, რომელიც საერთო რეგიონული პროექტების განხორციელებით იქნება დაკავებული”, _ გვითხრა შერგელაშვილმა.
“რა მოხდება გურიაში? მთლიანობაში მთავარი ცვლილება, რაც მოხდება თვითმმართველობის რეფორმით, თავად გურულების გადასაწყვეტი იქნება, რა არის ადგილზე გასაკეთებელი და არავინ მათ მაგივრად არ მიიღებს გადაწყვეტილებას. თავად მოსახლეობა იქნება ჩართული იმ პროცესებში, რომელიც დაიწყება სოფლებსა და ქალაქებში”, _ თქვა ჩვენთან საუბრის დროს ირაკლი მელაშვილმა.
მელაშვილი მოუწოდებს მოსახლეობას, რომ თვითმმართველობის ახალ რეფორმაში აქტიურად ჩაერთონ.
“მოსახლეობა აქტიურად აღმოჩნდებს ჩართული ყველა იმ პრობლემის გადაჭრაში, რომელიც სოფელში და ქალაქშია. აღარ იქნება ისე, რომ ცენტრალურმა ხელისუფლებამ მიიღოს გადაწყვეტილება იმაზე თუ რა არის გასაკეთებელი სოფელ ნატანებში, ქალაქ ოზურგეთში. თვითმმართველი რეფორმის შედეგად ოზურგეთი მიიღებს თვითმმართველი ქალაქის სტატუს, ექნება საკუთარი ბიუჯეტი. იმ თემებშიც, რომელიც ჩამოყალიბდება და ეყოლებათ პირდაპირ არჩეული გამგებელი, საკრებულო, ექნებათ საკუთარი ფული და შესაძლებლობა იმისა, რომ სოფლისა და ქალაქის პრობლემა ერთად გადაწყვიტონ. მთავარი ის არის, რომ ადგილობრივ მოსახლეობაზე უკეთ არავინ არ იცის, რა არის ადგილზე გასაკეთებელი. ადგილზე უნდა მივცეთ ფული, უფლებამოსილება და თავად მოსახლეობამ აიღოს პასუხისმგებლობა იმაზე, რომ მოუარონ საკუთარ სოფლებს და ქალაქებს.”
_ თქვენი აზრით, რამდენად აქტიურად ჩაერთვება ამ პროცესებში მოსახლეობა?
_ სადღაც აქტიურად ჩაერთვება და სადღაც არა. მაგრამ საქმე კარგად იქნება იქ, სადაც მოსახლეობა აქტიურად ჩაერთვება.
შეხვედრას, რომელიც “ახალგაზრდა პედაგოგთა კავშირის” სააქტო დარბაზში ჩატარდა უმეტეს წილად საჯარო მოხეელები ესწრებოდნენ.
“მუნიციპალიტეტის გამგებლის მოვალეობის შემსრულებელი, მისი მოადგილეები, სოფლის რწმუნებული, ა.(ა).ი.პ-ის ხელმძღვანელები სამუშაო საათებში ესწრებოდნენ ამ შეხვედრას და დამებადა კითხვა, რომ ისინი ყველა განთავისუფლებულები იყვნენ იმ დროისთვის? მე დამრჩა შთაბეჭდილება ამ შეხვედრაზე “ქართული ოცნების” აქტივისტები იყვნენ შეკრებილები და სამოქალაქო სექტორის წარმომადგენლები 2 თუ 3 პროცენტი იყო წარმოდგენილი”, _ განაცხადა “გურია ნიუსთან” საუბრის დროს “ერთიანი ნაციონალური მოძრაობის” ოზურგეთის რაიონული ორგანიზაციის ერთ-ერთმა ლიდერმა, ოთარ რევიშვილმა.
შეხვედრა ორ საათს გაგრძელდა და სტუმრებმა ოზურგეთელების კითხვებსაც უპასუხეს.
