“17 ოქტომბერს გვითხრეს, რომ მარგველაშვილი არ არის ხალხის პრეზიდენტი, რომ ის არ ჩაერევა არანაირი გადაწყვეტილებების მიღებაში, არ ექნება არაფრის თქმის უფლება და 4 წლის განმავლობაში იჯდება როგორც ბუტაფორია. მარგველაშვილი არ არის პრეზიდენტი, ის არის კონკრეტული შპს–ს სამეთვალყურეო საბჭოს თავმჯდომარე. ამ შპს-ს 100–იანი წილის მფლობელი არის ბიძინა ივანიშვილი, გენერალური დირექტორი კი გახდება ღარიბაშვილი. სააკაშვილი კი იყო ინდ.მეწარმე, ყველაფერს თვითონ წყვეტდა, აკეთებდა და საერთოდ არ აინტერესებდა არც სხვა ადამიანების შეხედულება და არც შედეგები”, _ ღნიშნავს ლევან ვეფხვაძე.
ვეფხვაძე ყურადღებას ამახვილებს კონსტიტუციის 81–ე მუხლზე და აღნიშნავს, რომ სწორედ ამ მუხლს აპროტესტებდნენ კოალიციის შემადგენლობაში მყოფი პარტიები. მისი განცხადებით ამ მუხლის შეუცვლელობა საფრთხეს შეუქმნის და შეუძლებელი იქნება საპარლამენტო მმართველობის ფორმაზე რეალური გადასვლა.
“ძალაში შევიდა კოსმეტიკურად შენიღბული ახალი კონსტიტუცია. მთავარი და ფუნდამენტალური 81–ე მუხლი, რომლის მიხედვით პრაქტიკულად შეუძლებელია მთავრობის გადაყენება არ შეცვლილა. ეს იყო ის ნორმა, რომელსაც ყველა პარტია და მათ შორის კოალიციაში შემავალი პარტიები აპროტესტებდნენ. ამ ნორმის პირობებში პარლამენტი იქნება ძალიან სუსტი, ახალი მთავრობა დარეგულირების შემდეგ ააგებს ახალ ძლიერ ვერტიკალს და გააგრძელებს სააკაშვილის მიერ ჩადებულ იდეას. მთავრობას აქვს უმრავლესობის დაკარგვის შიში კოალიციის დაშლის დროს და სწორედ ამიტომ არ უნდა ამ მუხლში ცვლილების შეტანა. ამ ნორმის დარჩენის შემთხვევაში მთავრობა დამტკიცების შემდეგ გახდება საკმაოდ ძლიერი და პარლამენტისგან ხელშეუხებელი. ახლა მაინც ამ ნორმის დაძლევას სჭირდება ¾, მაგრამ სამწუხაროდ „ქართულმა ოცნებამ“ სააკაშვილის ტყავი მოირგო და ესიამოვნა მიშასეული ჯავშანი”.
ვეფხვაძის განცხადებით „ქრისტიან–დემოკრატები“ მხარს უჭერენ მმართველობის ახალ მოდელზე გადასვლას, თუმცა აღნიშნავს, რომ რეალურად ეს დღეს არსებული მდგომარეობით შეუძლებელია.
ვეფხვაძე თვითმმართველობის კოდექსში გასატარებელ რეფორმებსაც შეეხო და განაცხადა, რომ ეს რეფორმა ჩაკეტეს ერთ კონკრეტულ კაბინეტში და არ მიდის გაანალიზება ოპოზიციურ პარტიებთან და ექსპერტებთან, მისი განცხადებით საჭიროა დღესვე გახდეს ნათელი თუ რას ვირჩევთ, რა მოდელს ვქმნით და საერთოდ როდის ჩატარდება ადგილობრივი თვითმმართველობის არჩევნები.
